Read Masana ESAYA 5 Bible Online

ESAYA 5 - Masana bible

ESAYA 5

¹Wulini nan min gi nulla tam dukanna, nulla vi dukanna ma nam gum kay gulda-guldana valamna. Dukanna sine gulda-guldana valamu ay hay liy ma ɗiwna.

²Nam dilaɓ sinena, tor hiɗiyn goyo, nam pi guro gulda-gulda ŋaan gaa'a, nam in simdira kulo jaramu, nam jugoɗ koloron gaa hayam kaw. Bugolda nam ka cub ala gulda-guldan ma vuɗa, may vuɗna valamu ɓek goyo.

³May wulin kayni, nigi sum sa hay Yerusalem hiɗi nigi sum sa hay Yuda, kaagi kitat jaran nan hiɗi gulda-gulda vanu.

⁴Va ma nan hin bay lum tam gulda-gulda vanu mi mige? Hay li ma nan var ala nam ma vuɗ vuɗna ma ŋaana, nam vuɗ vuɗna ma ɓegin may kayn kay mige?

⁵Wulini nan min ɗekgiya kay va ma nan min lum tam gulda-guldana vanu yo: nan min pat zlaɓ ma talamna goyo, kay farayn ma tumu, nan min co ir zlaɓna, kay sumun ma tayam gaa kuɗ sesiya.

⁶Nan min ɓulakam goyo; sa as kotom tuwam loɗi, zumum diram loɗi kaw, zigiyna hiɗi olla ma day kulo jaramu; nan ma vul hagat tam ɗugulla, kay nam ma hin niyn si gaa kalam loɗi.

⁷Dolay kayni, gulda-guldana vi Ma-Vatɗina vi vok-ma-duura kayni si jafna vi Israyel, sine gulda-gulda ma nam minimna kayni si sumuna vi Yuda, nam gara' ti ɗigerta, may nam fa' ti gunda, nam gara' ti gasita, may nam fa' ti slugutta.

⁸Joot kay nisi sa tap ziyn tam ziyna, nisi sa tap sinen tam sinena, ta-ta liy ma ɦawa hin loɗi. Liyn ma musta hay nagat hin kayn visi nisi tuta.

⁹Kayni mi va ma Ma-Vatɗina vi vok-ma-duura ɗekem kiranu: Gasiya, ziy namna ma ŋol dak-dak lakŋi ma to goyo, ziy namna ma ŋulona ma jifiyn lakŋi sa as mus hayam loɗi.

¹⁰Sine gulda-guldana ir peke fiɗi ma kesl litir dok-vasl ɦawa; jaf-alkamare ma cukum gaa hay sinen ir goto kisna ma to goto doogo.

¹¹Joot kay sum sa fok kulo graw culum culum kay gar dolay ma galakŋa, joot kay nisi sa tulur goy hay henjeta liŋiriy hiɗi dolayna.

¹²Dil mara'a mara'a hiɗi dil ŋolla, darayna, zlekemna hiɗi vinna kaw nisi liw gijum-gijum hiɗi namu, may nisi var kay lopna vi Ma-Vatɗinɗi. Nisi may wi lopna vi ɓalamɗi.

¹³Kuɗ kayni sumuna van ma kal goy gorvo'o kuɗ bay-wida visiya, sa hay jaf-mulda mayt ma vatsi goyo, sumuna visiya laat ma vatsiya.

¹⁴Kuɗ kayni liyna vi sa mitina mal vunamawa kulo'o, nam mal vunamawa kulo ŋolo. Sa' nulona vi Siyon ma jik gaa haya, vok ma ŋolla va'a, tokŋa va'a hiɗi firita va'a.

¹⁵Sa-wurana heray gaa'a, sana yalam hotay gaa'a, sa subur-tuwsina yisi ma cok gaa'a.

¹⁶Ma-Vatɗina vi vok-ma-duura ka kulo ŋolo kuɗ ɗigerta, Lawn ma peldetna liy goy peldete kuɗ gasita.

¹⁷Fok-dimina ma ti hatna ki hatna valam nala, sum sa pulla ma yaw liy ma ɦoy gaana vi sum sa farayna.

¹⁸Joot kay nisi sa sap joota hiɗi zigew ma waana, joot kay nisi sa sap sulukŋ kuɗsiya ki san sap keken nala,

¹⁹nisi sa di ala: Hinim li koloyo, hinim li lopna valam gosoy wit' kay numa ma ɗuwumu, hin vun lopna vi ma peldetna vi Israyel co goboyo, hinim vunam hob kaw, kay numa ma wumu.

²⁰Joot kay nisi sa yi joot ala ŋaata, yi ŋaat ala joota, sa muɗ haraŋa goy jufunda, muɗ jufunda goy haraŋa, muɗ galakka goy sle'ta, muɗ sle'ta goy galakka.

²¹Joot kay nisi sa sar tuwsi ki nisi yal nala, sa ɗuw tuwsi ki nisi wi ŋolo nala.

²²Joot kay nisi sa muɗi dono ŋolo hay cita vinna, joot kay nisi sa muɗi dono'o tam kotta vi dolay ma galakŋa;

²³nisi muɗ sa ma joon ɗigere hay li ma nam vulsi va'a, sa ma gasina nisi may gut kuɗumɗi.

²⁴Kay ki sin-kuta ŋal usna nala, ki kuta ŋal hosona nala, nisi kaw so'olsi ma gaana ma buw goyo, ɓona visiya ma yak goyo ki butuwna nala, kay nisi gi gatta vi Ma-Vatɗina vi vok-ma-duurawa goyo, nisi pan yoboyna vi ma peldetna vi Israyellawa.

²⁵Kuɗ kayni ɦiyda vi Ma-Vatɗina fokawa kulo tam sumuna valamu, nam meɗ ɓalamawa goy katsiya, nam cisiyawa; hiɗiyna geɗa, tuwna vi sa mitina moli way hagana ki difir-fira nala, hiɗi kayni kaf kaw, ɦiyda valamu may vat goyɗi, ɓalam goy dok-dok meɗiya.

²⁶Nam pi bay-bayt kulo'o kay sum sa ginena, nam feɗsiya goy hay sin nagat pa, nisi co koloy wit', hefteŋ ciwer kaw.

²⁷Vo valamu, sa may makɗi, sa may tuwurɗi, sa may duŋurɗi, nam may kal senɗi, kanti ma furamna may zoɓ gaaɗi, zigew ma cin tuguruna valamu may ja goyɗi.

²⁸Ɓarawta valamu vuna' celɓete, diŋ-diŋ ɓarawta valam kaf ganiya, tirek kulumayna valamu ɗeŋ ki hiɗiyn nala, sem keke-ma-duura valamu ŋray ca ki ɦiwliŋŋa nala.

²⁹Nam ci gumu ki zlo-tancata nala, nam ci gumu ki guro-zlona nala, nam baya, nam vi muura, nam kal hiɗi namu, sa ma co kay hulotom goy mayɗi.

³⁰Hay buur namna ɗawni, suwan ma li ŋolo kay sumuna, ki suwana vi niy-lum ma ŋolla nala; nisi ma ɗuw yam nagata, may ma fa' ɗawni ti jufunda hiɗi yorta, jufunda ma kusuɓ haraŋa.