Read Masana ESAYA 66 Bible Online

ESAYA 66 - Masana bible

ESAYA 66

¹Ma-Vatɗina di'e: wuralawna mi zlamda-mulda vanu, nagata mi va ma nan tun sen kalamna. Nigi as inanti mi ziy mige? Liy ma nan tun suk hayna mi liy mige?

²Slen kayni kaf ɓan kotomawa, maram hay nagat mi nanu. Dita vi Ma-Vatɗina. Kayni mi sa ma nan cuk iran kalamna: Sa ma maŋayna ma sutiyam toyna, ma tuwam wirim kay yoboyna vanu.

³Sa ma li putn ɗifini, ci sana kaw, sa ma li ɗifin hiɗi goor ɦu-dimina, ci diyn goyo kaw, sa ma mar vulda, ɦok busuw bagumna goyo kaw, sa ma kot va ma ŋal urdi ma no'osna, girif lawayn waana; nisi kaf kayni li firi hay poyta visiya, diksi firiya hay liwista visiya.

⁴Nan kaw, nan min vilek ɓulak-goyta visiya, va ma nisi li nar kalamna nan ma maram kisiya, kay nan yi'e, may sa min humanɗi, nan lawa, may nisi min humɗi, nisi li slen ma joona vok iran ŋolo, nisi li firiya hay slen ma nan minimɗina.

⁵Humgi yoboyna vi Ma-Vatɗina, nigi sa tuwgi wirgi kuɗ yoboyna valamu. Kayni mi va ma ɓosiyogin dumna, nisi sa ka gaw kigiya, zutgi goyo kaw kuɗ semda vanu: Hin Ma-Vatɗina ɗek gajijita valam goyo, kay numa ma wi firita vigiya. May lak hay zulot ɗawn si nisiya.

⁶Del ma sawalla ka kali goy hay hoyok-ziyna pa, della ka kali goy hay Tempella pa. Kayni mi della vi Ma-Vatɗina, ma vul wurakŋa mi sa gawt kalamna.

⁷Jew a tuw-tit fa' kayni, na' pukawa de'; jew a makka fa' kayni, na' vuɗ goor ma jufawa de'.

⁸Sa ma hum labara ki kayn nala mi gige? Sa ma wi sle ma ki kayn nala gige? Nagata as vuɗ hay buur kep su? Jaf-sumuna as vuɗ hay fat kep de su? Jew a tuw-tita vi pukka va' kayni, Siyon vuɗ goorawa de'.

⁹Ma-Vatɗina di'e: Nan as mal vun ziy-goor goyo, may nan tel cat a vuɗi su? Vuɗ goor goy mi nanu, may nan as telem a vuɗ goyɗi su? Din mi Lawna vigiya.

¹⁰Ligi firiya hiɗi Yerusalem, nigi muɗa' ti firita vigi ta ŋolda, nigi kaf sa mina'a; firigi ŋolo hiɗi na'a, nigi kaf sa ka ti do'ol ka'a,

¹¹Kay nigi ma ci miira va' ma teŋgi irgina, hoba kaw, kay nigi ma jugo jibetta vi gajijita va' ta suwi ŋolda.

¹²Kay Ma-Vatɗina di ala: nan min gi ir toyt kata'a ki niy-lumna nala, nan min gi ir gajijita vi jaf-sumun kata'a, ki niy-ɓatna ma sulur goyo nala, nigi ma ci miira, nisi ma ziygi kulo gilaŋsiya, ma koɗgi gaa ɓalsiya kaw.

¹³Ki sumda teŋ ir goora va' nala, nan kaw nan ma teŋgi irgiya; nigi ma fi teŋ-irta hay Yerusalem.

¹⁴Nigi ma wumu, dikgi ma li firiya, zokŋa vigiya ma hot iriya ki usna nala, Ma-Vatɗina ma ɗek donota valam goyo tam sa sunda valamu, nam ma ɗek ɦiyda valam goyo tam sa gawt kalamna.

¹⁵Kay ɗuwgi Ma-Vatɗina, nam ka co jar kuta, keke-ma-duura valamu ka ki ɦiwliŋŋa nala, kay hob vun ziyda valamu hiɗi dono'o, kay hob vun bayta valamu hiɗi sin-kuta ta tilekka.

¹⁶Ma-Vatɗina ka kitata valamu hiɗi kuta, nam ka kitat kay sumun kaf kayni hiɗi kew-gaferaŋa valamu; sum sa mit vun ɓam Ma-Vatɗina ka ŋolo.

¹⁷Nisi sa li tuwsi peldete, por tuwsi goy kaw kay tuɗ goy hay jardeŋŋa, tun bugol sa ma tuni voksina, nisi sa mut sliw bagumna, sle ma liwisna ki kulomna nala, nisin kayni kaf ma ba goyo. Dita vi Ma-Vatɗina.

¹⁸Nanu, nan wi lopna visiya hiɗi varta visiya. Liyn coowa kay tok jaf-sumuna hiɗi vunna kafe; nisi ma co'o, ma wi gajijita vanu.

¹⁹Nan ma tun ɗekka jarsiya, caw sumuna visi sa hin goyna, nan ma cuksi goy jar jaf-sumuna, hay Tarsis, hay Pul, hay Lud kaw. Sa gi ɓarawta hay Tubal hiɗi Yavan, tam jokona ma ginena, ma bay hum labara kan tuwa; nisi sa bay wi gajijita vanu; nisi ma ɗi goy kay gajijita vanu jar jaf-sumuna.

²⁰Ɓosiyogina sa ka goy jar jaf-sumuna kafna, nisi ma marsiya kay vulsi goy tam Ma-Vatɗina, nisi ma ɓesiyay kay kulumayna, kay keke-ma-duura, kay saretna ma yalam kuluɓina, kay kulumay-kurona hiɗi lamgana, kay marsi hay Yerusalem, din mi Ma-Vatɗina, ki gurona vi Israyel mar vulda visiya hay dowayta ta bay-gesta, kay ziyda vi Ma-Vatɗina nala.

²¹Jarsiya nan ma yaw muliyan-sa-ɗifinna hiɗi sa Levitna kaw, din mi Ma-Vatɗina.

²²Kay na'ta, ki dukalawna ma wulina hiɗi nagata wulita, ma nan kotomna ma lak vok iran dok-doko, jafna vigiya hiɗi semda vigiya ma mus vok iran dok-doko kaw. dita vi Ma-Vatɗina.

²³Til ma wulina lo, til ma wulina lo, Sabatna lo, sabatna lo, sumun kaf ma co girif gaa vokanu, din mi Ma-Vatɗina.

²⁴Hay li ma sumun ma cuk goyo, irsi ma wi tuw ma mitina vi sum sa ŋelan vunanna; kay jufulla visi ma mitɗi, kuta visiya ma tew goyɗi, nisi ma muɗ liwisi kir sumun kafe.