Read Masana ESAYA 53 Bible Online

ESAYA 53 - Masana bible

ESAYA 53

¹Sa ma vi kuɗ yoboy ma diy goy tuma'na mi gige? Ma-Vatɗina ɗek donota valam goy tam gige?

²Nam wul tuwam kulo vok iramu ki sa ma noyay goyna nala, ki sutay-guna ma day goy jar nagata ta karaŋga nala; jifiyta valam mayɗi, wileta valam tayɗi kaw kay a nay ma ɗuwumu, va ma talam ma ɗuw jifiy ma nem sa mayɗi.

³Sumun panamu, noyom goyo kaw, sana vi zumalda, hatay hiɗi lasta, ŋray ca ki sa ma sumun ŋay irsi vokomna nala, nam fi ŋulda, nay may ŋaɓamɗi.

⁴Gasiya, nam ziya' kayn ti lasta vaya, nam yaw tuw-tita vay kalamu, may naya, nay ɗuwumu ki mil ka talamu nala; ki Lawn watamu, hotom yalam gaa'a nala.

⁵May nisi jikimu kuɗ jiw-zlata vaya, nisi tayam gaa'a kuɗ joota vaya. Watta ta vulay toyta nig gaa'a kalamu, kuɗ mil ma talamna nay yeray goyo.

⁶Nay kaf ay viyi goyo ki fok-dimina nala, gigekaw ay sla' ti hagata valam kay tuwamu; Ma-Vatɗina gi joota vayawa gaa kalam kafe.

⁷Nisi lasamu, nisi hotom yalam gaa'a, may nam min mal vunam goyɗi, ŋray ca ki goor ɦu-dimina ma nisi min naram kay ŋatam goyo nala, ki ɦu-dimita mus humuk' vok nisi sa ka' ɗuŋusa' goyo nala; nam may mal vunam goyɗi.

⁸Nisi yawam goyo kuɗ ɦawlata hiɗi kitata, hay jafna valamu, sa ma humum gum kay nam yaway goy hay nagata vi sa irina, kuɗ ci-matta vi sumuna vanu, kuɗ milla ma co tisiya, kaw, sa ma humum gum kay kayni mi gige?

⁹Nisi jugoɗ zulla valamu jar sum sa joona, nisi pum gaa hiɗi sa farayna, may nam may li ɦawlat noŋɗi, ɗutta tay hay vunamɗi kaw.

¹⁰Van kayni kir Ma-Vatɗin ŋaa kay watam hiɗi lasta, bugol nam vul tuwam goyo kay ɗifinna vi sulukŋa vulla, nam ma wi jaf ma bugolomna, buura valam ma ɦur voko kaw, Ma-Vatɗina ma hob minda valamu hay namu.

¹¹Bugol lasta vi ciwta valamu, irsi ma hoba hiɗi wida ta nisi ma fa' kuɗumu, sa ma sunda vanu ma ɗigera ma muɗ sumun ŋolo ɗigere, nam ma yaw jiw-zlata visi kalamu.

¹²Kuɗ kayni nan ma vulum sumun ŋolo hay ir-ɓurawta valamu; nam ma ɓuraw sle ma ɓuraŋŋa hiɗi sa donona, kay nam kay tuwamu vul tuwam goy tam mitta, nam ŋaɓay jar sa joona, kay nam ziy sulukŋa vi sumun ŋolo, kay nam siɗaw kay sa li joota.[20]