Read Masana ESAYA 65 Bible Online

ESAYA 65 - Masana bible

ESAYA 65

¹Sum sa asay a jobanɗina nan hin tuwanawa a nisi jobanu, sum sa may garanɗina nan hin tuwanawa a nisi fanu, nisi sa garanɗina, nan di tisi ala: Nan zawni, nan zawni tam jaf-sum sa semda van may tuni tisiɗina.

²Nan meɗ ɓanawa goyo hay buurta kaf tam jaf-sum sa yisi ɗeŋe, sa poy hay hagata joota kuɗ varta visiya,

³tam sum sa ɓulakan dikan dok-doko, li ɗifin goy hay jardeŋŋa, ŋal urdin kulo kay direŋgella;

⁴Lak hay zulla vi sa mitina, bur henjet hay zul-hiɗiyna, mut sliw bagumna, lak tin ma liwisna hay ŋalayna visiya.

⁵Nisi sa di ala: Vigi tuwgi goyo, nigiyay tan goboyɗi, kay nan peldete vok irgiya kaf, kayni mi nukŋa ma hay cinan ɦawa, ti kuta ta ŋal hay buur kafta.

⁶Kayni mi slen ma ka ɗoy vok iranu, nan as ba vunan noŋɗi, nan ma gi dir lawta, awa, nan ma gi dir lawta visi goyo.

⁷Ma-Vatɗina di'e: Joota vigiya hiɗi joota vi sumaygiya, nisi sa ŋal urdin kulo kay hiɗiyna, sa muɗan zulo'o kulo kay liy ma jiŋiliŋŋa; lopna visi ma nisi lum jewna nan ma gum diram goy kafe.

⁸Ma-Vatɗina ka di ala: hay li ma niy ka hay vuɗ gulda-gulda ma sorina, nisi di ala: Jam goyɗi, kay bolda ka hayamu. Nan kaw ma li ki kayn nala kuɗ sa sunda vanu, kay ɓulaksi goy kafɗi.

⁹Nan ma kal jafna ay goy hay Yakub pa, mul hiɗiyna vanu nan ma kalam ay goy hay Yuda pa; sa vilekayna vanu ma lak kay hiɗiyta; sa sunda vanu ma lak haya.

¹⁰Fukunayna ma ti hatna valamu hay fulda vi Saron, luwayna ma mol gaa'a hay lokŋa vi Akor, kay sumuna vanu sa min garanu.

¹¹May nigiya, sa noygi Ma-Vatɗin goyo, sa yigi jok hiɗiyta van ta peldetta, nigi sa tun tablena goyo kay Gad, nigi sa hob kaway-ma-cina kay Meni,[26]

¹²Nan min nargi tam kew-gaferaŋa, nigi kaf ma guɗof gaa'a kay ŋatgi goyo; kay nan yi'e, may nigi min hot ditɗi, nan lawa, may nigi min humɗi; may nigi li slen ma joona vok iranu, nigi vilekem mi slen ma cuk kuɗ hayanɗina.

¹³Kuɗ na'ta Bum-Sumuna Ma-Vatɗina ka di ala: Wulini sa sunda vanu ma ti'e, may nigiya mayt ma cigiya; wulini sa sunda vanu ma ci'e, may nigiya laat ma ligiya; wulini sa sunda vanu ma li firiya, may nigi ma li zulo'o;

¹⁴Wulini sa sunda vanu ma li firi hay diksi ŋolo, may nigiya, nigi ma ciriya hay zumalda vi dikgiya, nigi ma yor tuwgiya, sutaygi ma to'o.

¹⁵Semda vigi hin ɗawni, mi va ma sa vilekayna vanu beɗ tuwsi hiɗi na'a (ala), hin Bum-Sumuna Ma-Vatɗina caŋ goyo (ki vane nala). May sa sunda valamu nam ma vulsi semda tara'a.

¹⁶Nam ma min fi bolda hay nagata, min a fa' ɗawni kuɗ Lawna vi gasita, nam ma min yi va kalamu hay nagata, yi va kalam ɗawni kuɗ dikga gasita; kay lasta ta kal jewta yam sumun ma joka'a, na' ma ŋay goyo vok iranu.

¹⁷Kay nan min in dukalawna ma wulina hiɗi nagata ta wulita; hum sa as gum kay slen ma li jewna loɗi, nam as kay kal hay varta vi san noŋɗi.

¹⁸Ligi firi hay! Lakgi dok-dok hay firit ŋolo, kuɗ slen ma nan kotomna; kay nan kot Yerusalem kay firita ŋolda, nan kot sumuna va'a kay firita.

¹⁹Yerusalem ma lin ti firita ŋolda vanu, sumuna va'a ma lin si firita vanu; nisi ma hum winekŋa vi tiyna hiɗi winekŋa vi ciriyna loɗi.

²⁰Ɗawni gurosgurayna ma li buur neeɗa ɦawaɗi, ɗawni sum sa maariyana sa hob vun busata visiɗina ma li loɗi; la sa mitawa hiɗi busat kisi, kayn di ala nam mit kayn joriyo tuwa. Sa ma li sulukawa, la nam mitawa hay busata kista ni, kayn di ala kuɗ be'da.

²¹Nisi ma in ziyna, ma lak hayamu; nisi ma pi gu ma tina, ma tum vuɗamu kaw.

²²Nisi ma in ziya kay sa mara hiɗi hayam loɗi, nisi ma zum sinena kay sa mara ti wan ma hayamna loɗi, kay buura vi sumuna vanu ma li ɗawn ki buura vi gun nala, sa vilekayna vanu ma li firiya hiɗi lopna vi ɓisiya.

²³Nisi ma mak tuwsi goy waaɗi, nisi ma vuɗ guro sa wirsi tuwsin loɗi, kay nisi ma lin mi jaf ma bolda kalamna vi Ma-Vatɗina, gurona visiya ma lak hiɗi nisiya.

²⁴Nan ma hotsi dita jew a nisi yi semda vanu, nan ma humsiya hay li ma nisi ka law tuwa.

²⁵Keŋŋa hiɗi goor ɦu dimina ma ti hat hay liy kep, zlona ma tum mi hati ki putna nala, guyna ma tum mi naga'a. Kulo hay hiɗiyta van ta peldetta ɗawni, va ma joo as li loɗi, va as ɓulak loɗi kaw. Din mi Ma-Vatɗina.[27]