Read Masana ESAYA 59 Bible Online

ESAYA 59 - Masana bible

ESAYA 59

¹A'a, ɓam Ma-Vatɗina ma suɗ sumuna may muɗi giɗeŋɗi, human ma hum sumuna may muɗi nekɗi kaw.

²May mar ɓurawta jargi nigiya hiɗi sumuna vigi kayni mi sulukŋa vigiya, hinim a humgiɗi kayni mi sulukŋa vigiya kaw.

³Kay ɓigiya gesi hiɗi busuwna, cita-ɓigi hobi hiɗi joota kaw, vungi dum mi law ma sinna, vungi dum mi law ma gunina.

⁴Sa deɓ kay sa'a hiɗi hagata ta gasitɗi, sa ka kitat hiɗi hagata ɗigertaɗi; nisi tun vida visi hay sle ma mayɗina, di law ma so'olom mayɗina, nisi ziy curo'da haysi kalafi, nisi vuɗ bay-gasita may.

⁵Nisi esl sena vi makay-siwlet goyo, nisi in ziyna vi jew-jewna, sa ma mut sena visiya nam mita, la to goy kuɗ sen namna kepe, guy-ɦeŋerekŋa esl goyo.

⁶Ziy jew-jewna visiya may gut a kot sligarɗi, nisi as kusuɓ tuwsi hiɗi lopna vi ɓisiɗi; lopna visiya mi lopna vi bay-ɗigerta, lopna vi ɦawlata ka vun ɓisiya.

⁷Sesiya jaŋ tam joota, nisi li koloyo kay ɦok busuw ma bay-joota goyo, varta visiya ti varta vi bay-ɗigerta, vurumta hiɗi ɓulakka ka hay hagata visiya.

⁸Nisi may wi hagata vi toytaɗi, gasita may hay hagata visi noŋɗi kaw, nisi kot haga ma gunin kay tuwsiya, sa ma poy hayna as wi sle'ta noŋɗi.

⁹Kuɗ na'ta ɗigerta ka goy gine'e hiɗi numa'a, gasita as co tuma noŋɗi, numa cub haraŋa, may jufunda coowa, numa cub liyn ma foy goyna, may numa ka poy hay jufunda ta nilta.

¹⁰Numa ka tupa tiŋ-tiŋ' ki sum sa dukin tam tuw-ziyna nala, numa ka tupa'a ki sum sa irsi mayɗina nala; hay falayta numa ka tupa tiŋ-tiŋ' ki hay henjeta nala. La hay asta kaw numa ŋray ca ki sa mitin nala.

¹¹Numa kaf ci gorslomo ki ursena nala[24] numa ŋurnay dok-doko ki gukŋa nala, numa zam ɓam gasita, may numa fa'ɗi, numa gar su'da may na' ka goy gine' hiɗi numa'a.

¹²Kay jiw-zlata vuma'a ka ŋolo vok iraŋu, sulukŋa vuma'a li di-goyt kuma'a kaw, jiw-zlata vuma'a ka hiɗi numa'a, numa wi raw-goyta vuma'a kaw.

¹³Mat ma cina hiɗi ɗutta tam Ma-Vatɗina, calta-goyta gine'e hiɗi Lawna vuma'a, yoboy ma ɦawlana hiɗi ŋel-vunda, yoboy ma sinna ŋray ca, ŋurnayta vi dikga kaw,

¹⁴muɗi kayni, ɗigerta zuti goy bugolo, gasita kaw ka coli goy gine'e; kay gasita ka gi duwliya hay liyn ma lakŋa, ɗigerta as co goboyɗi.

¹⁵Gasita pirawa jaŋi, sa ma ja jaram goy hiɗi jootna nisi vurumumu. Ma-Vatɗina ɗuwa, nam wi kayn ala joo'o, kay gasit tay loɗi.

¹⁶Nam wi ala sa kep kaw mayɗi, nam muɗi ɦuyum' kay sa ma gut kay niram mayɗi; ki kayn nala glaŋam nam Lawna co kay gut kuɗumu, gasita valamu muɗ mi va ma nam deŋ tuwam talamna.

¹⁷Gasita cuki talamu ki marayta nala, nam tun bogorayta vi su'da kalamu, nam cuk sligar ma job-yamna talamu ki sligar-tuwna nala, nam ɗut hunayt talamu ki sligar-fiyokŋa nala.

¹⁸Nam ma vul mi gigekaw wurakŋa ma nam nagay kalamna, nam ma vul purcakka mi sa gaw kalamna, sa gaw kalamna nam ma vulsi slen ma nisi nagay a fumna, tam jokona kaw nam ma vulsi wurakŋa ma nisi nagay kalamna.

¹⁹Nisi ma li nar kuɗ Ma-Vatɗina hay gal ma vulatin pa, nisi ma li nar kay gajijita valamu hay gal ma fatta dayn pa, hay li ma sa ma gawta ma co'o ki niy-lumna ti nala, Ŋusta vi Bum-Sumuna ma digiɗimu.

²⁰Sa ma but sumun goyna ma co'o kay Siyon, kay jafna vi Yakub sa cal goyo hiɗi jiw-zlata, dita vi Ma-Vatɗina.

²¹May nanu, bonota van ta hiɗi nisit kayni, din mi Ma-Vatɗina. Ŋusta vanu ma mus kigiya, yoboyna vanu ma nan tunum vungina jaram ma ja goy hay vungi noŋɗi, jaram ma ja goy hiɗi vun gurona vi gurona vigi noŋɗi kaw, jaram ma ja goy hiɗi guro-ŋolona vigi noŋɗi. din mi Ma-Vatɗina, tun caw vaydi pa, ta-ta dok-doko.