Read Masana SA LEVITNA 1 Bible Online

SA LEVITNA 1 - Masana bible

SA LEVITNA 1

¹Ma-Vatɗina yi Musus, goy hay guɗuk ma fi-tuwn pa, nam di talamu:

²Naŋ ma di tam gurona vi Israyel ala: Hay li ma sa jargiya min mar va ma ɗifini tam Ma-Vatɗina, nam as vul putu lebo ɦuwa.

³La nam min vulum a ŋal goy ɗifin mi putu, nam as vulum mi put guju'u, ma moy may talamɗi, nam as vulum goy hay vun guɗuk ma fi-tuwna, goy vok ir Ma-Vatɗina kay nam ma muɗ kir Ma-Vatɗin ŋaa'a.

⁴Nam as tun ɓalam kay put namna, kay nam ma muɗ kir Ma-Vatɗin ŋaa'a, kay nam ma por tuwam hiɗi namu.

⁵Nam ma ŋat goor-put namna vok ir Ma-Vatɗina, muliyan-sa-ɗifinna, gurona vi Aaron, ma li ɗifin hiɗi busuwna, nisi ma yamam goy tam giwin-ma-ɗifinna ma ka ɗiger hay vun guɗuk ma fi-tuwna.

⁶Nam ma zi put ma ɗifin namna goyo, kaam sliwam goy ne' ne'.

⁷Muliyan-sa-ɗifinna, gurona vi Aaron, ma ŋal kut kay giwin-ma-ɗifinna, nisi ma cuk gun kulo kay kuna.

⁸Sliw ma kay goy ne'ne'na, yamna, mul-sliwna kaf, gurona vi Aaron ma lakam kulo kay guna ma jakay kulo kay kuta, kay giwin-ma-ɗifinna.

⁹Ruwatna hiɗi gayna nam ma muzum goy hay niyna; muliyan-sa-ɗifinna ma ŋalam goyo kaf, kulo kay giwin-ma-ɗifinna. Kayni mi ɗifinna ma ŋali goy hay kuta, hista valam ŋaa'a ŋolo kir Ma-Vatɗina.

¹⁰La ɗifin ma nam maram kay ŋal goyna mi ɦuwa, la mi goor ɦu-dimiya lebo goor ɦu-mee kaw, nam ma maram mi ma jufu ma moy may talamɗina.

¹¹Nam ma ŋatamu hay gal ma gaana vi giwin-ma-ɗifinna, vok ir Ma-Vatɗina; muliyan-sa-ɗifinna, gurona vi Aaron ma yam busuwn goy tam giwin-ma-ɗifinna noŋ kaf.

¹²Nam ma kaam sliwam goy ne'ne'; yamda hiɗi mula kaf muliyan-sa-ɗifinna ma cukum kulo kay guna ma ka cuki kay kuta, kulo kay giwin-ma-ɗifinna.

¹³Gayna hiɗi ruwatna nam ma muzum goy hiɗi niyna, nala muliyan-sa-ɗifinna ma lum goy ɗifin kafe, nisi ma ŋalam goyo, kulo kay giwin-ma-ɗifinna. Kayni mi ɗifin ma ŋalay goyo hay kuta, hista valam ŋaa ŋolo kir Ma-Vatɗina.

¹⁴La nam min ŋalam ɗifin tam Ma-Vatɗin mi laya, nam as lum ɗifin mi gukŋa lebo guk-gabayna,

¹⁵muliyan-sa-ɗifinna as ŋalam kulo'o kay giwin-ma-ɗifinna, nisi ma munum yalam goyo hiɗi tireksiya, ŋalamu, yamam busuwam goy hay gef giwin-ma-ɗifinna hay gal kepe.

¹⁶Tirekŋa hiɗi zlimitna nam ma patam goyo, cukum kulo goboy tam giwin-ma-ɗifinna hay gal ma kuɗuwna, hay liyn ma cuk butuw-kun hayna.

¹⁷Nam ma jetem gilaŋatam goyo, may ɓurawam iram goyɗi; mul-ma-ɗifinna as ŋalam kulo'o kay giwin-ma-ɗifinna, kulo kay guna ma cuki hay kuta. Kayni mi ɗifinna ma ŋalay hay kuta, hista valamu ŋaa ŋolo kir Ma-Vatɗina.