Read Masana ESAYA 51 Bible Online

ESAYA 51 - Masana bible

ESAYA 51

¹Humgiya, nigi sa sli giɗer gasita, nigi sa gar Ma-Vatɗina, cukgi irgi kay hiɗiyna ma nigi kaay goy talamna pa, ɗuwgi zul ma wiŋŋa ma yawgi ay goy hayamna pa.

²Ɗuwgi tam Abraham bugiya, ɗuwgi tam Sara ta vuɗgita, kay hay li ma nam ay valam kepe, nan yum aya, bugolda nan gum bolo, biyam jafamu kaw.

³Ki kayn nala Ma-Vatɗina teŋ ir Siyon, nam teŋ ir liyna va' ma toy gaan kafe; fulda va'a nam muɗum ŋray ca hiɗi Edena, Ful ma karaŋŋa va'a muɗum ŋray ca ki jardeŋŋa vi Lawna nala. Cenda hiɗi firita ma co haya'a, nul ma suburta hiɗi nul ma darayna kaw.

⁴Vulan ŋalda vigiya, nigi sumuna vanu, jafna vanu, jakgi humgi tanu. Kay gatta ma kali goy hay nanu, nan ma hin kitata van riŋ goyo, kay na' ma fo haraŋa kay sumuna.

⁵Gasita van ka goboyo, su'da vanu ma vul tuwa' goyo, gilaŋanu ma ka kitat kay sumuna; jokona ma zaman ɓanu, nam ma tun vida valam hay donota vanu.

⁶Cukgi irgi kulo dukalawna, bugolda ɗuwgi gaa kay nagata, kay dukalawna ma ɦilay goyo ki nukŋa nala, nagata ma jireɓ goy ki sligara nala, sum sa haya'na ma cim goyo ki rawna nala; may su'da vanu ma mus ta-ta hay vatɗita, Ɗigerta vanu ma maŋ goyɗi.

⁷Humangiya, nigi sa wi gasita, sumuna, nigi sa gatta ka ŋomi hay dikgiya, ligi nar kay hot ma sumun hotgi yigi gaanɗi, tuwgi wirgi kay ŋul ma nisi ŋulginɗi.

⁸Kay toɓona ma tisiya ki sligara nala, tenɗen ma mutsiya ki sligar-mirisna nala; may ɗigerta vanu ma mus ta-ta, su'da vanu ma mer goy kay jaf-sumun kafe.

⁹Zliygi kulo'o, zliygi kulo'o, cukgi donot tigiya, nigi glaŋŋa vi Ma-Vatɗina, zliygi kulo'o ki hay buur ma jewna nala, ki hay liyna vi jaf-sumuna ma kalina nala. Nigi may si sa kol kay Egiptenɗi su? Nisi may si sa ci muur ma li tuw san ɦuyumna ɗisu?

¹⁰Nigiya may si sa so niy-lumna vi goloŋ ma ŋolla goyna ɗisu? Nigiya si sa gi hagata jar niy-lum ma ŋolla kay sa Bum-Sumun gussina ma jik haya'a ɗisu?

¹¹Ki kayn nala, nisi sa nam Ma-Vatɗina butsi goyna ma hotiya, nisi ma co hay Siyon hiɗi nul ma kolda, firita ta vatɗita ma tun kisi bogoraya; cenda hiɗi firita ma ŋaf tuwa'a, yorta hiɗi tiyna ma pir jaŋi.

¹²Mi nanu, mi nanu ma teŋ-irgiya, nigi si gige kay li nar kay sa ma mitna? Gurona vi Adam sa yisi ma dabna ki usn nala, nigi as li nar kisi su?

¹³Yigi as jok Ma-Vatɗina ma kotgina, nam ma meɗ dukalawn goyo, ma kot nagata kaw, nigi kalawa hay narta dok-doko hay buurta kaf, vok ɦiyda vi sa ma curoɗgina, ki hay li ma nam min ɓulak slena nala. ɦiyda vi sa ma curoɗ sumuna ka arige?

¹⁴Nam ma guɗofi gaa kuɗ jaɓna ma but goyo; nam ma mit hay zul ma wiŋŋaɗi, tin ma kiɗa goy vunamɗi kaw.

¹⁵Nanu mi Ma-Vatɗina Lawna vigiya, ma ɦiwir niy-lumna, ma ka li billa kaw. Ma-Vatɗina vi vok-ma-duura kayni ti semda vanu.

¹⁶Nan tun yoboyna vanu hay vungiya, nan bar ɓan kigiya ki ŋus nala, hay li ma nan meɗ dukalawn goyo, hay li ma nan tun dir nagata gaa'a kaw, nan di tam Siyon ala: sum sa hayagŋa si sumuna vanu.

¹⁷Zliygi kulo'o, zliygi kulo'o! Fokgi kulo'o nigi sum sa hay Yerusalemna. Nigi sa ci kaway-ma-cina vi ɦiydawa hay ɓam Ma-Vatɗina, nisi sa caawa ta-ta kaway-ma-cina vi ɓulak-yamda nigi hiɗakamawa goyo.

¹⁸Jar guro sa Yerusalem vuɗsin kaf ma tun voka' kep kaw mayɗi; jar guro sa na' wulsin kaf, ma as kay sla' kulo hay ɓalam mayɗi.

¹⁹Slen ma ma'na lakŋi coowa kigiya, sa ma as kay yorgin mi gige? Ɓuraŋŋa hiɗi ɦo-gaata, mayta hiɗi kew-gaferaŋa. Nanu mi gige kay teŋgi irgiya?

²⁰Gurona vi Yerusalem ka tuwura, ka puk goy gaa gaŋ hagan kaf, ki buɗugoora ka hiwir hay baɗayta nala, hobay hiɗi ɦiyda ŋolda vi Ma-Vatɗina, hiɗi ɦiyda vi Lawna vigiya.

²¹Kuɗ na'ta kayni humgiya, nigi sa muɗi las ŋolo, nigi sa ka ɦoyay goyo, may hiɗi vinnaɗi.

²²Kuɗ na'ta Bum-Sumuna, Ma-Vatɗina vigiya, nam ma gut kuɗ sumuna valamna ka di ala: wulini kaway-ma-cina ma ɓulakgi yigina, nan min slum goyo hay ɓigiya, kaway-ma-cina vi ɦiyda vanu, Nigi ma cum loɗi.

²³Nan ma vulum hay ɓam nisi sa ay lasgiya, nisi sa ay di tigi ala hergi gaa'a, numa min jik kulo ŋorgiya. Ŋorgi hay na'ta ay muɗi ki nagat nala, ki hagata ta sumun jik haya'ta nala. Yerusalem ma fi tun-sukka