Read Masana ESAYA 9 Bible Online

ESAYA 9 - Masana bible

ESAYA 9

¹Sum sa poy hay jufunda wi haraŋ ma ŋolla; nisi sa li ziy hay nagata vi ŋus-mitta haraŋa ka wile kisiya.

²Naŋ muɗ jaf-sumun ŋol dak-daki, naŋ ɓurawsi firita, jaf-sumuna ka firi vokaŋu ki firita hay buur ma feɗna nala, ki sumun ciriy hiɗi firita, hay buur ma ɓuraw sle ma tum ɓuraŋŋa nala.

³Kay juk ma nekŋa ma tuni pelsina, zugulla ma tosi ŋorsi hiɗi namna, hiɗi libet ma watsi kuɗsi hiɗi namna pet, naŋ kusumawa goyo ki hay fatta vi Madiyan nala.

⁴Kay tugurun kaf ma nisi cukumu kay selem tiy gaa vi nagat rim-rimna, sligar ma ɗuti hay busuwn kaf, ŋaata valam kayni kay ŋalam goyo tuta, nam muɗi mi tina vi kuta.

⁵Kay nam vuɗay goorawa kepe, nam vulay goorawa kepe, mulda vulawa hay ɓalamu, nisi ma yum ala Ma-jifiyna, Ma-Vul-Gatta, Lawn ma donona, Bumna Ma-Vatɗina, Mulla vi toyta.

⁶Muɗ mulda valam ŋolo, vul sle'ta ta ya' dabɗita mi zlamda-mulda vi David, hiɗi mulda valamu, muɗa' dono'o, gut kuɗa'a kaw hiɗi ɗigerta hiɗi gasita kaw, tun caw vaydi pa ta-ta hay vatɗita; kayni mi va ma Ma-Vatɗina ma li'e hiɗi ciwerta valamu.

⁷Bum-Sumuna di yoboyn kat jafna vi Yakub, yoboyn namna nig kay jafna vi Israyel,

⁸sumun kaf ma wi kayni, jafna vi Efrayim hiɗi sum sa hay Samariya, diksi hobay hob' hiɗi suburta hiɗi haysi sleɗiya, nisi ma di ala:

⁹Wulini direŋgella ɦoowa gaa'a, nay ma jak hiɗiy ma fiyokŋa hay baŋalamu; gu-sikomora kaay goyo, nay ma pi gu-gamna hay baŋalamu.

¹⁰Sa gaw kay mulla vi Retsin Ma-Vatɗina ma yawsi kulo kalamu, nam ma gan sa gawt kisina.

¹¹Sa Siriyana hay gal ma kuɗuwna, sa Filistina hay gal ma vulatina, nisi ma ti sa Israyel ɓuraŋ pek-pek', may hiɗi kayni kaf, ɦiyda valamu may vat goyɗi, ɓalam ka meɗay goy dok-doko.

¹²Sumuna min hotay kat nam ma ka cisinɗi, nisi min gar Ma-Vatɗina vi vok-ma-duuraɗi.

¹³Nala yamda hiɗi giɗera Ma-Vatɗina ma kaam goyo hay Israyel, ɓam gu-gomona hiɗi cerewna nam ma kaam goyo kaw, hay buur kep ɦawa.

¹⁴Sa ma maara hiɗi sa ma hay jaf-mulda kayni si yamda, sa ma jobta ma muɗi mul sinda, namu mi giɗera.

¹⁵Sa ŋulona vi sum nisina viysi goyo, sum sa hin tuwsi kuɗsina ba goyo.

¹⁶Kuɗ na'ta Bum-Sumuna as li firi kay sum sa joriyona visiɗi, nam ma li slugota kay sa kuyuna visiya hiɗi boy sa duhulla visiɗi; kay nisi kaf kayni si sum sa liwisna hiɗi sum sa joona, vunsi dum mi law ma liwisna. May hiɗi kayni kaf ɦiyda valamu may vat goyɗi, ɓalam ka goy meɗay dok-doko.

¹⁷Kay joota ka ŋal ki kuta nala, na' ŋal zigiy-olla hiɗi gu-zigiyna, ŋal juru ma ɦisikŋa, nam pat kulo jar nukŋa.

¹⁸Kuɗ purcakka vi Ma-Vatɗina vi vok-ma-duura, nagat sliy kuwa, kayn min di ala sumun ŋalay goy kay kuta, sa ma hin ɓasulum goy mayɗi.

¹⁹Nisi vurum hay gal ma jufna, may mayt ka dok-doko, nisi vurum hay gal ma gulla may nisi hobɗi; gigekaw mut sliwna vi glaŋamu.

²⁰Manase mut sliw Efrayim, Efrayim mut sliw Manase, nisi tap tuwsiya ko kay Yuda, may hiɗi kayni kaf, ɦiyda valam may vat goyɗi, ɓalam ka goy dok-doko meɗiya.