Read Masana ESAYA 41 Bible Online

ESAYA 41 - Masana bible

ESAYA 41

¹Nigi sum sa kay jokona, lakgi ŋal kiliŋ kay humanu, hin sumun kaf muɗ dono'o, hinsi ɦuray kulo'o, hinsi lawa kaw. Tuɗay kuɗ tuway vun kitata.

²Sa ma fok san ay kulo hay gal kuɗuw pa, kay kitata ma tap kuɗumu kayn gige? Sa ma vul jaf-sumuna hay ɓalamu, cuk muliyan gaa kuɗ gaŋeraŋa valamu kaw kayn gige? Kew-gaferaŋa valam muɗsi goy butuwu, diŋ-diŋ ɓarawta valamu muɗsi ki hoso ma simeɗn merem goyna nala.

³Nam digiɗsiya, nam capa bay sa tun ɓalam talamu, selem may jo gaa kay nagatɗi.

⁴Sa ma hob vun sle namna kayn mi gige? Mi namu ma yi jaf-sumuna hay tun-cawta pa, mi nanu Ma-Vatɗina, ma jewna, mi nanu ma hin bugol hiɗi sa cawn ɗawni kaw.

⁵Jokona cuk irsi kiramu, nisi ka hay narta, sin-nagat ma vatayna ka geɗa, nisi ka co goboyo, nisi ka ma'a.

⁶Nisi gut tuwsi jar-tuwsiya, sa hena di tam niramna ala: Soŋ tuwaŋu.

⁷Sa ma kot kawayna teŋ ir sa ma yor kawayna; sa ma gor tuw kawayn hiɗi martona teŋ ir sa ma to kawayna; nam di kay kaway ma yori vun tuwamna ala: nam ŋaa'a. Nam ci lawayn ma nam kotomna kulo hiɗi oslna, kay nam ma ge'ɗi.

⁸May nigi sa Israyella, sa sunda vanu, jafna vi Yakub sa nan vilekgiya, jafna vi Abraham, bananna,

⁹nigi sa nan yawgiyay goy hay vun dabaŋ-gu'ta vi nagata pa, nigi sa nan yigi ay goy vun nagat pana, nigi sa nan di tigi ala nigi si sa sunda vanu, nan vilekgiyawa, nan may cukgi goyɗi.

¹⁰Ligi narɗi, kay nan ka hiɗi nigiya, mal irgi goy hiɗi nartaɗi; kay nanu mi Lawna vigiya; nan vulgi dono'o, nan co gut kuɗgiya, nan gut kigi hiɗi ɓanta jufta ta vul kolda.

¹¹Nisi ma hob hiɗi zulota hiɗi viy-goyta tige, nisi kaf sa diksi ɓulakay katgiya; nisi ma muɗ goy waa'a, nisi ma ba goyo, nisi kaf sa ci way hiɗi nigiya.

¹²Nigi ma garsiya may nigi as fisiɗi, nisi sa as cirepgiya; nisi ma muɗ goy waa ɦawa, nisi sa ay ligi duura.

¹³Kay nanu mi Ma-Vatɗina Lawna vigiya, ma vigi ɓigiya; ma di tigi ala ligi narɗi, nan ka co gut kigiya.

¹⁴Ligi narɗi, nigi jufulla vi Yakub, nigi sa maŋayna vi Israyel sa koti kay mitta. Nan ka co gut kigiya, dita vi Ma-Vatɗina, nan ma butgi goyo, Ma-Peldetna vi Israyel.

¹⁵Wulini nan min muɗgi ki kaway ma to wana nala, ma tuwam jarfaya, ma wuliya, osl talam ciya; nigi ma to hiɗiyn gaa'a, lutum goy kaw hiɗi namu, liy ma jiŋiliŋŋa nigi ma muɗum ki us-cekcelemna nala.

¹⁶Nigi ma sirsi goyo, simeɗna ma kal hiɗi nisiya, ɦiwliŋŋa ma mersi goyo. May nigiya, nigi ma li firiya hay Ma-Vatɗina, nigi ma subur tuwgi hay Ma-Peldetna vi Israyel.

¹⁷Sa maŋayna hiɗi sa hawna gar niyna, may nam may noŋɗi; goslsi soy patat' kay laata. Nanu, Ma-Vatɗina, nan ma vulsi gida; nanu Lawna vi Israyel, nan ma noysi goyɗi.

¹⁸Nan ma hin niyna riŋ kulo kay yam liy ma soy goyna, nan ma hin niyn riŋ goyo hay li ma lokŋa, fulda nan ma muɗa' goy mi goloŋo, naga ma soy goyna nan ma muɗum mi liyn ma niyn riŋ haya.

¹⁹Hay fulda nan ma pi gu-gamna hiɗi gu-kasiyana, gu-warana hiɗi gu-olivena; hay fulda nan ma pi gu-siprena, ziŋitna hiɗi zlak-zlarawna, kaf nan ma pum dar kepe;

²⁰Kay nisi ma wi'e, kay nisi ma wum goyo kaw, ala ɓam Ma-Vatɗina li slen kaynawa, ala Ma-Peldetna vi Israyel kot slen kayni mi namu.

²¹Vigi caw lawta vigiya, din mi Ma-Vatɗina, ɗekgi gasita vigi goyo, din mi mulla vi Yakub.

²²Hinsi ɗekem goyo, hinsi duma labara kay sle ma min li'e, slen ma li jewe, nigi ma ɗekma goyo a nam ay nanige, nala numa ma tun ŋalda vuma'a, kay wi slen ma min li vokŋa, lebo nigi vuma labara kay sle ma min li vokŋa.

²³Nigi vuma labara kay sle ma li cawna, nala numa ma wi ala nigi si lawayna, ligi va ma ŋaa'a lebo joo'o tuta, kay numa ma malma irma goyo, a nay ma wum kuɗ tuwaya.

²⁴Humgiya, va ma goy ɦawan suwgi nigiya, lopna vigiya mi va ma waa ɦawa; sa ma vilekgina nam vilek liwistawa.

²⁵Nan fokomi kulo'o hay gal gaa pa, nam coya hay gal ma kuɗuwn pa, nam yi semda vanu hay vunamu; sa ŋom-nagata nam taysi gaa'a ki butuwna nala, ki sa ma kot dowayna tay naga dirgin gaa'a nala.

²⁶Sa ma di labar namna hay tun cawta pa kay nay ma wumu mi gige? Sa ma di goy jew ɓa-ɓa a nay ma di ala «kayn gasiya» mi gige? Sa ma di labar namna mayɗi, sa ma ɗekem goy mayɗi, sa ma hum yoboyna vigi mayɗi kaw.

²⁷Nam ma co jew voko hay Siyon di'e: Nisi lakŋi! Nisi lakŋi! Hay Yerusalem nan vul sa ma di labara ma ŋaana.

²⁸Nan ɗuwa, sa mayɗi, sa ma vul vaara valam mayɗi, sa ma hot dit mayɗi la nan jobomu.

²⁹Humgiya! Nisi kaf mi sle ma waa'a tige? Lopna visiya nam waa'a, lawayna visiya nam mi simeɗna hiɗi sle ma ɦawa'a.