Read Masana ESAYA 60 Bible Online

ESAYA 60 - Masana bible

ESAYA 60

¹Fokag kulo'o, wileɗegu, kay haraŋa vag coowa. Gajijita vi Ma-Vatɗina ka fok kulo kagu.

²Kay sargi jufunda ka bar yam nagata, jufunda nilta ka bar sumuna, may Ma-Vatɗina ka fok kulo kagu, gajijita valamu ka wile kagu.

³Jaf-sumuna ma poy kuɗ haraŋa vagu, muliyana ma poy kuɗ wileta ta may goy hayag pata.

⁴Cukag irag goy galagu, sarag tige! Nisi kaf ka tok tuwsiya, nisi ka co katagu; gurona vagu ka co ay goy gine'e pa, nisi ka ziy gurona vag kuɗ baabuksiya.

⁵Hay li ma irag wisiyawa, dikag ma li ŋaa'a, dikag ma li firi cah' cah', hay li ma nisi ma muɗ ir farayn ay goy hay niy-lumna pa kay maram hayagu, hay li ma farayna vi jaf-sumuna ma co hayagu.

⁶Lamgan ŋolo ma hob hayagu, hiɗi lamgan ma fiyokŋa ma hay Madiyan hiɗi Efa; nam kaf ma may goy hay Saba pa; nam ma ziy ora hiɗi urdina, ma siwel goy kay suburta vi Ma-Vatɗina.

⁷Farayna vi Kedar ma tok tuwam kaf hayagu; fok-gamalana vi Nebayot ma hin hay ɓagu, nisi ma ɓum ɗifini kulo kay giwin-ma-ɗifinna vanu, nam ma li kiran ŋaa'a kaw, nam ma vul wileta tam ziyda vi suburta vanu.

⁸Nisi sa jaŋ kulo'o ki ɗugulla nala kayn si sarige? Nisi ma fok ki gukŋa hay ziyna valam nala kayni si sarige?

⁹Kay jokona ka zaman ɓanu, lumayna vi Tarsis ka tuni voko, kay mar gurona vag ay goy gine'e pa, hiɗi doorota visiya, hiɗi ora visiya kaw, kuɗ semda vi Ma-Vatɗina Lawna vagu, kuɗ Ma-Peldetna vi Israyel ma muɗag wile'e.

¹⁰Gurona vi sa ma pulla ma hot in gulmunna vagu, muliyana visiya ma sunagu; kay hay ɦiyda vanu nan watagawa, may hay slugota vanu nan wag hawagawa.

¹¹Vun-galana vagu ma li goy mali dok-doko, nisi ma dukum hay falaytɗi hay henjetɗi kaw, kay hin farayna vi jaf-sumuna hiɗi muliyana visiya hiɗi sum sa kuɗsina cuk kulo hayagu.

¹²Kay jaf-sumuna hiɗi muliyana sa min sungiɗina ma ba goyo, jaf-sum nisina ma mit goy kafe.

¹³Gajijita vi Libaŋ ma co hayagu, gu-siprena, gu-ziŋitna hiɗi gu-zlakzlarawna ma tap kafe, kay vul wileta tam liyn ma peldetna vanu, nan ma vul suburta tam liyn ma semda van tuni haya.

¹⁴Gurona vi sum sa curoɗagŋa ma co hot yisi gaa vokagu, nisi kaf sa ay curoɗagŋa ma girif gaa vok segu, nisi ma yag ala hoyok-ziyna vi Ma-Vatɗina, Siyonta vi Ma-Peldetna vi Israyel.

¹⁵Nak ay noyay goyo, kaay gawi, sa may jik hayagɗi kaw, may wulini nan ma muɗag firiya kay dok-doko, nan ma muɗag a nak vul firita tam jafsi voksiya voksiya.

¹⁶Nak ma ci miira vi jaf-sumuna, nak ma ci miira vi muliyana; nak ma wi ala nanu mi Ma-Vatɗina, Ma-Su'da vagu, ma butag goyna, ma donona vi Yakub.

¹⁷Nan ma mar ora hay baŋal wayna, Nan ma mar doorona hay baŋal kawayna, Nan ma mar wayna hay baŋal guna, Nan ma mar kawayna hay baŋal hiɗiyna, kay ŋomagu, nan ma mar sle'ta, kay ti mul kagu, nan ma mar gasita.

¹⁸Nisi ma hum kay ɦawlata hay nagata vag noŋɗi, ɓuraŋŋa hiɗi ɦo-gaata ma li hay jar nagata vag noŋɗi kaw, gulmunna vagu nak ma tunum selem ala su'da may, vun-galana vagu nak ma tunum selem ala suburta may.

¹⁹Fo liyn goy kag haraŋ hay falayt ɗawni may ti fatta loɗi, tilla ma vulag haraŋa valam loɗi kaw; may Ma-Vatɗina ma lin mi haraŋa vagu kay dok-doko, Lawna vagu ma lin mi wileta vagu.

²⁰Fatta vagu ma dig gaa loɗi, tilla vagu ma vi tuwam goy noŋɗi kaw; kay Ma-Vatɗina ma lin mi haraŋa vagu kay dok-doko. Buura vi do'olla vagu ma vat goyo.

²¹Hin jar sumuna vag ɗawni si sum sa ɗigera tuta, nagat ma hin dok-dok visiya, nisiya mi caw ma hin goyna ma nan pum gaana, lopna vi ɓanu, kay vul wileta van goyo.

²²Ma goor noŋŋa ma muɗ ir sumun birimi, ma ir kiɗayna ma muɗ mi jaf-sum sa dono'o. Nanu Ma-Vatɗina, slen kayni nan ma lum koloyo hay liyna valamu.