Read Masana ESAYA 6 Bible Online

ESAYA 6 - Masana bible

ESAYA 6

¹Hay busata vi mitta vi mulla Oziyas kayni, nan wi Ma-Vatɗina musi kay zlamda-mulda ta kulo fiyok ŋolo, vun sligar-tuwna valamu hob hay Tempella.

²Sa Serafimna[4] ka lakay kulo kalamu, Serafim kep ka hiɗi glaŋat karkiya karkiya, glaŋat ma ma'na nisi bar irsi hiɗi namu, glaŋat ma ma'na nisi bar gaysi hiɗi namu, glaŋat ma ma'na nisi fok hiɗi namu may.

³Nisi siwel jar tuwsi ala: Peldete, peldete, peldet mi Ma-Vatɗina vi vok-ma-duura. Nagat kaf hobay hiɗi gajijita valamu.

⁴Vun-ziyn ma gaa vi nagatna ka wira kuɗ della vi nam ma ka siwela, hay-ziyd hob hiɗi nukŋa.

⁵Nala nan di'e: Yayya! Nan fi lawawa! Nan mitawa, kay nan mi sa ma vunan liwisi, nan musi ziy jar sum sa vunsi liwisi, may wulin kayni iran cukawa kay Mulla, Ma-Vatɗina vi vok-ma-duura.

⁶May kep jar sa Serafimna fokay katanu, ganun ka hay ɓalamu hiɗi kut ta nam yawa'ay goy kay giwin-ma-ɗifinna pa hiɗi va ma mok ganuna.

⁷Nam jon vunanu di'e: Van kayni jon vunaŋawa, joota vaŋ yaway goyo, sulukŋa vaŋ poriya.

⁸Nan hum del Ma-Vatɗina ka di ala: Nan ma gum gige? Sa ma min tuɗ hay semda van mi gige? Nan hot dit ala: Nanis zawni, ganu.

⁹Nam hot di'e: Tuɗaŋu, daŋ tam sum nisin ala: humgi dok-doko, may nigi hum caw vaɗi! Ɗuwgi dok-doko, may nigi as hat vaɗi.

¹⁰Sumun kayni naŋ ma tunsi diksi toŋoroŋo, ŋelsi humsiya, duksi irsiya kaw, kay nisi ma wi hiɗi irsiɗi, hum hiɗi humsiɗi, hum hiɗi diksiɗi kaw, kay a nisi ma hamɗi, a nisi ma fi yerta-goytaɗi kaw.

¹¹Nan hot dit ala: Ta-ta lancitige Bum-Sumuna? Nam hot dit ala: Ta-ta hay li ma hoyok-ziyn ɦo gaa'a, hin goy bay sum hayam tuwana, ta-ta hay li ma yam nagat hin goy ɦawa tuwana.

¹²Ta-ta hay li ma Ma-Vatɗina gi ir sum-wuran goy gine'e, Ta-ta hay li ma nagat hin goy ɦawa hiweŋ',

¹³La gal-ma-doogona vi sumun hin malam kaw, kut ma ŋalamu, may, ki gu-terebintena* hiɗi gu-ma'asna ma hin so'olom gaa'a hay li ma sumun kaam goyna nala, so'olsi kaw ma vuɗ jaf ma peldetna.