Read Masana ESAYA 8 Bible Online

ESAYA 8 - Masana bible

ESAYA 8

¹Ma-Vatɗina di tanu: Slaŋ table ma ŋolla kepe, naŋ ma ɗo hayamu a jaŋga valam ma li goy haraŋi. Naŋ ma ɗo ala: Tigi ɓuraŋ koloyo, vurumgi slen koloyo.

²Nan yaw sum sa di-goyna ma' sa san as vi haysiya: Uriyas mul-ma-ɗifinna, hiɗi Zakariya goora vi Yeberekiya.

³Nan bur tam cata-jobta, na' vi haya, vuɗ goor kep. Ma-Vatɗina di tanu: Nan ma tunum selem ala: Maher-Salal-Haz-Baz.[6]

⁴Kay jew a goor muɗ yi sumiyam ala: Baba! Aya! Kayni, farayna vi Damas hiɗi sle ma hay Samariya nisi ma naram vok mulla vi Asiriya.

⁵Ma-Vatɗina law tan lo, ka di tan ala:

⁶Kay niy ma hay Silowe ma jaŋ hiɗi ŋalla sumun kayni ɗuwum birek-ceke, kay nisi li firi kuɗ Retsin hiɗi goora vi Remaliya,

⁷Kuɗ na'ta kayni niy ma ŋolla hiɗi ma donona vi niy-lumna, Bum-Sumuna min hinim de kulo katsiya, kat mulla vi Asiriya hiɗi gajijita valam kafe, niy-lumna ma sulur kulo kay va ma buura valamu, ma kulfut goy kay deŋella kafe;

⁸Niy-lumna ma muɗ iram kir Yuda, nam ma de'e, ma kulfut goyo kaw, nam ma de'e ta-ta kulo kel sana, ɓam niyn ma kus goyna ma hob yam nagata vaŋu, naŋ Emmanuel.

⁹Patgi ciriyna, nigi sumuna, nigi ma fi lasta, jakgi humgiya, nigi kaf, hay sin-nagat kaf, nigi sa hay sin-nagat ma ginen kafe, kotgi tuwgi kay duura, nigi ma fi lasta.

¹⁰Vargi kay kot va'a, may va namna ma liɗi, digi yoboy kepe, may yoboy namna as a liɗi, kay Lawna ka hiɗi numa'a.

¹¹Kay Ma-Vatɗina di tan ala: hay li ma nam vanawa hiɗi ɓalamu, hay li ma nam ɗekanawa ala: nan poy hay hagata vi sum nisinɗi:

¹²Va ma sum segen yum ala fok-lawta nigi ma yum fok-lawta loɗi, nigi ma li nar kay sle ma nisi li nar kalamna noŋɗi, tuwgi as wirgi kisi noŋɗi.

¹³Nigi ma lum peldet mi Ma-Vatɗina vi vok-ma-duura, nigi ma li nar kayn kalam namu, tuwgi ma wirgi kayn kalam namu.

¹⁴Nala nam ma muɗ mi liyn ma peldetna, mi hiɗiyna ma mar joot kigiya kaw, hiɗiyna ma dab semna, kay ziy ma ma'na vi Israyel, namu mi dena hiɗi jawta, kay sum sa hay Yerusalem.

¹⁵Sumun ŋolo ma puk gaa kalamu; nisi ma puk gaa'a, ma cap kusa kaw, jawt ma visiya, sumun ma yawsiya kaw.

¹⁶Pekaŋ di-goyt na'ta kayni hay way-ɓaŋu, kuluɓaŋ yam ŋayayta na'ta ta ɗeki goyt kayni jar sa hatayna vanu.

¹⁷Nan ka zam ɓam Ma-Vatɗina, nam ma ŋay iramu kay jafna vi Yakub, nan tun vida van hayamu.

¹⁸Nan zawni hiɗi gurona sa Ma-Vatɗina vulanu, numa lakŋi si sa ɗek goy kay sle ma vokŋa hay Israyel, cukma mi Ma-Vatɗina vi vok-ma-duura, nam ma ka musi kay hiɗiyta vi Siyon.

¹⁹La nisi di tigi ala: Jobgi kuɗ sum sa yi sem sa mitin vunsina, jobgi kuɗ sum sa di sle ma voksina, sa law hoso-hosona hiɗi sa ŋurnayna ni, san as job Lawna valamɗi, may nam job kuɗ sa mitina kay sa irina kay mige?

²⁰La nigi may di ala lay kuɗ gatta hiɗi di-goyta naɗi ni, liy ma ŋarpita ir sumun ma wum noŋɗi.

²¹Nisi ma ŋuy nagat hiɗi sutaysi toya, hiɗi mayta kaw, nisi ɗawni ma muɗ ɦiya, nisi ma ŋul mulla visiya hiɗi Lawna visiya, nisi ma ɗuw irsi kulo'o.

²²Bugolda nam ma ɗuw gaa kay nagata, nam fa' kayni ti zlata, jufunda hiɗi yorta ŋolda. Nam ma zutis goy hay jufunda ta nilta.

²³May nagata ta yorta ka haya' wulinta jufunda ma ti mul haya' ta-taɗi. La hay liyn ma jewna nagata vi Zabulon hiɗi nagata vi Neftali ay hobi hiɗi zulota, liyn ma vokŋ ɗawni nam ma vul gajijita mi hagata vi niy-lum ma ŋolla, goy bugol Yordan, hay nagata vi jaf-sumuna.