Read Masana ESAYA 52 Bible Online

ESAYA 52 - Masana bible

ESAYA 52

¹Zliyag kulo'o, zliyag kulo'o, cukag donot tagu, Siyon. Cukag sligar ma ŋaana vagu, Yerusalem, hoyok-ziy ma peldetna. Kay sum sa bay ka gosayna hiɗi sum sa liwisna as cuk kulo hayag loɗi.

²Pog butuw ma takŋa goyo, fokag kulo'o, musag gaa'a, Yerusalem. Girag zigew ma delagŋa goyo, nak gorvota, goot-cata vi Siyon.

³Kay nigi gusis goyo hay ɓam sum sa vul va kigiɗina, nan hot gusgi ɗawni may hiɗi gurjuɗi kaw.

⁴Kay Bum-Sumuna Ma-Vatɗina ka di ala: sem ma jewna, sumuna van kal hay Egipte kay li ziy ɗawni, bugolda sum sa Asiriyana curoɗsiya bay lawta.

⁵Ma-Vatɗina di'e: wulini nan ma lum ɗawni mi mige, Hay li ma nisi yaw sumuna van goy ɦawa'a? Sa curoɗsina ka ciriya, buurta kaf semda vanu ka fi ŋulda. Din mi Ma-Vatɗina.

⁶Kuɗ na'ta sumuna vanu ma wi semda vanu; kay mige hay buur na'ta, nisi ma wi hay buur namna ala, nanu mi ma ka law ala: Nan coowa.

⁷Nisi sa kus labara ma firina sesi ma tuɗ kulo kay hiɗiyna ka jifiy tige, nisi sa kus labara vi sle'ta. Sa di sunda vi labara ma ŋaana, sa di labara vi su'da! Nisi sa di tam Siyon ala: Lawna vagu ka ti mulda.[19]

⁸Kayni mi della vi sa ŋomda vagu, nisi ka siwel delsi kulo'o, nisi kaf ka siwel siwelda vi kolda; kay hiɗi irsiya nisi ka wi Ma-Vatɗina hotay hay Siyon ɗaw.

⁹Patgi ciriy ma kolda kuɗ tuwgiya, nigi gulmunna vi Yerusalem ma ɦoy gaana, kay Ma-Vatɗina teŋ ir sumuna valamu, nam gus Yerusalem.

¹⁰Ma-Vatɗina ɗek glaŋam ma peldetnawa goyo, kir jaf-sumun kafe; sin-nagat kaf ma wi su'da vi Lawna vaya.

¹¹Tuɗgiya, tuɗgiya, cukgi goy tan pa. Tungi ɓigi tam va ma liwisɗi, cukgi goy jarsi pa, porgi tuwgi goyo, nigi sa ka ziy dowayna vi Ma-Vatɗina.

¹²Cukgi goy gosoy witɗi, yawgi jaŋɗi kaw, kay Ma-Vatɗina ka tuni vokgiya. Lawna vi Israyel ma tun bugolgiya kay ŋomgiya.

¹³Sa ma sunda van zawni, nam ma li dono'o, nam ma jik kulo'o, nam ma wul kulo'o, nam ma tun kulo ŋolo.

¹⁴Ki vok ir sumun ŋolo naŋ muɗi mi sa ma vul varta nala, ki nam may sli sanɗi nala, ki nam may sli gurona vi Adam naɗi.

¹⁵Nala kaw nam ma por jaf-sumun ŋolo, muliyana ma duk vunsi gaa'a vok iramu, kay nisi ma wi va ma sumun may visit labaramɗina, nisi ma hum kay va ma nisi humum jewɗina.