Read Masana ESAYA 7 Bible Online

ESAYA 7 - Masana bible

ESAYA 7

¹Hay liyna vi Ahaz goora vi Yotam, goora vi Oziyas mulla vi Yuda, Retsin mulla vi Siriya kali li duura hiɗi Peka, goora vi Remaliya mulla vi Israyel. Nam kali kay mok Yerusalem, may nam as a dura'ɗi.

²Nisi vul labar namna mi jafna vi David ala: Sum sa Siriyana vokŋa visi ka tuni hay Efrayim. Ahaz hiɗi sumuna valamu diksi tun caw visi bat-bat' ki gu ma jar juruna simeɗn vum tuwam bat-bat' nala.

³Ki kayn nala Ma-Vatɗina di tam Esaya: kalaŋay goyo kay ŋaf ir Ahaz, naŋu hiɗi Seyar-Yakub goora vaŋu. Goy sin lamna vi goloŋ ma ŋolla. Hay hagata vi sinena vi sum sa muz sligara.

⁴Naŋ ma di talam ala: Musaŋ kiliŋ, laŋ nar noŋɗi, gu-kuɓulusna ma ma'na ma ŋal nukŋ lakŋi, hin dikaŋ ɓiraŋ vokom noŋɗi. hin dikaŋ ɓiraŋ vok ɦiyda vi Retsin hiɗi Siriyaɗi, hin dikaŋ ɓiraŋ kay gurona vi Remaliyaɗi.

⁵Kay mige Siriya ka var kay laŋ joo'o, hiɗi Efrayim hiɗi goora vi Remaliya, nisi ka di ala:

⁶Tuɗay duray Yuda, nay ma gi narta kay hoyok-ziyna, nay ma to hoyok-ziyn gaa'a, ta-ta sum sa hayamna nay ma yawsi kafe, bugolda nay ma tun mul kulo hay hoyok-ziy namna, kayni mi goora vi Tabeel.

⁷Kayni ti dita vi Bum-Sumuna, Ma-Vatɗina: Van kayni as liɗi, van kayni ma co noŋɗi.

⁸Kay Damas kayni yamda vi Siriya, Retsin kayni mi yamda vi Damas may. Hini busat dok-karkiya yam vasl, Efrayim ma to gaa'a, nisi ma muɗ mi jaf loɗi.

⁹Samariya kayni ti yamda vi Efrayim, goora vi Remaliya kayni mi yamda vi Samariya. La nigi may col ɗeŋe hay vida vigiɗi, nigi ma hulot goyɗi kaw.

¹⁰Ma-Vatɗina law tam Ahaz lo ala:

¹¹Jobaŋ tam Ma-Vatɗina Lawna vaŋu, kay nam ma vulaŋ ɗekka kepe, la hay liy ma gaana lebo la hay liy ma Kulo-Jamna kaw, naŋ ma jobomu.

¹²Ahaz hot dita: nan may jobɗi, nan min wak Ma-Vatɗina vanɗi.

¹³Nala Esaya di'e: Nigi jafna vi David, humgi tige: To ma nigi to sutay sumun kayn may asgiɗi, nigi joki to sutay Lawn lo kay mige?

¹⁴Kuɗ kayni Ma-Vatɗina kay tuwamu ma vulgi ɗekka, ɗuwgiya goot-cata ma sli haya, na' ma vuɗ goor kepe, ma tunum semda valam ala Emmanuel.[5]

¹⁵Nam ma tum mi mul miira hiɗi yumda, ta-ta hay li ma nam wi kay noy sle ma joon goyo, kay vilek sle ma ŋaana.

¹⁶May jew a goor wi kay noy sle ma joon goyo, vilek sle ma ŋaan kaw kayni, nagata vi muliyan nisi sa ma'na sa ka laŋ tuwaŋ nari ma noyis goyo,

¹⁷May kaŋ naŋ mulla vi Siriya, kay sumuna vaŋu hiɗi mulda vaŋu, Ma-Vatɗina ma mar buura ma sa bay wum iram tuwa, tun caw tam buura ma Efrayim cal goy hiɗi Yuda pa,

¹⁸hay buur namna ɗawni, raw-rawna ma ka goy vun niy-lumna Nil pana, Ma-Vatɗina ma biwimiya, yumna ma ka hay Asiriya nam ma biwimiya kaw;

¹⁹Nam ma co'o, nam ma dak gaa hay lokŋa vi fulda, hay beɗna vi hiɗiyna, Nam ma mol kulo kay gu-zigiyna kaf, Nam ma mol kay hatna vi farayn kaf.

²⁰Hay buur namna ɗawni, Ma-Vatɗina ma job kew-belet ay goy bugol niy-lumna pa, hiɗi mulla vi Asiriya, kay wel yamda hiɗi ɗuŋusna goy hiɗi na'a, nam ma wel jiwera goy kaw.

²¹Hay buur namna ɗawni, sa kep ma ŋom put kep, ŋom fok ma' lay;

²²Miira ma li ŋolo ta-ta sumun ma muɗ tum mi yam mula, kay sumun ma muɗ tum ɗawn mi mul-miira, kay san gigekaw ma hin hay nagata ma tum ɗawni mi mul miira hiɗi yumna.

²³Hay buur namna, ma muɗ ɗawni, liyn ma sem gulda-gulda ka piy hayam birimi, ti gurjut ir sikel birim kep kaw, ma vulis goy hay ɓam zigiy-olla hiɗi gu-zigiyna.

²⁴Sumun ma cuk kulo hayamu hiɗi barawna, hiɗi diŋ-diŋ ɓarawta kaw, kay hin hay nagat ɗawni mi zigiy-olla hiɗi gu-zigiyna.

²⁵Yam-hiɗiyna ma sumun dilaɓam hiɗi ɗugumna, sa as jik kulo kalam loɗi, kuɗ narta kay zigiy-olla hiɗi gu-zigiyna: luwayna sumun ma cukum kulo hayamu, fok-dimin ma tayam gaa'a.