Read Masana ESAYA 50 Bible Online

ESAYA 50 - Masana bible

ESAYA 50

¹Kayni mi dita vi Ma-Vatɗina: Ɗerwelda ta ɗek ala nan gi sugiyawa goyot ka arige? Lebo sa ma nan gusgi goy hay ɓalamna ka arige? Humgiya, kuɗ joota vigiya nigi gusi goyo, kuɗ jiw-zlata vigiya nan digiɗ sugiyawa goyo.

²Nan coowa, may sa mayɗi kayn kay mige? Nan yi'e, may sa min humanɗi kayn kay mige? Ɓan ka giɗeŋ ŋolo kay but sa goy su? Donota van ka asaya kay but sa goyɗi su? Hay ɦiyda vanu, nan so niy-lum ma ŋolla goyo, niy-lumna nan muɗum goy ful ɦawa; kulufna buw goyo kay niyn may kuɗumɗi, laat ɦafam goyo kaw.

³Nan kusuɓ dukalawna hiɗi jufunda, sligar bolla nan cukum tam dukalawna ki borgona valam nala.

⁴Bum-Sumuna ma Ma-Vatɗina tun hay vunanu vunna vi sa hatayna, kay nan ma wi yal kay gut kuɗ sa maŋayna hiɗi dita; Graw culumta dok-dok nam zliyan kulo'o, nam ka gan humanu a nan ma huma ki sa hatayn nala.

⁵Bum-Sumuna Ma-Vatɗina malan humanawa goyo, may nanu, nan min ŋelem vunamɗi, nan min hot goy bugolanɗi.

⁶Nan vul ŋoranu tam nisi sa tonu, nan vul geliyanu tam nisi jan jiweran goyo; nan may ŋay iran kay nisi sa ŋulanu hiɗi nisi sa tuf nenen kirannaɗi kaw.

⁷May Bum-Sumuna Lawna gutawa kuɗanu, kuɗ na'ta kayni nan ɗuw tuwan ki ŋuliɗi, kuɗ na'ta nan muɗ iran hirliŋi ki hiɗiyn nala, kay nan wi ala nan ma muɗ goy zuloɗi.

⁸Namu ma lan ɗigere ka goboyo: Sa ma min kay ka kitat jaran hiɗi namu mi gige? La ka'a, nay vuna'a; sa ma min vi lawta gasita vanɗin gige? Hinim may kulo tan goboyo.

⁹Bum-Sumuna Ma-Vatɗina ka tuɗay gut kuɗan ɗaw; sa ma ka kitat kan ɗawn mi gige? Humgiya, nisi kaf ma jireɓ goyo ki sligar-tekkejen nala, fotna ma mutsiya.

¹⁰San jargiya ma li nar kuɗ Ma-Vatɗina, hum vun sa ma sunda valamu kaw mi gige? La san poy hay jufunda, haraŋa may hayamɗina, hin san namna vul tuwam hay ɓam Ma-Vatɗina, hinim gah tuwam tam Lawna valamu.

¹¹Humgiya, nigi kaf sa ka ŋal kuta hiɗi nigi sa gan ɓarawta ta vuna' doy hiɗi kuta, tuɗgi hay kuta vigiya hiɗi zul ma kuta, hiɗi ɓarawna ma nigi dom vunam kuna. Slen kayni maram kigi mi nanu hiɗi ɓan nanu; nigi ma bur gaa ɗawni hay zumalda.