Read Masana ESAYA 58 Bible Online

ESAYA 58 - Masana bible

ESAYA 58

¹Siwelaŋ hiɗi delaŋ kulo ŋolo, hot delaŋ gaaɗi, Siwelaŋ delaŋ kulo'o ki difna nala, daŋ sumuna vanu kay jiw-zlata visiya, daŋ jafna vi Yakub kay sulukŋa visiya.

²Buurta kaf nisi ka garanu, nisi min wi hagata vanu, ki sum sa ay liy sle ma gasina sa hin ɗigerta ta Lawn tuna'ta goyɗi nala. Diksi min mus goboy hiɗi Lawna.

³Laata ta numa la'ta as gutma hiɗi mige? Kay naŋ may wuma'ɗi? Hot yamda gaata as gutma hiɗi mige? Kay naŋ may jak humaŋ kay kaynɗi? Humgiya, hay buura ma nigi li laata, nigi lum mi slen ma kuɗ varta vigina. Nigi las sum sa ligi lopna.

⁴Nigi li laat kayni kay nef tuwgiya, kay cirep tuwgiya kaw, kay ci tuwgi gutgutiya kaw, hay buura vi laata, nigi may li laat ala delgi ma humis kulo'oɗi.

⁵Laata ta nan mina'ta kayni ti laata ta san hot yalam gaa hay buur kepta su? Kay her yaŋ gaa'a ki cerewna nala tuta su? Kay bur gaa'a hay sligar-bolla hiɗi butuwna tuta su? Kayni nigi as ya' ala laata lebo buur ma ŋaa vok ir Ma-Vatɗina su?

⁶Laata ta kiran ŋaata kayn ala: Nigi ma but jaɓna vi dikga-joota goyo, giragi juk ma kel sumun goyo, sum sa vun curo'da nigi butsi goyo, jukŋa kuɗ jafam kaf nigi ma kusum goyo;

⁷Ɓurawgi funa vigiya hiɗi sum sa mayt ka cisiya, sum sa hawna sa liyn ma buura visi mayɗina, nigi ma yawsi ay vo'o, la nigi wi sa goy nala'a, vulum sligar talamu, muɗ irgi goy kay sa ma ɓasukinɗi kaw.[23]

⁸Ki kayn nala yam haraŋa vigi ma day kulo'o, ki liyn ma ŋarpira nala, yerta-goyta vigiya ma day gosoyo, gasita vigiya ma tuɗ vokgiya, gajijita vi Ma-Vatɗina ma tun bugolgiya may.

⁹Ki kayn nala, nigi ma yi'e, Ma-Vatɗina ma hotgi dita, nigi ma siwela, nam ma hotgi dit ala: Nan zawni! La nigi yaw juk ma jargin goyo, hiɗi lita ta wasta, hiɗi ɓakŋa ma ɦawa ɗaara,

¹⁰la va ma dikgi minimna nigi vulum mi sa ma mayt cumna, la nigi hob hay sa ma hawna hiɗi tina, haraŋa vigi ma day kulo'o kay jufunda, jufunda vigiya ma muɗ ki falay calakka nala.

¹¹Ma-Vatɗina ma tun vokgi dok-doko, nam ma hobgi haygiya hay liyn ma koɓoron ka'a, nam ma vul donota mi gilaŋgiya. Nigi ma muɗ ki jardeŋ ma niyn kuɗumna nala, ki goloŋŋa ma niyam hiɗakɗina nala.

¹²Kuɗgi nigiya, nisi ma hot in yam-jonon kulo'o, nigi ma hot in sem-ziyna ma jaf ma kalina vum bagamis gaana; nisi ma yigi ala sum sa tos baŋana vi gulmunna, nisi sa kot hagatna, sa muɗ nagat a li ziy haya'na.

¹³La nigi ŋom segiya hay buura vi sabatna, kay li sle ma kuɗ haygina hay buura van ma peldetnaɗi, la nigi sar sabatna ki buur ma ŋaana nala, ki buur ma peldetna vi Ma-Vatɗina, ma gajijina, la nigi suburum selemu, tap kuɗ hagata vigi kay tuwgiɗi, la nigi vul tuwgi tam sle ma nigi kay tuwgi daramna, hiɗi ɓak ma waa ɗar-ɗaaraɗi,

¹⁴Hay na'ta Ma-Vatɗina ma lin mi ŋaata vigiya, nan ma nargi kulo hay liyn ma ɗiŋiriŋŋa vi nagata, nan ma hobgi haygi hiɗi vocota vi jafna vi Yakub bugiya. Kay vun Ma-Vatɗina daawa.