Read Masana ESAYA 62 Bible Online

ESAYA 62 - Masana bible

ESAYA 62

¹Kuɗ Siyon, nan ma ba vunan noŋɗi; kuɗ Yerusalem, nan ma tun sukan noŋɗi, ta-ta gasita muɗ wile'e ki liyn ma ŋarpita nala, ta-ta su'da muɗ tigeɗa ki sin-kuta nala.

²Jaf-sumun kaf ma wi gasita vagu; muliyan kaf ma wi gajijita vagu; nisi ma yaŋ hiɗi semda ta wuliya, semda ta Ma-Vatɗina kay tuwamu ma vileka'a.

³Nak ma lin mi bogoray ma ŋaana hay ɓam Ma-Vatɗina, nak ma lin ti jakawata ta jifiyta hay ɓam Lawna vagu.

⁴Nisi ma yak ala «ta noyay goyta» loɗi, nisi ma tun sem nagata vag ala «ta hini goy hiweŋga» loɗi; may nisi ma yag ala: «na'a mi darta vanu», nagata vagu nisi ma ya' ala: «cata sliyta», kay Ma-Vatɗina fi darta valam hayagu, nagata vagu nisi ma sla' ca'a.

⁵Ki sa ma joriyona muɗ goy juf goot-cata ta bay bur tam sa tuwa nala, gurona vag kaw ma muɗ ki jufiyag nala; ki cata darayta firi dik bana' ma dara'na nala, nak kaw ma firi dik Lawna vagu.

⁶Yerusalem, nan lak sa ŋomdawa kat gulmunna vagu, nisi as zan noŋɗi, falaytɗi, henjetɗi kaw. Nigi sa ka gi hum Ma-Vatɗina, nigi ma tun sukgi noŋɗi.

⁷Nigi hinim niy ma doy vunamɗi, ta-ta hay li ma nam tun Yerusalem gaa'a tuwa, ta-ta nam muɗa' goy suburta gaa kay nagata.

⁸Ma-Vatɗina yi va kalamu hiɗi ɓalam ta jufta, hiɗi glaŋam ma donon kaw ala: Alkamarena vigiya nan ma muɗum a ti'e mi sum sa gawt kigin loɗi, vin ma jibetna vigiya, ma nigi mak tuwgi kuɗum ŋolla, gurona vi sa ma pulla ma cum loɗi;

⁹May nisi sa tok alkamarenawana, nisi ma tumu, nisi ma subur Ma-Vatɗina, nisi sa ja gulda-guldanawana, ma ci vinna kalaf hay wur-daŋŋa vi liyna van ma peldetna.

¹⁰Jikgiya, jikgi hay vun-galana, kotgi hagata kay sumuna; pargi hagata, pargi hagata, Torgi liyn goyo, vigi bay-bayt kulo'o kay sumuna!

¹¹Humgiya, Ma-Vatɗina hin sin-nagat kaf hum kayni: Digi tam goota vi Siyon ala: Sa ma su'da ɗaw tuɗayni! Wurakŋa valam ka kuɗumu, vuɗna vi lopna valamu ka tuɗay vokomu may.

¹²Nisi ma yisi ala sum sa peldetna; Sa gusina vi Ma-Vatɗina, naku nisi ma yak ala «ta sumun gara'ta», hoyok-ziyn ma noyay goy loɗina.