Read Masana ESAYA 63 Bible Online

ESAYA 63 - Masana bible

ESAYA 63

¹Nam ma may goy hay Edom pa, hay Bosra pa, hiɗi sligar ma tuwam ɗoyna, hiɗi sligar ma wilena, col kulo hiɗi yalam tuni kulo tiriŋ', hobay hiɗi donota kaw, nam kayni mi gige? Kayni mi nanu ma ka law hiɗi gasita, mi nanu ma ka hiɗi gaŋeraŋa kay suɗ sa'a.

²Sligara vaŋ slaw keŋe kay mige? Sligar ma cuki taŋŋa ki sligara vi sa ma kesl gulda-guldan nala kay mige?

³Nan ay van kep kay kesl gulda-guldana, sa mara'a jar sumuna ay hiɗi nanɗi; nan keslsiya hay ɦiyda vanu, nan kirapsi gaa'a hay ɦiyda van ta ŋolta, busuwna visi yam goyo tam sligara vanu, sligara van kaf tuwam goɓa.

⁴Kay buura vi job-yamda ay ŋomi hay dikanu, sa nan gussina busata visi coowa.

⁵Nan ay ɗuwa, sa ma gutan mayɗi; nan hini van kepe, sa ma gut kuɗan mayɗi, May ɓan gutanawa, may ɦiyda-ŋolda vanu gutawa kuɗanu.

⁶Nan kirap sumun gaa'a hay ɦiyda vanu, nan ɦoysi goyo hay ɦiyda-ŋolda vanu, nan yamsi busuwsi goy gaa kay nagata.

⁷Nan min gi hum sumuna, kay lopna ma ŋaana vi Ma-Vatɗina, suburta vi Ma-Vatɗina, kuɗ ŋaata kaf ta Ma-Vatɗina li taya. Nan min di goyo kay ŋaata valamu ta ŋolda tam jafna vi Israyel, ŋaata ta nam li tisiya kuɗ slugota valamu, hiɗi lopna valam ma ŋaana ŋol dak-daki.

⁸Nam di'e: gasiya, nisi si sumuna vanu, gurona sa bay ɗutta, namu mi ma su'da visi jew pa.

⁹Hay li ma nisi ka vun-zlata kaf, nam may gi sa mara'a kay butsi goyɗi, butsi goyn mi nam kay tuwamu, hay minda valamu hiɗi slugota valamu, nam kay tuwamu mi ma gussina, namu mi ma gut kuɗsiya, ziysi kaw, hay buur ma jewn kaf.

¹⁰May nisi ŋel gatta, nisi muɗ ŋusta peldetta valam yora, nala nam muɗ goy mi sa ma gawt kisina, nam gi diram kay dursiya may.

¹¹Ki kayn nala sumuna valamu humsi gisi kay buur ma jewna hiɗi Musus: Numa ma hawsi ay goy hay niy-lumna pa ka arige? Hiɗi sa ma ŋomda vi farayna valamu? Namu ma tun Ŋusta-Peldetta valamu jarsiya ka arige?

¹²Hay gal ma jufna vi Musus, nam geɗ gilaŋam ma wilena, nam mun niyn goy voksi wilik', kay semda valam ma tiya ta-ta hay vatɗita.

¹³Nam ɦawsi goloŋo hay zul ma wiŋŋa, ki kulumna hay fulda nala, nisi may sli zlaraŋgaday noŋɗi.

¹⁴Ki muura ma jik gaa hay lokŋa nala, ŋusta vi Ma-Vatɗina kalsiyawa hay tun-sukka, ki kayn nala kaw naŋ tunawa vok sumuna vaŋu, kay semda vaŋu ma tiya hiɗi gajijita.

¹⁵Kulo hay wuralawna pa, ɗuwaŋu, goy hay ziyna vaŋ ma peldetna ma gajijina pa, hunayta vaŋu hiɗi musta jigerta vaŋu muɗ muɗtige? Gulaŋ ma ɓiraŋ jititna hiɗi slugota vaŋu, naŋ telemawa goy kan su?

¹⁶Buma'a kayni mi naŋu, buma'a Abraham may wuma' noŋɗi, Israyel kaw numa may kiram noŋɗi. May naŋu, Ma-Vatɗina, naŋ mi buma'a, naŋu mi ma hay vatɗita pa yaŋ ala ma butma goyna.

¹⁷Ma-Vatɗina, Naŋ calma goy gine'e hiɗi hagata vaŋu kay mige? Naŋ muɗma dikma ɗeŋe, kay numa ma li nar kuɗaŋɗi kayn kay mige? Hotaŋiya, kuɗ sa sunda vaŋu, kuɗ jafna vi vocota vaŋu.

¹⁸Sumuna vaŋ sa peldetna sli nagat kayn ir liyn neeɗa ɦawa; sa gaw kuma'na tay liyna vaŋ ma peldetn gaa'a.

¹⁹Numa jew ɓa-ɓa ki sum sa naŋ may ti mul kisiɗi nala, ki sum sa semda vaŋ may yiy tisiɗi nala. Haha! Lali naŋ haw dukalawn goyo kay jikay gaa'a klasige! Hiɗiyn ɗawni ma geɗ vokaŋu.