Read Masana SA LEVITNA 15 Bible Online

SA LEVITNA 15 - Masana bible

SA LEVITNA 15

¹Ma-Vatɗina di tam Musus hiɗi Aaron:

²Nigi ma di tam gurona vi Israyel ala: Sa gigekaw la va jaŋ goy kuɗumu ni, nam muɗi liwisi.

³Nam muɗi liwis kayn kay va ma jaŋ goy kuɗumna: La busuwn jaŋ goy kuɗum haraŋi, jaŋ goy haraŋɗi kaw, nam liwisi.

⁴Gilik ma nam bur kalamna hiɗi ɗigal ma nam mus kalamna kaf muɗi liwisi.

⁵Sa ma tun balam tam gilikŋa valamna, nam ma muz sligara valam goyo, muz tuwam goy hiɗi niyn lay, may nam ka liwisi ta-ta hay vulatita.

⁶Sa ma musawa kay ɗigal ma nam mus kalamna ni, ma muz sligara valam goyo, muz tuwam goy hay niyna, nam ka liwisi ta-ta hay vulatita.

⁷Sa ma tun balam tam sa namna ma muz sligara valam goyo, ma muz tuwam goy goloŋ hay niyna, nam muɗi liwisi ta-ta hay vulatita.

⁸La nam tuf nenen tam sa ma liwisɗina, sa namna ma muz sligara valam goyo, muz tuwam goy hiɗi niyna, nam ka liwisi ta-ta hay vulatita.

⁹Sle ma nam ɓe kalamna kaf muɗi liwisi.

¹⁰La va mige kaw ay buri gaa kuɗumu, sa ma tun ɓalamawa talamuna, sa namna muɗi liwisi ta-ta hay vulatita. Sa ma sli va namnawa kulo hay ɓalamu, ma muz sligara valam goyo, ma muz tuwam goy hay niyna, nam muɗi liwisi ta-ta hay vulatita.

¹¹La sa namna tun balam tam sa'a, may sa namna may muz balam goyɗi, ŋaat kayn nam ma muz sligara valam goyo, muz tuwam goy hay niyna, nam ka liwisi ta-ta hay vulatita.

¹²Doway-nagana ma nam tun ɓalam talamna kaf ma tom goyo, la mi doway-guna, ma muzum goy hiɗi niyna.

¹³Hay li ma busuw ma jaŋ talamna yerawa goyo, nam as cub buur siɗiya lo kay por tuwamu, nam ma muz sligara valam goyo, muz tuwam goy hiɗi niy ma kilira, nala nam muɗi peldete.

¹⁴Hay buurta glafandita, nam ma yaw gukŋ ma', yaw guk-gabayn ma', nam ma tuɗ vok ir Ma-Vatɗina, goy vun guɗuk ma fi-tuwna, nam ma vul guk namna mi mul-ma-ɗifinna.

¹⁵Mul-ma-ɗifinna ma lum ɗifini, kep kay ɗifin ma poora, kep kay ɗifin ma ŋal-goyna, nala mul ma-ɗifinna ma li poor kalamu vok Ma-Vatɗina kuɗ busuw ma jaŋ goy talamna.

¹⁶La tuw sa day goyo, nam ma muz tuwam kaf goy hay niyna, nam muɗi liwisi ta-ta hay vulatita.

¹⁷Sligara lebo ɗigiyna ma tuwam goɓ talamna kaf ma muzum goyo hay niyna, nam muɗi liwisi ta-ta hay vulatita.

¹⁸La san burawa hiɗi cata, nisi ma' pet ma muz tuwsi goyo, nisi muɗi liwisi ta-ta hay vulatita.

¹⁹La busuwn jaŋ goy kuɗ cata, na' ma mus hay liwista ir buur siɗiya. La sa tun ɓalamawa ta'a, nam muɗi liwisi ta-ta hay vulatita.

²⁰Gilik ma na' bur kalamna kaf muɗi liwisi, ɗigal ma na' mus kalamna kaf muɗi liwisi.

²¹Sa ma jo ɓalam tam gilikŋa va'na ma muz sligara valam goyo, ma muz tuwam goy hay niyn lay, nam muɗi liwisi ta-ta hay vulatita.

²²La sa tun ɓalamawa tam ɗigal ma na' mus kalamna, nam ma muz sligara valam goyo, muz tuwam goy hay niyna, nam muɗi liwisi ta-ta hay vulatita.

²³La va ka buri kulo kay gilikŋa lebo kay va ma na' mus kalamna, sa ma tun ɓalawa tam va namna, nam muɗi liwisi ta-ta hay vulatita.

²⁴La sa burawa hiɗi na'a, liwisna va' goɓawa talamu, nam muɗi liwisi ta-ta ir buur siɗiya, gilik ma nam bur kalamna kaf muɗi liwisi.

²⁵La saŋŋa ma co tam catna buura valam jik goyo, la saŋŋa musawa ta' ŋolo, jar buur namna cani na' muɗi liwisi kaw ki hay liy ma saŋŋa ka co ta' hay tilla tilla nala.

²⁶Gilik ma na' bur kalamna kaf nam muɗi ki gilik ma na' bur kalamu hay li ma saŋŋa ka ta'a hay tilla nala. Va ma na' mus kalamna nam muɗi liwisi ki hay li ma saŋŋa ka ta' hay tilla tillan nala kaw.

²⁷La sa tun ɓalamawa tam sle namna, nam muɗi liwisi, nam ma muz sligara valam goyo, muz tuwam goy hay niyna, nam muɗi liwisi ta-ta vulatita.

²⁸Hay li ma busuw namna vatawa ta'a, na' ŋa buur mara bugolom siɗiya lo, bugol kayni na' tay liwis loɗi may.

²⁹Hay buurta glafandita, na' ma yaw gukŋ ma', lebo yaw gukguli ma joriyon ma', na' ma maram mi mul-ma-ɗifinna, hay vun guɗuk ma fi-tuwna.

³⁰Ma kepna, mul-ma-ɗifinna ma li ɗifin ma poora hiɗi namu, hena nam ma li ɗifin ma ŋal-goyna hiɗi namu, mul-ma-ɗifinna ma li poor ka'a vok ir Ma-Vatɗina, kuɗ busuw ma jaŋ goy ta'a, ma muɗa' liwisna.

³¹Nigi ma ja jar gurona vi Israyel goy hiɗi liwis ma tisina, kay Tempella van ka jarsiya kayni, la nisi gesem hiɗi liwis ma tisina, nisi ɗawn ma mita.

³²Kayni ti gatta ta vuliya kay sle ma jaŋ goy kuɗ sana lebo sa ma muɗi liwisi kay tuwam ma day goyna,

³³Gatta ta vuliya kay cata ta saŋŋa ka ta'a hay tilla tilla, gatta ta vuli kaw kay sa ma bur hiɗi cata ta muɗi liwisi.