Read Masana ESAYA 43 Bible Online

ESAYA 43 - Masana bible

ESAYA 43

¹Wulin kayni Ma-Vatɗina ka di'e: Nanu ma kotgiyawa, nigi jafna vi Yakub, nanu ma ingiyawa, nigi sa Israyel. Ligi narɗi, kay nan butgiyawa goyo, nan yigiyawa hiɗi semda vigi ala nigi vanu.

²La nigi ɦaw goloŋo, nan ka hiɗi nigiya, niy-lumna as ɗuɓgi gaaɗi kaw; la nigi tuɗ jar kuta, kut as ŋalgiɗi, sin-kuta as loɗgi goyɗi.

³Kay nanu mi Ma-Vatɗina, Lawna vigiya, Ma-Peldetna vi Israyel, ma su'da vigiya: Nan min muɗgi hiɗi Egipte, nan min vul Etiopiya hiɗi Seba hay baŋalgiya.

⁴Kay vok iranu nigi tek ŋolo, kay nan sligi yigiyawa kulo'o, kay nan mingiyawa. Nan vul sum sara hay baŋalgiya, nan vul jaf mara hay baŋalgiya kay irita vigiya.

⁵Ligi narɗi, kay nan ka hiɗi nigiya; jafna vigiya nan ma marsi ay hay gal kuɗuw pa, hay gal vulati pa nan ma tokgi yigiya.

⁶Nan ma di tam gal ma gaana ala: Vulaŋu, nan ma di tam gal ma kayamna ala: Telsi loɗi. Guro-jufayna vanu naŋ ma marsi ay goy gine pa, guro-boyna vanu naŋ ma marsi ay goy hay sin nagata pa.

⁷Nisi sa yi semda visi hiɗi semda vanu, nisi sa nan kotsiyawa kay gajijita vanu, nisi sa nan insiyawa, sa nan lisiya kaw.

⁸Sum sa irsi ka ca, may irsi wiɗina nigi ma cuksi ay goyo, sum sa humsi ka ca, may humɗina nigi ma cuksi ay goyo.

⁹Hin jaf-sumun kaf tok tuwsiya, hin sumun kaf mol yam tuwsiya. Jarsiya sa ma di slen namna goy voko mi gige? Sa ma vulay labara kay slen ma li jewna mi gige? Hinsi li di-goyta visiya a sumun ma wi ala dita visi gasiya; hin sumun hum dita visiya a gigekaw ma di ala dita visi gasiya.

¹⁰Nigiya si sa di-goy kanna, din mi Ma-Vatɗina, nigiya hiɗi ma sunda vanu ma nan vilekem goyna, kay a nigi ma wumu, kay a nigi ma vi hayamu, kay a nigi ma hum ala nan mi nanu, jewan nanu, Lawn mara may kotiɗi, bugolan nanu kaw Lawn mara mayɗi.

¹¹Mi nanu, nanu ma yan ala Ma-Vatɗina, goy bugolan nanu sa ma su'da mara'a mayɗi.

¹²Di labara kay slen ma vokŋa mi nanu, vul su'da mi nanu, may mi Lawayn ma pulla ma ka jarginɗi, nigiya si sa di-goyna vanu, din mi Ma-Vatɗina, nanu mi Lawna.

¹³Nanu mi nan dok-doko jew kotta vi buura, sa as but sa goy hay ɓanɗi. Nan min li va'a, sa ma as col vok iranu mi gige?

¹⁴Kayni dita vi Ma-Vatɗina, namu ma gusgiyawa, Ma-Peldetna vi Israyel, nan gi sa ma gawt kat Babilon kayni kuɗgi nigiya, nan ma munsi jaŋi, nisi kaf sa Kaldeena sa ka pat ciriyn hay batoona visiya.

¹⁵Nanu mi Ma-Vatɗina, Ma-Peldetna vigiya, ma kot sa Israyella, mulla vigiya.

¹⁶Kayni dita vi Ma-Vatɗina, ma ɓir hagata hay niy-lum ma ŋulona, ma gi hagata gurayta hay niy-lum ma donona.

¹⁷Namu ma zlar keke-ma-duura hiɗi kulumayna goy vun duura, ma zlar soje sa diksi donona vun duura. Nisi bur gaa'a, nisi fok kulo loɗi, nisi teway goyo, nisi ŋalay goyo ki zew ma hay fitilla nala:

¹⁸Humgi ma gigi kay slen ma li jewnɗi, ŋaɓgi slen ma ɓa-ɓan loɗi.

¹⁹Wulini nan min li va ma wuliya, va namna ka vuɗ ɗaw, nigi as wi kaynɗi su? Nan ma gi hagata hay fulda, nan ma gi niy-lumna hay naga ma soy goyna.

²⁰Muur ma hay fulda ma tiyan senu, cekemna hiɗi rigetna kaw, kay mige nan gi niynawa hay fulda, kay nan gi niy-lumnawa hay nagata ta soy goyta, kay vul tin mi sumuna vanu, sa vilekayna vanu.

²¹Sum sa nan kotsi ir vanna ma tiyan senu.

²²Nigi min yi semda vanɗi, nigi jafna vi Yakub, nigi makawa kanu, nigi sa Israyella.

²³Nigi may lan ɗifin ma ŋal-goyna hiɗi guro fok-diminɗi, nigi may suburan hiɗi ɗifinna vigiɗi, nan may ligi hiɗi dono'o kay nigi li vulda tanɗi, nan may makgiya kay nigi ma ŋal urdin vok iranɗi.

²⁴Cerew ma hisna nigi may gusanti hiɗi gurjutɗi, nigi may hoban hayan hiɗi mul-sliwna ma ɗifinna vigiɗi; may nigi lan dono'o kay nan ma sungiya kuɗ sulukŋa vigiya, nigi makanawa hiɗi joota vigiya.

²⁵Nanu mi ma ɦas jiw-zlata vigi goyo kuɗ minda vanu, humaŋ ma gan kay sulukŋa vigi loɗi.

²⁶Nigi gan humanu, laway kuɗ tuway tige! Lawgi kay tuwgiya kay col gasita vigiya.

²⁷Bugi ma jewna li suluku, sa muɗ vunna vigiya kaw yaw kulo katanu.

²⁸Kuɗ kayni sa ŋulona vi liyn ma peldetna nan ɗuwsi ki sum sa waa nala, jafna vi Yakub nan vulsi goyo tam telda, sa Israyella nan vulsi goy tam ŋulda.