Read Masana ESAYA 56 Bible Online

ESAYA 56 - Masana bible

ESAYA 56

¹Ki kayn nala Ma-Vatɗina di'e: Ligi kuɗ ɗigerta, ligi sle ma gasina, kay su'da van ka co goboyo, gasita van ka ɗek tuwa' goy goboyo.

²Sle'ta ka kay san ma li slen kayni, sle'ta ka kay goora vi Adam ma mus ɗeŋe, ma ŋom buura vi sabatna, kay muɗum goy liwisɗi, ŋom tuwamu kay slen ma joona kaf.

³Sa ma pulla ma juni tam Ma-Vatɗina hinim di ala: Ma-Vatɗina ma jan jaran goy hiɗi sumuna valamu, hinim di naɗi, sa ma patayna hinim di ala nan mi gu ma ŋileŋe, hinim di naɗi.

⁴Kay Ma-Vatɗina ka di ala: Tam sa patayna sa min ŋom buura vi sabatna vanu, nisi sa min vilek slen ma kiran ŋaana, nisi sa min lak dono'o hay bonota vanu,

⁵nan ma vulsi liyna hay ziyna vanu, hiɗi dig-gulmunna vanu kay (tun) sesi haya, ŋaa suw guro-jufayna hiɗi guro-boyna; nan ma vulsi semda ta vatɗita, ta as yaways goy kisi noŋɗi.

⁶Tam sa pulla, sa min jun tuwsi tam Ma-Vatɗina kay sunumu, kay min semda vi Ma-Vatɗina, kay muɗ si sa sunda valamu, nisi kaf sa min ŋom sabatna, kay muɗum goy liwisɗi, nisi sa min lak dono'o hay bonota vanu,

⁷nan ma narsi kulo'o kay hiɗiyta ta peldetta, nan ma lisi firiya hay ziyna van ma siɗawna; ɗifin ma ŋal-goyna visiya hiɗi ɗifinna visiya ma li kiran ŋaa'a, hay li ma ŋalam kulo kay giwin-ma-ɗifinna vanu; kay ziyna vanu nisi ma yum ala ziyna vi siɗawta kay sumun kafe.

⁸Dita vi Bum-Sumuna, Ma-Vatɗina, namu mi ma tok sa digiɗiy goyna vi Israyel, nan ma tok sara'a hiɗi sa falamna sa tokay jewna.

⁹Nigi kaf, muuriyan ma hay sinena, nigiyaya kay ti'e, nigi kaf, muuriya ma kuɗ juruta.

¹⁰Sa ŋomda visi kaf dukiya, nisi may wi va noŋɗi, nisi kaf ki durnay ma gidiŋŋa nala, as kay buw noŋɗi. Duwayt disiya, nisi bur buri gaa'a, minim mi senna.

¹¹Nisiya mi durnay ma goslna, ma wi hobtaɗina, nigi kayni si sum sa ŋom farayna sa wi kay hum noŋɗi, nisi kaf gigekaw sla' ti hagata valamu valamu, gigekaw mina' ti hagat ta nam sla'ta sla'ta.

¹²Nigiyaya, nan min gar vinna, nala nay ma ɦoyay tuway goyo hiɗi dolay ma galakŋa, nay ma li ki kayn nala grawta lo, cawam ma suw goy ŋol noŋo.