Read Masana ESAYA 45 Bible Online

ESAYA 45 - Masana bible

ESAYA 45

¹Kayni dita vi Ma-Vatɗina, ta nam da' kay Sirus, falamna ma mul ɦoki kalamna, ma nam vum hiɗi ɓalam ta jufta, kay ɦo jaf-sumun gaa vokomu, kay ŋra kanti ma fur muliyan goyo, kay mal cokorom ma ma'na vi vun-galan goy vokomu, kay vun-galana ma li duki loɗi:

²Nan ma tun vokaŋu, liy ma beɗna nan ma ŋram kulo'o, vun-gala ma koti hiɗi wayna nan ma kusum goyo, cokorom ma kawayna nan ma kusum goy pek-pek.

³Nan ma vulaŋ faray ma piy gaana, faray ma ŋayayna, kay naŋ ma wi ala nanu mi Ma-Vatɗina, ma yaŋu hiɗi semda vaŋu, nanu mi Lawna vi israyel.

⁴Kuɗ sa ma sunda vanu Yakub, hiɗi sa Israyella sa nan vileksi goyna. Nan yaŋu hiɗi semda vaŋu, Nan vulaŋ semda ta tiyta, bay naŋ wanu.

⁵Nanu mi Ma-Vatɗina, Ma-Vatɗina mara mayɗi, Lawn mara'a may goy bugolan nan noŋɗi, Nan junaŋ kanti ma fuura, bay naŋ wanu.

⁶Kay a sumun ma wi'e hay kuɗuwu pa ta-ta vulatiya, ala goy bugolan nanu va mayɗi: Nanu mi Ma-Vatɗina, Ma-Vatɗin mara may noŋɗi.

⁷Nan kot haraŋa, nan kot jufunda, nan mar sle'ta, nan kot joota kaw. Nanu, Ma-Vatɗina, nan kot slen kafe.

⁸Hin dukalawna mar maɗayn gaa'a, hin ɗugulla riŋ gasit goyo, hin nagat mal vuna' goyo, kay tap tuwam kaf kay vuɗ su'da, a gasit ma day kulo'o. Nanu Ma-Vatɗina, nan mi ma kot slena.

⁹joot kay sa ma ci way hiɗi sa ma kotomna! Dowayna jar doway nagana. Naga-dirginna as di tam sa ma kotomna ala: naŋ lum mi mige nam as dum ala su? Nam as dum ala lopna vaŋ as gutɗi, nam as dum nala su?

¹⁰Joot kay sa ma di tam bulum ala: naŋ vuɗ goor kay mige? Joot kay sa ma di tam sulum kaw ala: nak vuɗ goor kay mige?

¹¹Kayni dita vi Ma-Vatɗina, Ma-Peldetna vi Israyel: namu ma kotsina, nigi min joban kay sle ma vokŋa su? Nigi min ɗekan yali kay gurona vanu hiɗi lop ma nan lum hiɗi ɓanna su?

¹²Nanu mi ma kot nagata, nanu mi ma in san gaa ka'a kaw; mi nanu, nan meɗ dukalawn goy kayn hiɗi ɓan nanu, nanu mi ma di law vok-ma-duura vi dukalawn kafna.

¹³Fok Sirus kulo'o kay gasita kayni mi nanu, nan ma tor hagat goy vokom kafe; nam ma hot in hoyok-ziyna van kulo'o, sa gorvona vanu nam ma hinsi kala bay jobsi gurju'u, bay jobsi va'a kaw. Din mi Ma-Vatɗina vi vok-ma-duura.

¹⁴Kayni dita vi Ma-Vatɗina: wurakŋa vi sa Egiptena, fita vi sa Etiopiyana, hiɗi sa Sabeena, sum sa wuli kulo fiyoko, nisi ma kal goy vaŋu, nisi ma muɗ vaŋu, sum nisin ma tuɗ ŋoraŋu, nisi ma jik (vokaŋ) hiɗi jaɓn juni ɓisiya, nisi ma girif gaa vokaŋu, nisi ma siɗaw vok iraŋ ala: Lawn ka kayn vo vaŋ naŋ kepe, laway mara may noŋɗi, lawayn kaf kayn waa'a.

¹⁵Gasiya, naŋu mi Lawna ma ŋay tuwaŋu, Lawna vi Israyella, ma su'da.

¹⁶Nisi kaf muɗi zulo'o, viyi goyo, nisi kal hiɗi viyta-goyta, nisi sa ceɗ lawayn ma waana.

¹⁷May sum sa Israyella nisi fi su'da ɗawn kuɗ Ma-Vatɗina, su'da ta vatɗita, nigi ma muɗ zuloɗi, nigi ma viy goyɗi kaw ta-ta hay vatɗita.

¹⁸Kay kayni dita vi Ma-Vatɗina, ma li wuralawna, namu Lawn ma Kepna, ma kot nagata, nam ina'a, vula' dono'o kaw, nam may kota' goy ɦawaɗi, nam kota' kayni kay san ma mus ziy haya'a. Nanu mi Ma-Vatɗina, Ma-Vatɗina mara'a may noŋɗi.

¹⁹Nan law tigi kayni may goy ŋayayɗi, may hay liy ma jufunna vi nagataɗi. Nan may di tam jafna vi Yakub ala nigi garan goy waa'a nan may disi naɗi. Nanu, Ma-Vatɗina, nan di sle ma gasina, nan col kay lawta ta ɗigerta.

²⁰Tokgi tuwgiya, nigiyaya, nigiyay goboyo kuɗ tuwgi kafe, nigi caw jaf-sum sa hin goyna. Nisiya wida visi mayɗi, nisi sa ziy gu ma ceɗina ma sli tuw-sana, nisi sa siɗaw tam lawayna sa suɗsi goyɗina.

²¹Digi labar goyo, vulgi dita vigi goyo. Hinsi ŋra lawta visi jar-tuwsiya. Sa ma hinsi hum labara kayni hay tun cawt pa, ma dum goy jew ɓa-ɓa kaw kayn mi gige? May mi nan Ma-Vatɗina ɗisu? Goy bugolan nanu Lawn mara may noŋɗi, Lawn ma ɗigera ma suɗ sumuna, goy bugolan nanu Lawn mara may noŋɗi.

²²Muɗgi irgi ay kiranu, kay nigi ma suɗ goyo, nigi kaf sa hay sin-nagata, kay nanu mi Lawna, Lawna mara'a may noŋɗi.

²³Nan yi va kanu hiɗi semda vanu, hay vunanu law ma ɗigera kal goyo, yoboyna ma nan as muɗumɗina kal goyo, sumun kaf ma girif gaa vokanu, sumun ma yi va kisi hiɗi vunna visi kaf hay semda vanu.

²⁴Nisi ma di ala: hay Ma-Vatɗin kep lopna vi ɗigerta hiɗi donota ka'a; nisi kaf sa ay ɦoyay katalamu ma co talam hiɗi zulota.

²⁵Jafna vi Israyel kaf ma muɗ ɗigere kuɗ Ma-Vatɗina, nisi ma subur tuwsi kuɗumu kaw.