Read Masana ESAYA 64 Bible Online

ESAYA 64 - Masana bible

ESAYA 64

¹Ki kuta ŋal gu ma soyna nala, ki kuta wizik niyna nala, sa gawt kaŋŋa ma wi semda vaŋu, jaf-sumuna tuwsi as visi bat-bat' vok iraŋu.

²Hay li ma naŋ li slen ma ɦuyumna ma numa may cubumɗina, naŋ jikay gaa'a, hiɗiyn geɗ vokaŋu.

³La Lawn mara'a ka'a, li ki naŋ nala tam nisi sa zamam ɓalamna ni, numa bay hum kayni tuwa, bay wi kayni hiɗi irma'a kaw.

⁴Sum sa li gasita hiɗi diksi firiya, naŋ tuɗ kay ŋafsi irsiya, nisi sa gi hum sumuna kay hagata vaŋu, sa hay liyn kaf numa fi su'da kuɗsiya, may naŋ muɗ ɦiya kay numa li suluku.

⁵Numa kaf muɗi ki va ma liwisi nala, lopna vuma ma gasin kaf muɗi ki sligar ma gesayn nala, numa kaf soy goy himoŋ' ki hum guna nala, joota vuma'a ka dolma'a ki simeɗna nala.

⁶Sa ma yi semda vaŋu kep kaw may noŋɗi, sa ma zliy kulo'o kay jun tuwam taŋu may noŋɗi, kay naŋ ŋay iraŋawa kuma'a, naŋ hinmaawa cuk goy gaa'a kuɗ joota vuma'a.

⁷May hiɗi kayni kaf, Ma-Vatɗina, naŋu mi buma'a, numa mi naga-dirginna, naŋu mi sa ma inma'na. Numa kaf mi lopna vi cita-ɓaŋu.

⁸Ma-Vatɗina, naŋ ma muɗ ɦiy suw asɗi, humaŋ ma gaŋ kay joot dok-dokɗi kaw; ɗuwaŋ tige, numa kaf kayn si sumuna vaŋu.

⁹hoyok-ziyna vaŋ ma peldetna muɗi goy ful ɦawa; Siyon kaw hini goy ful ɦawa, Yerusalem kaw muɗi goy hiweŋ'.

¹⁰Tempella vuma ma peldetna ma jifiyna, ma sumayna ay suburaŋ hayamna; wulini kut mutumawa goy kirap', slen ma ŋaana vuma ma hayamna kaf toy gaa'a.

¹¹Ma-Vatɗina, vok slen kayni kaf naŋ as mus kiliŋ su? Naŋ as mus hiɗi vunaŋ dukiya, kay sumuna ma hotma yuma gaa ta-ta su?