Read Masana SA LEVITNA 11 Bible Online

SA LEVITNA 11 - Masana bible

SA LEVITNA 11

¹Ma-Vatɗina di tam Musus hiɗi Aaron ala:

²Nigi ma di tam gurona vi Israyel ala: Jar muuriyan ma hay nagat noŋ kafna nan min ɗekgi kay ma nigi as tumna.

³Muuriyan kaf ma tirekem goy ɓetiya, ma selem goy ɓiretina, ma ligaɗ hatna nigi as kay tumu.

⁴May la nam ligaɗa, jar tirekem goy ɓiretiya kayn nigi tum kaf de naɗi, ki lamgan nala nigi as tumɗi, kay nam ligaɗa, may vun tirekem may goy ɓetiɗi, nigi ma ɗuwum ki liwis nala.

⁵Kosomna[1] nigi as kay tumɗi; nam ligaɗa, may vun tirekem may goy biretayɗi: Nigi ma ɗuwum ki liwisi nala.

⁶Vetna nigi ma tumɗi; nam ligaɗa, may vun tirekem may ɓiretiɗi: Nigi ma ɗuwum ki nam liwisi nala.

⁷Bagumna nigi ma tumɗi, namu vun tirekem ɓetiya, selem ɓeti lay, may nam liga'ɗi. Nigi ma ɗuwum ki liwisi nala.

⁸Nigi as tum sliwam noŋɗi, ŋumna valam ma goy miti waŋŋa nigi as tun ɓigi talam noŋɗi kaw: Nigi ma ɗuwum ki liwisi nala.

⁹Nan min ɗekgi kay jaf kuluf ma goloŋ jar niyna ma nigi as kay tumna: Kuluf kaf ma zlimitna hiɗi ɓulok talamna, la nam goloŋ hay niy-lum ma ŋolla lebo niy ma gurayna kaw nigi as tumu.

¹⁰May kuluf ma zlimit may talamɗina hiɗi ma ɓulok may talamɗina nigi ma ɗuwum ki liwis nala, jar sle ma ka geɗ goloŋ hay niyna ma sukka hayamna kaf, la malam hay niy-lum ma ŋolla lebo ma gurayna kaw.

¹¹Nigi ma ɗuwum ki liwis nala, nigi as tum sliwamɗi, ŋumna valam ma goy miti waŋŋa nigi ma ɗuwum ki liwisi nala.

¹²Kuluf ma goloŋ jar niyn kaf, la zlimit may talamɗi, ɓulok may talamɗi lay ni, nigi as ɗuwum ki liwisi nala.

¹³Nan min ɗekgi kay layayna ma nigi ma ɗuwum ki liwis nalana, ma nigi as kay tumɗina: Bakŋa, kulo-kulona, bak ma goloŋŋa,

¹⁴rakŋa, zilimna hiɗi lay ma hay jafna valamna kaf;

¹⁵jarakŋa hiɗi lay ma slum nalan noŋ kaf,

¹⁶rigetna, ɦu-ɦuna, rubukŋa, zekelekŋa hiɗi lay ma slum nalan kafe.

¹⁷Gabuura, ɓukana hiɗi glaw-glawna; koro-korona, gudufna, ŋaŋaana;

¹⁸lay-joriyona, garamna hiɗi lay ma kuɗ jafamna kaf,

¹⁹tolikona hiɗi baya-bayna,

²⁰sle ma harmatna kaf ma fok kulo'o may tuɗ hiɗi selem gaa kuɗum fiɗi kafna nigi ma ɗuwum ki liwisi nala.

²¹May, jar sle ma harmatna ma fok kulo lay tuɗ hiɗi selem gaa kuɗum fiɗi kaf layna, nigi ma tum mi ma selem kulo piy kalamu kay pir kay nagat hiɗi namna.

²²Kayni mi ma nigi ma tumna: Ɓok-ɓokona, baar-jerena, girim-girimna, baar-bobona, kuɗ jafam kaf.

²³Sle ma ɦarmatna ma selem fiɗi may fok kulona kaf nigi ma ɗuwum ki liwisi nala.

²⁴Nam as muɗgi liwisi, ma goy miti waŋŋa, la sa tun ɓalam talamu, nam muɗi liwisi ta-ta hay vulatita.

²⁵Tuwam ma goy miti waŋŋa la gigekaw slumawa kulo hay ɓalamu, nam ma muz sligara valam goyo, nam muɗi liwisi ta-ta hay vulatita.

²⁶Muuriyan kaf ma tirekem ka'a may vun tirekem may ɓireti goyɗin kaf, liga'ɗi lay kaf, la sa tun ɓalamawa talamu, nam muɗi liwisi.

