Read Masana ESAYA 44 Bible Online

ESAYA 44 - Masana bible

ESAYA 44

¹Wulin kayn humgi yo, nigi jafna vi Yakub, sa sunda vanu, nigi sa Israyella sa nan vilekgiyawa!

²Kayni ti dita vi Ma-Vatɗina ma kotgiyawa, nam ma ingiyawa hay vu'da vigi pa, namu mi ma gut kuɗgina, ligi narɗi, nigi sa sunda vanu, jafna vi Yakub, Yesurun[17] sa nan vilekgi goyna.

³Kay nan min ɦok niy kay yam nagata ta soy goyta, nan ma gi niy ma jaŋŋa hay yam nagata ta ya' hiɗaki goyta, nan ma yam ŋusta vanu goy kay jafna vigiya, nan ma gi bolda van kay gurona vigiya.

⁴Nisi ma day kulo jar usna, ki gikŋa day kel niy ma jaŋŋa nala.

⁵Sa hena ma di ala: Nanu vi Ma-Vatɗina; sa hena lo ma di ala tun semda vi Yakub talamu; sa mara'a ma ɗo way-ɓalam ala: vi Ma-Vatɗina, ma tun semda vi Israyel talamu.

⁶Kayni ti dita vi Ma-Vatɗina, mulla vi Israyel, namu ma gus sum sa Israyella, Ma-Vatɗina vi vok-ma-duura. Nanu mi ma jewna, nanu mi ma cawna kaw, goy bugolan nanu Lawn mara mayɗi.

⁷Sa ma as law ki nan nala mi gige? La ka'a hinim ɗek tuwam goyo, di va'a kaw, tun caw hay li ma nan kot sum sa vatɗin pa, hinsi di goy kay sle ma lina, hiɗi slen ma min li'e tige!

⁸Ligi narɗi, tuwgi wirgiɗi kaw; hay jew ɓa-ɓa dok-dok nan hingi hum labara, nan ɗekem tigiya kaw ɗisu? Nigiya si sa di-goyna vanu: Lawn mara'a ka goy bugolan nan su? Hiɗiy mara'a mayɗi, nan may wi mara noŋɗi.

⁹Nisi sa ceɗ sle ma sli tuw san nala, nisi kaf si sum sa waa ɗar, slen ma nisi ceɗemna mi sle ma nisi li di-goyt kalamu, sle namna iram wiɗi, nam may hiɗi widaɗi kaw, sle namna ma muɗ zulo'o.

¹⁰Sa ma ceɗ lawayna lebo yor kawayna mi gige kay la fi va ma ŋaa kuɗumɗi?

¹¹Ki kayn nala, sum sa tapay kuɗ sle namna kaf ma muɗ zulo'o; sum sa ka kawayna nisi si sum-wura ɦawa, hinsi tok tuwsi kaf, hinsi co vok iran kafge, nisi kaf ma muɗ nari, li zulo'o kaw.

¹²Sa ma zli-cafna kot ceɗna, nam li lop hiɗi veŋŋa, nam kot lawayna hiɗi marto ma hay ɓalamna; nam li lop hiɗi glaŋam dono'o; may mayt vum ci'e, donom vat goyo, nam fi niy ma ciɗi, nam cap mak goyo.

¹³Sa ma ceɗ guna ŋaɓ gun hiɗi zigewna, ɓirim gaŋam hiɗi lakrena, nam kaam goy hiɗi mukasna, ŋram gaŋam hiɗi siina, bugolda nam muɗum ŋray ca ki san nala, ki sa-wurana nala, nam colom kalaf hay ziyna.

¹⁴Nam ka gu-gamna nam yaw gu-ɦooyna hiɗi gu-ma'asna, nam vilek gu kep jar gu ma hay fulda; nam pi gu-gunura, niyn wulum kulo'o.

