Read Masana ESAYA 49 Bible Online

ESAYA 49 - Masana bible

ESAYA 49

¹Nigi sum sa kay jokona, humangiya, sum sa ginena, lakgi ŋal kiliŋ. Ma-Vatɗina yan kayni hay li ma nan ay kalaf hay sun pa, nam yi semda van hay vunam kayni hay li ma nan kali goy haya'na pa.

²Nam muɗan vunan fet hiwet-hiwet, ki siy kew-gaferaŋa nala, nam kusuɓanawa gaa kuɗ ŋus ma way-ɓalamna; nam muɗanawa ŋray ca ki ɓarawta ta vuna' hiwet-hiwetta nala, nam kalanawa kulo hay ŋuloŋ-ɓarawta valamu.

³Nam danawa ala: Naŋu mi ma sunda vanu, Israyel sa nan ma subur tuwan haysina.

⁴May nanu nan di ala: Nan mak tuwan kayn goy ɦawa ɗar', goy waa'a, nan vat donota van goy kayn kay sle ma waana ɦawa; may hagata gasita vanu ka vok ir Ma-Vatɗina, wurakŋa van ka vok ir Lawna vanu.

⁵Wulin kayni, Ma-Vatɗina ka lawa, nam ma inani kalaf hay suni pa, kay nan ma lin mi sa ma sunda valamu, kay hot jafna vi Yakub ay talamu, kay hot caw jafna vi Yakub sa hinin ay talamu kaw. Nan ka suburiya vok ir Ma-Vatɗina, kay Lawna vanu nam mi donota vanu.

⁶Nam di'e: Naŋ ma lin mi sa ma sunda van ɦawa'a kay sli jafna vi Yakub kulo'o tutaɗi, kay hot caw sumuna vi Israyel aya tutaɗi, may nan tunaŋawa kay naŋ ma lin mi haraŋa vi jaf-sumuna, kay su'da vanu ma ɗekis goyo ta-ta hay dabaŋ-gu'ta vi nagata.

⁷Kayni dita vi Ma-Vatɗina. Ma but sumun goyna, ma Peldetna vi Israyel, tam nisi sa irita visi muɗi bisi, nisi sa muɗi zulo'o vok jaf-sumuna, nisi sa gorvona vi sum sa ti mul kay sumuna: Vok ɗawni, hay li ma muliyan irsi cukawa kisiya, muliya nisina ma yaw kulo'o, sa yerimana kaw ma girif gaa voksiya, kuɗ Ma-Vatɗina ma dita valam hay liya'a, kuɗ Ma-Peldetna vi Israyel ma vilekgiyawa.

⁸Kayni ti dita vi Ma-Vatɗina: hay buur ma ŋaana nan hotgi ditawa, hay buura vi su'da nan gutawa kuɗgiya, nan ŋomgiya, nan tungi kayni kay nigi ma jun bonot hiɗi sumuna, kay tun nagat gaa'a, kay ɓuraw vocota ta tiy ɓuraŋga.

⁹Kay di tam sa ka hay daŋgayna ala: Cukgiyay goyo, Kay di tam nisi sa ka hay jufunda ala: Kalgiyay goyo. nisi ma ŋom farayn goy hay hagana, nisi ma fi liy ma farayn ma ti hatna kulo kay hiɗiyn kaf.

¹⁰Mayt ma cisi noŋɗi, laat ma lisi noŋɗi kaw; Zalla hiɗi fatta as lisi lasi noŋɗi, kay nam ma lisi slugotna ma tun voksiya, nan ma narsi tam niy ma riŋ-goyna.

¹¹hiɗiyna van kaf nan ma muɗum goy haga'a, hagana van kaf ma gi goyo.

¹²Nisi yaw tuɗayni, nisi ka tuɗay goy gine'e pa, nisi yawni, segena hay gal gaa'a, segena hay gal vulatiya, segena hay nagata vi Sinim.

¹³Dukalawna, ciriyaŋu, nagata, lag firiya. hiɗiyna, siwelgi dono ŋolo, kay Ma-Vatɗina teŋ-ir sumuna valamu, nam min li slugot kay sa falamna sa vun lawta.

¹⁴Siyon di'e: Ma-Vatɗina noyanawa goyo, Bum-Sumuna yalam jokanawa.

¹⁵Cata ya' as jok goor ma ci miir diga'na su? Na' may wi haw goor ma diga'naɗi su? La ya' jokom kaw, nan hayɗin yan as jokagɗi.

¹⁶Humagu, nan ɓiragawa hay way-ɓanu; gulmunna vagu ka vok iran dok-doko.

¹⁷Gurona vagu ma tok yam tuwsi gosoyo, nisi sa to nagata vag gaana, nisi sa muɗag goy hiweŋ' kaw ma cukay goy hayag pa.

¹⁸Poŋag irag goy galagu, saragu: nisi kaf ka tok tuwsiya, nisi ka hotay hayagu. Nan ka iriya, dita vi Ma-Vatɗina. Nak ma gansi hiɗi ganta ŋaata kaf, nak ma junsi katagu, ki cata darayta nala.

¹⁹Awa, ɓulakka vagu, hinta hiweŋga vagu, naga ma toy gaa kay tuwamna kaf zawni, nam ma kiɗa goyo tam sum sa hayamna; nisi sa ay tigi ɓuraŋi ma mer goy gine hiɗi nigiya.

²⁰Gurona vag sa jew kiɗay goy hayagŋa ma di ala: liyn ma nan musi hayamna damni kiɗay goy kanu; vulan liyna kay nan ma mus haya.

²¹Nala nak ma di hay dikag ala: vuɗan guro nisin kayn gige? Kay nan ay bay guro'o, nan ay getiya, nan ay kali goy gorvo'o, digiɗiy goy kay jufanu, wulsi kayn gige? Nan ay musi van kepe, hay na'ta guro nisina ay arige?

²²Ki Kayn nala Bum-Sumuna Ma-Vatɗina di'e: Humagu, nan ma sli ɓan kulo kir jaf-sumuna, nan ma pi bay-bayna van goy vok sumuna, nala nisi ma mar gurona vag gaa kuɗ glaŋatsiya, nisi ma ziy guro-boyna vag kulo pelsiya.

²³Muliyana ma kotag tina, guro-boyna vi mulda ma vulag tina, nisi ma dab voksi gaa kay nagat vokagu, nisi ma tilek butuw ma bugol segŋa, nak ma wi ala nanu mi Ma-Vatɗina, a nisi sa vi hayanu ma muɗ zulo'oɗi.

²⁴Va ma sa ma donon slumna nisi ma hot slum kalam su? Sum sa ɗigera sa yawsi gorvona ma hulot goy su?

²⁵Awa, din mi Ma-Vatɗina, yawta-gorvota vi sa ma donona ma sli goy kalamu, slen ma sa ma las sumun yawamna ma hulot goy hay ɓalamu; nan ma dur sa gawt kagŋa, nan ma suɗ gurona vag goyo.

²⁶Sum sa lasagŋa nan ma hinsi mut sliw tuwsiya, nisi ma ɦoy hiɗi busuwsiya ki vin ma wulini nala; sumun kaf ma wi ala nanu mi Ma-Vatɗina, ma su'da vagu, ma butag goyna, ma donona vi Yakub.