Read Masana ESAYA 42 Bible Online

ESAYA 42 - Masana bible

ESAYA 42

¹Sa ma sunda vanu ma nan min gut kuɗumna zawni, ma vilekayna vanu ma ciwta van daramna. Nan cuk ŋusta van kalamu; nam ma vul labara vi gasita tam jaf-sumuna.

²Nam ma siwel kuloɗi, sa humum delem hay hagata vi hoyok-ziynɗi kaw.

³Cerew ma hormosi gaana nam ma kusum goyɗi, kuta vi fitilla ta ka ŋal kiɗayta nam ma tewa goyɗi; nam ma di gasita hay hagata va'a.

⁴Nam ma maŋ goyɗi, nam ma vi tuwam goyɗi, ta-ta hay li ma nam tun ɗigerta gaa kay nagat tuwa, ta-ta hay li ma jokon kaf cub gatta valamu.

⁵Kayn dita vi Lawna, Ma-Vatɗina, nam ma kot dukalawna, ma vum goy gaa'a kaw, nam ma meɗ nagat goy gaa'a hiɗi vuɗna va' ma haya'na, nam ma vul sukŋa mi sum sa ka li ziy haya'na, nam ma vul ŋusta hay sum sa ŋuy yam nagata.

⁶Nanu, Ma-Vatɗina, nan yaŋawa kay gasita, nan vaŋ hay ɓanu, nan ŋomaŋu, nan tunaŋawa kay naŋ ma jun bonot hiɗi sumuna, kay naŋ ma lin mi haraŋa vi jaf-sumuna.

⁷Kay mal ir sa ma dukin goyo, kay but sa gorvon goy hay daŋgayna, kay but sum sa hay jufunda goy hay ziyna visi pa.

⁸Nanu mi Ma-Vatɗina, kayn ti semda vanu; nan as vul gajijita van goy mi sa maraɗi, nan as vul suburta van goy tam va ma sli tuw sanɗi.

⁹Wulini slen ma li jewna vunam hobawa, nan min vi labara kay mara ma min li lo; jew a nam vuɗ goy kayni, nan min nigi ma humumu.

¹⁰Gigi nul ma wuliya tam Ma-Vatɗina, suburgi semda valamu goy hay vun nagat kuɗulu, nigi sa ka dol goloŋ hay niy-lum ma ŋolla, nigi sa ka hob niy-lumna, jokona hiɗi sum sa hayamna.

¹¹Hin sum sa hay hoyok-ziy ma fulla pat siwel kulo ŋolo, sum sa hay hoyok-ziy ma gurayna vi Kedar kaw, hin sum sa hay Sela ci luluna, hin winek ma firina pat kulo kay yam hiɗiyna.

¹²Hinsi subur Ma-Vatɗina, hinsi tiy semda valamu kulo kay yam jokona!

¹³Ma-Vatɗina kal goyo ki bulumna ma donona nala, nam gufut donota valam goyo, ki sa ma duura nala; nam ci luluna, nam pat ciriyna, nam kol kay sa gawt kalamna.

¹⁴Nan mus ŋal ŋolo ta-ta, nan zan vunanu, nan tel tuwanu; nan tiy ki cata ta ka puk nala, sukan ka yaw kelanu, nan ka gi suk gif-gif'.

¹⁵hiɗiyna hiɗi jiŋiliŋŋa nan ma tom goyo, liyn ma goɗayna nan ma som goy kafe; niy-lumna nan ma muɗum goy joko'o, goloŋŋa nan ma som goyo.

¹⁶Sum sa dukina nan ma poysi hay hagata ta nisi may wa' jewɗi, nan ma poysi hay haga gurayta ta nisi may wa' noŋɗita; nan ma muɗ jufunda goy haraŋa voksiya, liy ma koroŋkocona nan ma torom goy voksiya; kayni mi va ma nan min lumu, nan ma noysi goyɗi.

¹⁷Nisi ma hot goy bugolsiya, nisi ma caw zulo'o, nisi sa tun vida visi hay sle ma ceɗayna, nisi sa di tam kaway ma yorayna ala naŋu mi lawayna vuma'a.

¹⁸Nigi sa gidiŋŋa, humgiya, nisi sa dukina, ɗuwgiya, wigi kaw!

¹⁹Sum sa dukin si sarige? May si sa sunda vanɗi su? Sum sa gidiŋi ki sa sunda vanu sa nan cuksin nala si sarige? Sum sa dukiya ki nisi sa fi sle'ta nala si sarige? Sum sa dukiya ki sa sunda vi Ma-Vatɗin nala si sarige?

²⁰Nigi wi slen ŋolo, may nigi min tun ŋalda vigi kalamɗi; malgi humgiyawa goyo, may nigi min humɗi.

²¹Kuɗ gasita valamu, Ma-Vatɗina minawa kay muɗ gatta ŋolo, muɗa' jifiya kaw.

²²Kayni si jaf-sum sa tiy ɓuraŋi, vurumiya kaw, nisi viy hay jawta hay zulla kafe, cuki goy hay daŋgayna; nisi kaf vurumiya, sa kep kaw ma as butsi goy mayɗi. Nisi vurumiya, may sa ma as di ala hot slen goyo mayɗi.

²³Sa ma jargiya ma min jak humam kay slen kayni mi gige? Sa ma min tun ŋalamu kay hum labara kay slen ma vokŋa mi gige?

²⁴Sa ma vul jafna vi Yakub goy hay ɓam sum sa ti ɓuraŋ kayni mi gige? Sa ma vul sum sa Israyel goy hay ɓam sa vurum sumun kayni mi gige? May mi Ma-Vatɗina ma nay li sulukawa talamna ɗisu? Nisi may mini kay poy hay hagata valamɗi, nisi may hum kuɗ gatta valamɗi kaw.

²⁵Ki kayn nala nam gi ɦiyda valam ta ŋoldawa gaa kay sa Israyella, hiɗi ɦawlata vi duura; duura slaawa kuwa hay galsi kafe, may nisi may wi kayn noŋɗi; nala kut ŋalsiyawa, nisi min vi van kayni hay diksiɗi.