¹⁵Gu namna gut sana hay li ma san ŋalamu, nam ŋalamu kay hol tuwamu, nam ŋalam kaw kay yi funa, hiɗi gu namna nam kot lawn mara'a kay girif gaa vokomu, nam kot va ma sli tuw sana, nam siɗaw tam va namna.

¹⁶Galla vi guna valamu nam ŋalam goy hay kuta, hiɗi galla vi gu namna nam as ti sliwna, nam zal sliwna, sleɗ hayamu; nam mus vun kuta, bugolda nam di'e: Haha! Kut ka vanu, iran ka wi kuta.

¹⁷hiɗi gu ma hinina nam kot lawn mara'a, va ma sli tuw sana, nam siɗaw tam va namna, nam girif gaa'a, yi sem va namna, siwel ala: Butan goy butge! Kay naŋu mi lawna vanu.

¹⁸Wida visi mayɗi, yisi may wi va noŋɗi, kay nam duksi irsiyawa goyo kay nisi ma ɗuwɗi, kay nam duksi diksiyawa goyo kay nisi ma varɗi.

¹⁹San may var va hay dikamɗi, nam may hiɗi wida asayɗi, yamda-wida asayɗi kaw, kay di ala gal ma hena nan ŋalam goy hay kuta, gal ma hena nan yi fun hiɗi namu, galam hena nan cuf sliw ma mutna hiɗi namu, nala diram ma hinna nan min ɓulakam goyo. Nan girif gaa vok gu-kuɓulusna ɗawn giriftige nisi may di naɗi.

²⁰Nam lugut tuwam hiɗi butuw-kuna, dikam ma viy kuɗ lawt kayni viyim goyo, nam ma but irita valam goyɗi, nam as di ala nan la' kayn ti jootɗi su? Nam as di naɗi.

²¹Humgi ma gigi kay kayni, nigi jafna vi Yakub, Israyella, nigi si sa sunda vanu; nan kotgiyawa kay nigi ma lak si sa sunda vanu, nigi Israyella, yan as jokgi noŋɗi.

²²Nan ɦas jiw-zlata vigiyawa goyo ki ɗugulla nala, nan ɦas sulukŋa vigiyawa goyo ki nukŋa nala, hotgiyay katanu, kay nan gusgiyawa.

²³Dukalawna, patgi ciriyna, kay Ma-Vatɗina li lopna valamawa; zulla vi nagata ma wiŋŋa, cigi luluna, hiɗiyna, cigi yirina! Juruta, naku hiɗi gu ma hayagŋa kaf kaw. Kay Ma-Vatɗina gus jafna vi Yakubawa. Nam ɗek gajijita valam goyo hay Israyel.

²⁴Kayni ti dita vi Ma-Vatɗina ma gusgina, nam ma kotgiyawa hay vu'da vigi pa: Nanu, Ma-Vatɗina, nan li slen kafe, nan kep as meɗ dukalawn goyo, nan kay tuwanu as bisleɗ nagat goyo.

²⁵Ɗekka vi sa jobta sa sinna nan vata' goyo, sa tun gireyta nan ɦoysi goyo; sa yalla nan hotsi goy bugolsiya, wida-yalla nan muɗa' goy ɦay-ɦaya.

²⁶Sa jobta vanu sle ma nisi dumna nan tap vunan kuɗumu, nan hob vun sle ma sa jobta van dumna. Nan di kay Yerusalem ala: sumun ma lak ziy haya' lo, nan di kay hoyok-ziyna vi Yuda: nam ma hot in kulo lo, liyn ma toy gaana nan nan ma hot inim kulo'o.

²⁷Nan di tam niy ma zulla ala: Hiɗakaŋ goyo, nan min so niy ma jaŋ hayaŋŋa goyo.

²⁸Nan di tam Sirus: ma ŋomda vanu! Nam ma hob darta van kafe, nam ma di kay Yerusalem ala: Hina' in kulo'o! Nam ma di kay Tempella ala: hinsi vum bagam gaa'a.