Read Masana ESAYA 46 Bible Online

ESAYA 46 - Masana bible

ESAYA 46

¹Bel girifi gaa'a, Nebo guɗof gaa'a, nisi bur tuwna vi lawayna visi kay muur ma ziy jakŋa, nigi ay ziyim kulo kay muura, nam ci muur neke ta-ta muur mak goyo.[18]

²Nisi kaw girifawa gaa'a, nisi kaw guɗofawa gaa'a, nisi as but jakŋ goyɗi; nisi kaw ka kal goy gorvo'o.

³Humgiya, nigi jafna vi Yakub, nigi kaf, caw sum sa hinina vi ziyna vi Israyel, nigi sa nan tun caw ŋomgiya hay li ma nigi ka dig sumaygin pa, nigi sa nan ziygiya hay vu'da vigi pa.

⁴Ta-ta hay maarta vigiya, nan ka hay liyanna dok-doko, ta-ta nigi muɗ busay kaw nan ma gut kuɗgiya, ki nan li jew nala, wulini kaw nan min ziygiya, gut kuɗgiya, butgi goyo.

⁵Sa ma nigi min ŋran hiɗi namu, kay nan ma sli ki nam nala mi gige? Sa ma nigi min muɗan a nan slum nam nala mi gige?

⁶Ora ma hay birimna visina nisi cukum goyo, ŋa doorota kulo kay va ma ŋa nekka, nisi wurak sa ma yor ora, kay nam kotsi lawayna, nisi hot siɗawamu, nisi girif gaa vokomu kaw.

⁷Nisi ziyimu, burum kulo dekdelsiya, nisi burum hay ma nisi as burum hayna. Nam may geɗ diram goy hay liy maraɗi, la sa siwel talam kaw, nam may hot ditɗi, nam may suɗ sa goy vun-zlatɗi kaw.

⁸Hin humgi gigi kay kayni, ligi tuwgi sum sa jufaya. Nigi sa ŋel gatta, vargi kay van kayni.

⁹Hin humgi gigi kay slen ma li jewna, kay nanu mi Lawna, lawayn mara'a may noŋɗi. Nanu mi Lawna, lawn mara ma slan nan nala mayɗi.

¹⁰Nan di labara hay tun cawt pa kay slen ma min co bugolo, goy jew ɓa-ɓa nan di labara kay slen ma vunam bay hob tuwa. Nan di'e: Va ma nan dumna ma li'e: nan ma hob vun sle ma nan minimna kaf kaw.

¹¹Layayna ma ti sliwna nan yum ay hay gal kuɗuwu pa, sa ma hob vun lawta vanu, nan yum ay goy hay nagata ta gineta pa, va ma nan dumna, nan hinim co'o, va ma nan kotom kotna, nan lumu.

¹²Humangiya, sum sa dikgi so'otayna, nigi sa jargi jay goy gine'e hiɗi gasita!

¹³Nan min mar gasita van goboyo: na' may goy gineɗi, nan mar su'da vanu, ya' as vi ta-ta loɗi. Nan tun su'da hay Siyon, kay sa Israyella bogorayna vanu.