Read Masana ESAYA 57 Bible Online

ESAYA 57 - Masana bible

ESAYA 57

¹Sa ma ɗigera mit goyo, sa ma tun vaara valam kay kayni mayɗi, sa ma ŋaana mita, may sa may var ala nam mit kayni kay hulot goy vun jootaɗi.

²Nam ma kal hay sle'ta, nam ma tun suku kay va ma buura valamu, namu ma tap kuɗ hagata ta ɗigerta.

³May nigiya, nigiyay tani, gurona vi na'a ta di slen ma vokŋa, jaf ma bulona sa li tuwgi viyuwna.

⁴Nigi cen kayn kuɗ gige? Nigi mal vungi goy waɗa' kayn kat gige? Nigi tilek singi kayn kat gige? Nigi may si guro sa ŋel gatta ɗisu? Nigi may mi jaf ma hobay hiɗi sinda ɗisu?

⁵Nisi si sa ɦoyay gaa kuɗ gu-terebintena*, gaa kuɗ gu ma goɗayna kafe, nigi sa ŋat gurona hay zul-hiɗiyna hiɗi baŋana vi hiɗiyna ɗisu?

⁶Ir-ɓurawta vigiya ka jar hiɗiy ma golɓotna ma gaa hay zulla, kayni mi ir figina; nigi li ɗifin ma yam niyn goyn kayn talam namu, nigi ki ɗifin ma ŋal-goyn kayn talam namu, nan as teŋ iranu kay kayni kaf su?

⁷Nigi kot liyn ma buura vigi kayni kulo kay hiɗiy ma wuli kulo fiyokŋa, nigi ka jik kulo kalamu kay li ɗifinna vigiya kaw.

⁸Nigi col va ma gi-humda vigiya goy bugol vun-ziyna hiɗi dolla, kay goy gine hiɗi nanu, nigi fok borgon ma tigin goyo, nigi jik kulo'o, nigi kot liy ma buura vigi goy ŋolo, nisi sa nigi vi bonot hiɗi nisin ka'a, nigi min buur ma hiɗi nisina, nigi peɗsiya.

⁹Nigi gar mula kigiya kay tuɗ kat mulla, nigi gar urdina vigiya, nigi cuk sa sunda vigi goy gine'e, nigi pisi gaa'a ta-ta hay liyna vi sa mitina.

¹⁰Hay li ma nigi tuɗ ta-ta, nigi maka, may nigi di ala numa hot bugolma'aɗi. Nigi fi donota hay ɓigi neeɗa lo, nala sutaygi may to tuwaɗi.

¹¹Sa ma vulgi yorta hay dikgi kayn mi gige? Sa ma nigi li nar kalamu kay ɗutanu kayn mi gige? Kay a humgi ma gigi kanɗi kaw, kay var kanɗi kaw? Nan musi ŋal kiliŋi, hay jew ɓa-ɓa, kuɗ na'ta nigi may li nar kanɗi.

¹²Nan min li di-goyta kay gasita vigiya hiɗi lopna vigiya, nam as kay gutgi noŋɗi.

¹³Hay li ma nigi min siwela, hin jiw-zlata vigi ta suwi ŋolda butgi goyo ɗisu? Simeɗna ma dolsi kafe, biira ma yawsi goyo, may nam ma ŋay tuwamawa tanu ma yaw vocot hay nagata, nam ma kal hay hiɗiyta van ta peldetta.

¹⁴Nam ma di'e: pargi hagata, pargi hagata, kotgi hagata, yawgi sle ma ci dugumna kaf goyo hay hagata vi sumuna vanu!

¹⁵Kay, ma Kulo-Jamna, ma liyn ma musta valamu may vatɗina, ma semda valam ala peldete, nam di ala: nan mus hay liyn ma kulo jami hiɗi peldete, may nan mus kaw hiɗi sa ma vun curo'da, hiɗi sa ma ŋusta valam hoti gaa'a, kay vul donota mi sa ŋusta visi maŋay goyna, kay vul donota mi sum sa vun curo'da kaw.

¹⁶Nan min ci waya kay ta-ta dok-dokɗi, nan may ŋom ɦiyda ta-ta hay vatɗitɗi kaw, kay ŋusta hiɗi ciwta ta nan kay tuwan kota'ta ma maŋ goy vokanɗi.

¹⁷Kuɗ haramna vi goslta visiya, nan muɗi ɦiya, nan watsiya kaw, nan ŋay tuwan goyo hay ɦiyda vanu, may kuɗ ŋelda visiya, nisi sli hagata vi diksiyawa.

¹⁸Nan wi poyta visiyawa, may nan ma yersi goyo; nan ma tun voksiya, nan ma hobsi hiɗi teŋ-irta, nisiya hiɗi sum sa ka hay do'olla hiɗi nisiya.

¹⁹Nan ma tun suburta hay vunsiya, sle'ta, sle'ta kay nam ma ka goy gine'e, hiɗi nam ma ka goboyo kaw, din mi Ma-Vatɗina, nan ma yersi goyo.

²⁰May sum sa joona nisi ki niy-lumna ma ka gi pesle, ma tun gaa'aɗi nala, ki niyn ma hiwir torɓokŋa, gi kuf-kufan kulo'o kaw nala.

²¹Sa ma joona nam as fi sle'ta noŋɗi, din mi Ma-Vatɗina Lawna vanu.