Read Masana ESAYA 47 Bible Online

ESAYA 47 - Masana bible

ESAYA 47

¹Jikag gaa'a, musag gaa hay butuwna, nak goor-wayata, goot-cata vi Babilon! Musag gaa hay nagata, bay zlamda-mulda, nak goot-cata vi sa Kaldeena! Kay nisi ma yag ala ta luma'da ta min darta vi sli-tuwna nisi ma yag nala loɗi.

²Yawag hiɗiy ma ma'na, lutag futuwna; yawag sligar ma giy kagŋa goyo, vag vun sligara vag kulo'o, hinag goy ɦawa'a, ɦawag niy-lumna.

³Nisi ma wi nalata vagu; nisi ma wi zulota vagu: nan ma job yanu, sa ma as telan mayɗi.

⁴Sa ma butay goyna yum ala Ma-Vatɗina vi vok-ma-duura, Ma-Peldetna vi Israyel.

⁵Musag gaa ŋal kiliŋ, tuɗag hay jufunda, nak goota vi sa Kaldeena! Nisi ma yag ala Mulda vi Muliyana loɗi.

⁶Nan muɗ ɦiy kat sumuna vanu, nan muɗ vocota van goy waa'a, nan vulsi hay ɓagu; may nak min wisi hawsiɗi, nak tun jak ma nekŋa vag pel sa maariyana visiya.

⁷Nak di ala nak ma mus multa dok-doko. Nak may var slen kayni hay dikagɗi, nak may var ala slen kayni yalam ma dabaɗi.

⁸Wulini humag slen kayni, nak ta min darta vi sliw-tuwna, ta mus gaa'a hiɗi bay-narta, nak ta ka di hay dikag ala: Nan kep kayn tuta, nan as muɗ duhul noŋ ne'ɗi, nan as hin goy hay guroɗi kaw.

⁹Slen namna ma ma'n lakŋi ma co tagu gosoy wit, hay buur kep ɦawa, mitta vi gurona hiɗi hinta goy duhulta; nam ma nig gaa kagu hiɗi donom kafe, hiɗi cakayna vagu hiɗi gul-yalda vag pet kaw nak as telem goyɗi.

¹⁰Nak tun vida vagu kay joota, nak di ala: Sa may wanɗi, yalla hiɗi wida vagu hiwirag yagawa, nak di hay dikag ala: Nan kep kayn tuta.

¹¹joot ma co kagu, bay irag cuk kay liyn ma fo goyna, bakmarana ma co kagu, bay nak telem goyo; ɓulak-goyta ma nig gaa kagu vun tuwa' na wit' bay nak wum goy jewe.

¹²Musag jar lopna vag ma li cakayna, hiɗi gul-yalda vag ta kuɗ tuwa' dak-dakka, ta nak ka suna'a hay wayata vag pa; la li ŋalɗi nak ma fi va kuɗ kayni klasige, la li ŋalɗi nak ma muɗ dono ŋol klasige.

¹³Nak mak tuwagawa hiɗi jobna, hinsi fok kulo'o kay suɗag goy yoɗi su, nisi sa ka ŋaɓ sle ma dukalawn goyna, nisi sa hay tilla kaf di goy kay slen ma min li'e.

¹⁴Wulini nisi muɗi ki usna ma kut ŋalam goyna nala; nisi as yaw irita visi goy kutɗi, kut na'ta may ti kuta ta yi fun ɦawaɗi, may ti kuta ta san mus vuna'ta ɦawaɗi kaw.

¹⁵Nisi sa nak mak tuwag kisina ma muɗ ɗawn kaw ki kayn nala. Nisi sa nak li viyuwta hiɗi nisi hay wayata vag pana, gigekaw ma kal hay galla valamu valamu; sa ma as suɗag goy mayɗi.