Read Masana ESAYA 48 Bible Online

ESAYA 48 - Masana bible

ESAYA 48

¹Humgi slen kayni, nigi jafna vi Yakub, nigi sa semda vi Israyel ka tuni tigina, nigi sa kali goy hay niyna vi Yuda pana. Nigi sa yi va kigiya hiɗi semda vi Ma-Vatɗina, nigi sa yi semda vi Lawna vi Israyel hay vungiya, may hay bay-gasita, hay bay-ɗigerta kaw.

²Kay nisi yi semda visi hiɗi hoyok-ziy ma peldetna, nisi deŋ tuwsi tam Lawna vi Israyel ma semda valam ala Ma-Vatɗina vi vok-ma-duura.

³Nan di goy jew ɓa-ɓa kay slen ma li vokŋa, dit kayni kali goy hay vunan pa, nan da' goy hay hum sumuna. Wulini nan li slen namnawa, slen namna vunam hobawa.

⁴Nan wi ala nigi ɗeŋ ŋolo, dekdelgi ki murlaŋ ma kawayna nala. Vokgi muɗi ɗeŋe ki wayna nala.

⁵Slen kayni nan dum goy tigi hay jew pa, nan hingi humumu jew a nam co'o, kay a nigi ma di ala: Slen kayni lum mi lawayna vuma'a, va ma ceɗayna lebo va ma sli tuw sana vuma'a ma yorayna lum si numa'a, a nigi ma di naɗi.

⁶Nigi hum su? Vargi kay slen kayni kafe! May nigiya nigi as dum goyɗi su? Nan min hingi hum sle ma wulina, tun caw wulin pa, slen ma ay ŋayaya ma nigi may wumɗina.

⁷Slen namna cawam tun kayn wulini, nam may tun caw ɓa-ɓaɗi, ta-ta wulini nigi may humi va noŋɗi, kay nigi ma di ala: A'a. Numa wumi jewe a nigi ma di naɗi.

⁸Nigi may hum jew noŋɗi, nigi may wi jew noŋɗi kaw, jew pa humgi may gigiɗi, kay nan ay wigi ki sum sa di newt ŋolo nala. Kay kalaf hay sumaygi pa nisi yisi ala sa ci matna.

⁹Kuɗ semda vanu, nan vat ɦiyda van goyo; kuɗ suburta ta vuli manu, nan hot dikan gaa katgiya, kay nan ma kaagi goyɗi.

¹⁰Nan yorgiyawa hay kuta kayni may kay yaw doorotaɗi, nan wakgiyawa hay zul ma yor kawayna vi sa ma gawta.

¹¹Kuɗ semda vanu, nan min li va'a; semda van ma muɗis goy bis kay mige? Nan as vul gajijita van goy mi sa maraɗi.

¹²Nigi human hum! Nigi jafna vi Yakub! Nigi sa Israyella sa nan yigi goyna. Nanu, nan mi ma jewna, nanu mi ma cawna kaw.

¹³Ɓanu kot nagatawa, ɓan ta jufta meɗ dukalawnawa goyo: nan yisiya, nisi kaf co vok iranu.

¹⁴Nigi kaf, tokgi tuwgiya humgiya, jarsiya sa ma di goy kay slen namna mi gige? Namu ma Ma-Vatɗin minimna ma li minda valamu kat Babilon, ɓalam ma bur neke kay sa Kaldeena.

¹⁵Nanu nan daawa, nan yumiyawa; nan maramawa, lopna valam ma li'e.

¹⁶Nigiyay katan goboyo, humgiya, hay tun cawta pa, nan may law goy ŋayayɗi. Hay tun cawta vi slen pa nan aya. Wulini Bum-Sumuna Ma-Vatɗina ganawa hiɗi ŋusta valamu.

¹⁷Kayni ti dita vi Ma-Vatɗina, ma butgi goyna, Ma-Peldetna vi Israyel, nanu Ma-Vatɗina, Lawna vigiya, nan hatgi kayni kay gutgi nigiya, nan nargi hay hagata ta nigi sli haya'ta.

¹⁸Haha! Lali nigi lak laki ŋal kiliŋ kuɗ vun-ma-gatna vanu, sle'ta ɗawni ma riŋ goy katgi ki niy-lumna nala, ɗigerta vigiya ma li ki billa vi niy-lum ma ŋolla nala.

¹⁹Jafna vigi ɗawni ma muɗ haca-haca ki ŋeslna nala, gurona vigi ma muɗ dak-dak ki ŋesl-korkocona nala. Semda visi ma ka goyɗi, semda visi ma vat goy vok iranɗi.

²⁰Cukgiyay goy hay Babilon pa, pirgiyay goy jar sa Kaldeena pa hiɗi del ma siwel ŋolla, digi labar namna goyo, hinsi humumu; nigi dum goyo ta-ta hay vun-dabaŋgu'ta vi nagata. Digi goy ala: Ma-Vatɗina gus gurona vi sa ma sunda valam Yakubawa.

²¹Nagata ta soy-goyta nam ma narsi haya' ɗawni laat ma lisi noŋɗi, niy ma jar hiɗiyna nam ma munsit vunam goyo, nam ma mun hiɗiyn goyo, niyn ma jaŋ goy may.

²²Ma-Vatɗina di'e: Sum sa joona sle'ta may kisi noŋɗi.