Read Masana ESAYA 54 Bible Online

ESAYA 54 - Masana bible

ESAYA 54

¹Firiyagu, naku ta getayta, naku ta may vuɗ goorɗita, ciriyagu, firiyag ŋolo, naku ta wi tuw-tit noŋɗita. Kay gurona vi na'a ta noyay goyta ma muɗ ŋolo suw gurona vi na'a ta sliy-goyta, din mi Ma-Vatɗina.

²Guɗukŋa vagu nak ma vum goy buɗuku, sligar-kojolayna vi ziyna vagu nak ma zlaram goyo, reŋem kuloɗi, moɗag zigewna vag goy fiyoko, gu-ɓalla nak ma cum gaa ɗeŋe.

³Kay nak ma biya goyo hay gal jufu hiɗi gal gulu; jafna vagu ma kol kay jaf-sumuna, nisi ma hob hay hoyok-ziy ma hini goyna.

⁴Lag narɗi, kay nak ma muɗ zuloɗi; viy tuwag goyɗi, kay nisi ma muɗag zuloɗi; may yag ma jok zulota ta hay wayata vagu, humag ma gag kay zulota ta hay duhulta vag loɗi.

⁵Kay nam kotagŋa nam mi jufagu: Ma-Vatɗina vi vok-ma-duura kayni mi semda valamu; namu ma butag goyna mi Ma-Peldetna vi Israyel. Semda valam ala Lawna vi nagat kuɗulu.

⁶Kay Ma-Vatɗina ka yag lo ki cata ta ay noyay goyo, ta ŋusta va' ay vun yorta nala, san as gi cata ta nam sla' hiɗi joriyo tuwamta goy su? Din mi Lawna vagu.

⁷Ir liyn neeɗa ɦawa nan noyagawa goyo, may hiɗi slugota ŋolda vanu nan min hot vagu.

⁸Hay ɦiyda vanu nan min ŋay iran kagu ir liyn neeɗa, may hiɗi minda ta vatɗita nan ma wag hawagu, din mi ma butag goyna, Ma-Vatɗina.

⁹Van ma li ɗawni ki hay buura vi Nuwa nala: Nan yi va kan ala niyna vi Nuwa ma jaŋ goy kay nagat loɗi;[21] wulini nan yi va kanu kay nan min muɗ ɦiy katag loɗi, nan min lag joo loɗi kaw.

¹⁰La hiɗiyna wira kaw, la liyn ma jiŋiliŋŋa geɗa kaw, ŋaata-ŋolda van ta kakga as ge'ɗi, bonota vi toyta vanu as wirɗi kaw, Din mi Ma-Vatɗina ma min lag slugota.

¹¹Naku ta vun lasta, ta wati kay niy ma sina, naku ta sa ma teŋag irag mayɗita: Humagu, nan min ɗo tuw hiɗiyna vagu, nan ma tunag seg gaa hiɗi hiɗiyn Safir;

¹²dig gulmunna vagu nan ma korom hiɗi hiɗiy ma slawna, vun-galana vagu nan ma korom hiɗi hiɗiyn kristal*, hayag ma kalafn kaf nan ma korom hiɗi hiɗiy ŋaana.

¹³Gurona vag kaf ma muɗ si sa hatayna vi Ma-Vatɗina, gurona vag kaf ma muɗ faray ŋolo.

¹⁴Nak ma fi dono'o kuɗ gasita; colag goy gine'e hiɗi curo'da, kay va ma nak as li nar kalam mayɗi, nak ma muɗ ɦuyumɗi kaw, kay nam ma co kagɗi.

¹⁵La sa min duragu, kayni ma may goy hay nan paɗi, sa ma min duragŋa kaf, nam ma puk gaa'a vokag naku.

¹⁶Humgiya, nan in sa ma zli-cafna ma fo simeɗna kay veŋŋa, ma kot sle-ma-duura kuɗ minda valamu; may nan kot sa ma ɓulak slenawa kaw kay ɓulakam goyo.

¹⁷Sle-ma-duura kaf ma sumun kotom kay duragu as li va tag noŋɗi, la san gigekaw ma fokawa kulo'o kay ka kitat kagu na, nak ma vum hay kitata. Kayni ti vocota vi sa sunda vi Ma-Vatɗina, kayni ti gasita visiya ta may goy hay nan pa, dita vi Ma-Vatɗina.