Read Masana SA LEVITNA 12 Bible Online

SA LEVITNA 12 - Masana bible

SA LEVITNA 12

¹Ma-Vatɗina di tam Musus:

²Naŋ ma di tam gurona vi Israyel ala: Hay li ma cat vaawa haya, la na' vuɗ goor ma jufawa, na' muɗi liwisi ta-ta hay buur siɗiya, na' muɗi liwisi ki hay li ma busuwn ka ta'a hay tilla tilla nala.

³Hay buurta glafandita, ma ka goor gosaya.

⁴Na' ma mus ir buur dok-ɦidi kay por tuwa' goyo kay busuw ma ta'na, na' ma tun ɓa' tam va ma peldet noŋɗi, na' as tuɗ hay liyn ma peldetna noŋɗi, ta-ta buur ma, siɗiyana ma na' por tuwa' goyna vat goy tuwa.

⁵La na' puka' ti goot-ca'a, na' muɗi liwisi ir lumu ma', ki hay li ma busuwn ka ta'a hay tilla tilla nala; na' ma li buur dok-karkiya yam karkiya kay por tuwa' goyo kay busuw ma ta'na.

⁶Hay li ma por-tuwna va' vatawa, la ka' mi goor jufu lebo goot-ca'a kaw, na' ma vi goor ɦu-dimi ma busata valam kepe kay li ɗifin ma ŋal-goyna na' vi guk kepe lebo gukgulin kepe kay li ɗifin ma poora, na' maram tam mul-ma-ɗifinna goy vun guɗuk ma fi-tuwna.

⁷Mul-ma-ɗifinna ma li ɗifin namna vok ir Ma-Vatɗina, nam ma li poora kay ca na'ta, nala na' ma muɗ goy peldete kay busuw ma jaŋ goy ta'na. Kayni ti gatta ta tuni kay cata ta vuɗ goot-ca'a lebo goor-jufu.

⁸La donota va'a kay fi goor ɦu-dimiya mayɗi, na' ma yaw guk ma joriyon ma' lebo gukgulin ma' kaw, kep kay ɗifin ma ŋal-goyna, kep kay ɗifin ma poora. Mul-ma-ɗifinna ma li poor ka'a, nala na' ma muɗ goy peldete.