²⁷Muuriyan kaf ma selem fiɗi, may tuɗ kulo kay selemna kaf nigi ma ɗuwum ki liwisi nala, tuwam ma goy miti waŋŋa la sa tun ɓalamawa talamu, nam muɗi liwisi ta-ta hay vulatita.

²⁸Gigekaw ma slum tuwam ma mitinawa hay ɓalamu, ma muz sligara valam goyo, nam muɗi liwisi ta-ta hay vulatita, nigi ma ɗuwum ki liwisi nala.

²⁹Jar sle ma ɦarmat gaa kay nagatna, nan min ɗekgi kay ma nigi as ɗuwum ki liwis nalana: Zotna, kulomna, ɦuɗoŋolla, hiɗi ma kuɗ jafam kafna.

³⁰Cem-cemna, ŋilefna, hulla, voko-vokona hiɗi ŋaliyana.

³¹Jar sle ma ɦarmatna kaf nam cani nigi ma ɗuwum ki liwisi nala, tuwam ma goy miti waŋŋa la sa tun ɓalamawa talamu, nam muɗi liwisi ta-ta hay vulatita.

³²La tuwam ma goy miti waŋŋa nigawa gaa kay va'a, la mi gu ma ceɗiya, la mi sligari, la mi bakŋa, la mi birimi, sle ma li lop hiɗi namna kaf muɗi liwisi; ma cukum goloŋ hay niyna, nam gesiya ta-ta hay vulatita, bugol kayni nam muɗi peldete.

³³La mara nigawa gaa kay doway-nagana, sle ma hay doway namna kaf muɗi liwisi, doway namna as tom goyo may.

³⁴Sle ma tin noŋ kaf, la niy ma hay doway namna ɦokawa kalamu, nam muɗi liwisi; sle ma cin kafe, la tuni malam hay doway ta ir nanige kaw, nam muɗi liwisi.

³⁵Slen kaf ma tuwam ma mitin nigawa gaa kalamu, nam muɗi liwisi, giwinna kaf as ɦom goyo, nam muɗi liwisi, nigi ma ɗuwum ki nam liwis nala.

³⁶Hin peldet ɗawn mi niyn ma jaŋŋa hiɗi kaara tuta, ma niyn ka hayamna; may tuwam ma goy miti waŋŋa sa ma tun ɓalamawa talamuna nam muɗi liwisi.

³⁷La tuwam ma goy mitina nigawa gaa kay jaf ma min cukum gaana, jaf namna hin ɗawn peldete.

³⁸May la niyn ɦoki kay jaf ma cukum gaan vatiya, la tuw sle namna ma mitina hot nigawa hayam lo, nigi ma ɗuwum ki nam liwisi.

³⁹La kuɗ muur ma nigi tumna, mara kep mitawa, tuwam ma goy miti waŋŋa sa ma tun ɓalamawa talamu, nam muɗi liwisi ta-ta hay vulatita;

⁴⁰muur namna ma mitina, sa ma tum sliwamawana, nam ma muz sligara valam goyo. Nam muɗi liwisi ta-ta hay vulatita.

⁴¹Sle ma ɦarmat gaa kay nagatna kaf nigi ma ɗuwum ki nam liwisi nala: Nigi as tumɗi.

⁴²Sle ma ɦarmat gaa kay nagatna, ma sab hiɗi digamna, ma tuɗ hiɗi selem gaa kuɗum fiɗina lebo ma selem gaa kuɗum dak-dakŋa kaf, nigi as kay tum noŋɗi, nigi ma ɗuwum ki nam liwisi nala.

⁴³Slen namna ma ɦarmatna kaf kayni nigi ma muɗ sumuna vigi liwisi hiɗi nam noŋɗi, nigi ma muɗ tuwgi liwis hiɗi nam noŋɗi; nigi ma ges tuwgi hiɗi nam noŋɗi.

⁴⁴Kay nanu mi Ma-Vatɗina Lawna vigiya, nigi ma li tuwgi goy peldete, nigi ma lak peldete kaw, kay nan ka peldete.

⁴⁵Kay nanu mi Ma-Vatɗina ma yawgiyay goy hay nagat Egipte pana, kay mus dok-dok Lawna vigiya, kay nigi ma li tuwgi goy peldete, kay nan kaw ka peldete.

⁴⁶Kayni ti gatta ta vuliya kay muuriyana, kay layayna, kay slen ma irina ma ka geɗ goloŋ jar niyna, kay sle ma ka ɦarmat gaa kay nagatna kaw,

⁴⁷kay nigi as poŋ ir sle ma liwisna hiɗi sle ma bay-liwisna, muur ma tumna hiɗi ma tumɗina may.