Read Masana ESAYA 61 Bible Online

ESAYA 61 - Masana bible

ESAYA 61

¹Ŋusta vi Bum-Sumuna, Ma-Vatɗina ka kanu, kay Ma-Vatɗina ɦok mulawa kanu. Nam ganawa kay tuɗ labar ma firina tam nisi sa vun hawta, kay cit milla vi nisi sa diksi goy muniya, kay kus labara vi butta-goyta tam sa yaway gorvona, kay kus labara vi butta-goyta tam sa daŋgayna.

²Kay siwel goyo kay busata ta slugota vi Ma-Vatɗina, hiɗi buura ma job yamna vi Lawna vaya; kay vul teŋ-irta mi nisi kaf sa ka ti do'olla;[25]

³kay vul mi nisi sa hay Siyon sa ka ti do'olla, kay vulsi wileta hay baŋal butuw-kuna, mula vi firita hay baŋal do'olla, sligar ma suburta hay baŋal ŋusta ta maŋay goyta, kay sumun ma yisi ala gu-terebintena* vi gasita, sinena vi Ma-Vatɗina ma nam pumu kay ɗek jifiyta valam goyo.

⁴Nisi ma in kulo'o hay baŋal liyn ma ɦoy gaa jewna, baŋal liyn ma toy gaa ɓa-ɓana nisi ma hot inim kulo'o, hoyok-ziy ma hini goy hiweŋŋa, ma to gaa'a tam jaf ma ɓa-ɓana nisi ma hot inim kulo'o.

⁵Sum sa rogoyna ma lak jargiya kay ŋom fukunayna vigiya, gurona vi sum sa rogoyna ma lin si sa zum sinena, hiɗi pi gulda-guldana vigiya.

⁶May nigiya, nisi ma yigi ala muliyan-sa-ɗifinna vi Ma-vatɗina, nisi ma di ala nigi ka sun Lawna vaya; slena vi jaf-sumuna nigi ma tumu, nigi ma cuk gajijita visi tigiya.

⁷Hay baŋal zulota vigiya nigi ma fi ŋaɓta sem ma', hay baŋal zulota-ŋolda. Nisi ma li firiya hay galla visiya; nisi ma fi galla vi nagata visiya sem ma', firita visiya ma vat goyɗi.

⁸Kay nanu, Ma-Vatɗina, nan min ɗigerta, nan ka gawi hiɗi vurumta hiɗi hagata gunita. Nan ma wuraksi lopna visi hay hagata ta hay liya'ta, nan ma jun bonota ta vatɗit hiɗi nigiya.

⁹Jafna visi ma bugolsina sumun ma wumu, gurona visiya sumun ma wisiya, nisi kaf sa wisin ɗawni, ma di ala nisiya mi lafn ma bolda vi Ma-Vatɗin ka kalamna.

¹⁰Nan ma hob hiɗi firita hay Ma-Vatɗina, Ciwta van ma hob hiɗi firita hay Lawna vanu; kay nam cuk sligara vi su'dawa tanu, nam cukan sligar-tuwna vi gasitawa tanu, ki sa ma min sli cata gan tuwam ki mul-ma-ɗifinna nala, ki cat ta sla' wulita gan tuwa' hiɗi sligara va' nala.

¹¹Hay na'ta, ki nagata day jafna va' kulo nala, ki jardeŋŋa day wal sle ma cuki gaa hayamna kulo nala, ki kayn nala kaw Bum-Sumuna Ma-Vatɗina ma day gasita hiɗi suburta kulo'o vok ir jaf-sumun kafe.