Read Masana SA LEVITNA 10 Bible Online

SA LEVITNA 10 - Masana bible

SA LEVITNA 10

¹Gurona vi Aaron, Nadab hiɗi Abihu, gigekaw sli ganun hay ɓalamu ɓalamu, cuk kut hayamu, tun urdin kulo kalamu; nisi mar kut ta pulta vok ir Ma-Vatɗina, hagat may vuli kisi kay kaynɗi.

²Kut kali goy vok ir Ma-Vatɗin pa, ŋalsi goyo. Nisi mit gaa vok iramu.

³Musus di tam Aaron: Ma-Vatɗina di goy tigi kayn ala: Nam min ala sum sa min co goboy talamu ma sli yam peldetta valam kulo'o, nala nam ma fi suburta vok ir sumun kafe. Aaron min di vaɗi.

⁴Bugolda Musus yi Miskayel hiɗi Elsafan gurona vi Uziyel sa nosiyom Aaronna, nam ka disi ala: Nigiyay goboyo, ɓosiyogina nigi ma narsi goy gine'e hiɗi liyn ma peldetna, goy bugol guɗukŋa.

⁵Nisi co'o, ki Musus di tisi nala, nisi ɗutsi tuwsi hay sligar-tuwna visiya, tuɗsi goy gine'e hiɗi guɗukŋa.

⁶Musus di tam Aaron, tam Eliyazar hiɗi Itamar gurona vi Aaron ala: Nigi ma hin yigi goy ɦawa noŋɗi, nigi ma jet sligara vigi goy noŋɗi, la naɗi nigi ma mita, Ma-Vatɗin kaw dikam ma ɓulak kat sumun noŋ kaf. Hingi ɓosiyogina hiɗi ziyna vi Israyel kaf tiy kay nisi sa Ma-Vatɗin ŋalsi goy hiɗi kutna.

⁷Nigi ma cukay goyo hay guɗuk ma fi-tuwn pa noŋɗi. La naɗi nigi ma mita; kay mul ma ɦok-kamna vi Ma-Vatɗina ka ɦoki kigiya. Nisi li kuɗ va ma Musus dumna.

⁸Ma-Vatɗina di tam Aaron ala:

⁹Hay li ma naŋ hiɗi gurona vaŋu min cuk hay guɗuk ma fi-tuwna, nigi ma ci vinɗi, ci dolay ma hiwiraŋ yaŋɗi kaw, kay a nigi ma mitɗi: Gatta kayni ma hin dok-doko jar gurona vigiya,

¹⁰kay a nigi ma poŋ jar sle ma peldetna hiɗi sle ma goy jiyna, sle ma liwisna hiɗi ma liwisɗina.

¹¹Kay hat mi gurona vi Israyel gatta ta Ma-Vatɗin vulsiya hiɗi ɓam Musus.

¹²Musus di tam Aaron, mi Eliyazar, mi Itamar hiɗi gurona vi Aaron sa hin ma'na ala: Nigi ma sli dir ɗifin ma hin goy kuɗ ɗifin ma ŋalay hay kuta vok ir Ma-Vatɗina, nigi ma tum vok ir Ma-Vatɗina hiɗi kufn kuɗumɗi, kay kayni mi va ma peldet ŋolo.

¹³Nigi ma tum hay liy ma peldet suwa, kay ɗifin ma ŋalay hay kut kayni, nam mi galla vaŋu hiɗi galla vi gurona vaŋu, kay dit hini tan nala.

¹⁴Lo, naŋu hiɗi gurona vaŋ sa jufayna hiɗi sa boyna, war-digŋa ma muɗum galamna hiɗi bigiyna ma vum kulona, nigi ma tum hay liyn ma peldetna; kay nam vuli migiya, mi galla vaŋu hiɗi gurona vaŋu, hay ɗifinna vi lop ma slugona vi gurona vi Israyel.

¹⁵Nisi ma maramu, tapam hiɗi mul ma koti kay ŋalam goy hay kutna, hiɗi war-digŋa ma muɗum galamu hiɗi bigiyta ta va' kulo'o vok Ma-Vatɗina: Nam ma hin ir vaŋu hiɗi gurona vaŋu, gatta na'ta ma hin nala dok-doko, ki Ma-Vatɗina vul hagat nala.

¹⁶Musus gar ɦu ma poora, nam fum goy ŋalaya. Ki kayn nala nam muɗ ɦiy kat Eliyazar hiɗi Itamar, gurona vi Aaron sa hinna. Nam di'e:

¹⁷ɦu ma poora nigi min tum hay liyn ma peldetnɗi kay mige? Kay nam kayni peldete, Ma-Vatɗin vulgit kayni kay nigi ma ziy jiw-zlata vi sumuna, kay nigi ma li poora kisi vok Ma-Vatɗina.

¹⁸Ɗuwa, busuwna vi ɦuna nigi ma tuɗum kalaf hay liyn ma peldetna noŋɗi; may laliyan nigi as tum kalaf hay liyn ma peldetna, ki hagat vuli tan kayn nala.

¹⁹Aaron di tam Musus: Humaŋu, vaydi nisi li ɗifinna visi ma poora hiɗi ma ŋal-goynawa vok ir Ma-Vatɗina, bugol va ma li tanu kayni, la ɦu ma poora nan tum tiy vaydi lo, lawta kayni as li kir Ma-Vatɗin ŋaa'a su?

²⁰Musus hum lawta kayni, nam vi kuɗa'a.