Read Masana ESAYA 55 Bible Online

ESAYA 55 - Masana bible

ESAYA 55

¹Yo! Nigi kaf sa laat ka ligiya, nigiyay tam niyna. La nam ma gurju may kalam noŋɗin kaw! Nigiyaya, gusgita, tigiya, nigiyaya, gusgi vinna hiɗi miira, bay gurju'u, bay wurak va kalamu![22]

²Nigi as ŋa gurjuta vigi goyo kay va ma may mi fuɗina kay mige? Nigi as mak tuwgi kay va ma hob hay saɗina kay mige? Humangi humu, tigit mi va ma ŋaana, nala nigi ma tum mi tin ma jibetna.

³Malgi humgi goyo, nigiyay tanu, humgiya, ciwta vigi ma mus iriya; nan ma jun bonota ta vatɗita hiɗi nigiya, kayni ti bonota vi ŋaata-ŋolda tam David.

⁴Humgiya, nan tunumawa kay li di-goyta kay jaf-sumuna, sa ma tun vokŋa, ma ŋomda vi sumuna.

⁵Humgiya, nigi ma yi jaf-sumuna sa nigi wisiɗina, jaf-sum sa nigi wisiɗina ma jaŋay katgiya, kuɗ Ma-Vatɗina Lawna vigiya, kuɗ Ma-Peldetna vi Israyel ma vulgi haraŋa.

⁶Gargi Ma-Vatɗina hay li ma nam ka'a, yigi semda valam hay li ma nam ka goboyo.

⁷Hin sa ma joona noy hagata valam goyo, hin sa ma waana hin varta valam goyo kaw; hinim hot tam Ma-Vatɗina, ma min lum slugota. Hinim hot tam Lawna vaya, ma vul gid ŋolo.

⁸Kay varta vanu may ti varta vigiɗi, hagata vigiya may hagata vanɗi kaw, din mi Ma-Vatɗina.

⁹Ki dukalawna ka kulo gine'e hiɗi nagata nala, hagata van kaw ka kulo gine'e kay hagata vigiya, varta vanu ka kulo gine'e kay varta vigiya kaw.

¹⁰Ki niyna hiɗi roɗona may kulo dukalawna pa, nam hot bay ŋuruɓ yam nagatɗi, nam hot bay muɗa' ya' ŋulomɗi, hot bay day wan kuloɗi, hot bay vul jafna mi sa cuk jafnɗi, hot bay vul fun mi sa tumnaɗi kaw,

¹¹yoboyna van ma kali goy hay vunan pana nam ki kayn nala kaw: nam as hot tanu bay li vaɗi, nam as hot tanu bay hob vun varta vanɗi, nam hot tan kayni say nam hob vun va ma nan gum kalamna tuwa.

¹²Awa, nigi ma cukay goyo hay firita, nam ma tun vokgiya hay toyta; hiɗiyna hiɗi jiŋiliŋŋa ma pat ciriyn vokgiya, gu ma hay fulda kaf ma ci ɓalamu.

¹³Gu-siprena ma day hay baŋal cocona, gu-warana ma day hay baŋal gikŋa; kayni ma vul suburta tam Ma-Vatɗina, ɗekka ta dok-dokka, ta as ka goy loɗi.