Read Masana SA LEVITNA 16 Bible Online

SA LEVITNA 16 - Masana bible

SA LEVITNA 16

¹Ma-Vatɗina law tam Musus, bugol mitta vi gurona vi Aaron sa ma'na, sa mita hay li ma nisi co vok ir Ma-Vatɗina.

²Ma-Vatɗina di tam Musus: Naŋ ma di tam ɓasuŋŋa Aaron ala: Liyn ma peldetna, ma ka vok sligar-gaɓayna, ma goy vok goɓolokona ma kuluɓi kay timgilla tani, nam ma kal hayam dok-dokɗi, kay a nam ma mitɗi; kay nan ka vul tuwan goy hay ɗugulla kulo kay goɓolokona.

³Kayni mi va ma nam ma li'e hay li ma nam min kal hay liyn ma peldetna: Nam ma vi put ma joriyo'o kay li ɗifin ma poora, vi ɦu-gamala kep kay ɗifin ma ŋal-goyna may.

⁴Nam ma cuk sligar-tuwna ma peldetna ma koti hiɗi barawna, ma cuk kalesoŋ ma barawn kuɗumu, nam ma jun kanti ma barawn furamu, nam ma kuluɓ poki ta barawt kalamu. Kayni mi sligar ma peldetna, nam ma muz tuwam goyo, bugolda cukum talamu.

⁵Nam ma yaw fok-ŋekŋ ma hay ɓam gurona vi Israyel kay li ɗifin ma poora, vi ɦu-gamala kep kay li ɗifin ma ŋal-goyna.

⁶Aaron ma vi put-gujuna valam ma poora, nam ma li poora kay tuwam namu, kay ziyna valam kaw.

⁷Nam ma yaw fok-ŋekŋ ma ma'na, nam ma lakam goy vok ir Ma-Vatɗina, goy vun guɗuk ma fi-tuwna.

⁸Aaron ma li ŋaɓta kuɗ hayta kay fok-ŋekŋ namna ma ma'na, ɦu-ŋekŋ ma kepna vi Ma-Vatɗina, hu-ŋekŋ ma kepna vi Azazel may.

⁹ɦu-ŋekŋa ma ŋaɓta kuɗ ɦayta vulum mi Ma-Vatɗina. Aaron ma vumu, nam ma li ɗifin ma poora hiɗi namu.

¹⁰ɦu-ŋekŋa ma ŋaɓta vulum mi Azazel nam ma colom vok Ma-Vatɗin iriya, kay li poora hiɗi namu, kay gum iram goy fulu mi Azazel.

¹¹Aaron ma li ɗifin hiɗi put-gujuna valam ma poora, nam ma li poora kalam namu, kay ziyna valam kaw, nam ma ŋat put-gujuna valam ma poora.

¹²Nam ma sli ganuna, hobay hiɗi veŋŋa ma ka ŋala, ma yawamay kulo kay giwin-ma-ɗifinna vok-ir Ma-Vatɗina pa, nam ma hob way-ɓalam ma' hiɗi urdi ma hisna ma guɗufina; sle namna nam ma tuɗum goy bugol sligar-gaɓayna;

¹³nam ma fat urdin kay kuta vok ir Ma-Vatɗina, kay nukŋa vi urdina ma bur kulo kay goɓolokona ma ka kulo kay di-goyta, nala nam as mit noŋɗi.

¹⁴Nam ma yaw busuw put-gujuna, hiɗi cita-ɓalamu, nam ma yamam goy tam gef goɓolokona ma gal kuɗuwna, Nam ma yam busuwn hay gef goɓolokon selem siɗiya.

¹⁵Nam ma ŋat ɦu ma por sumun hiɗi namna, busuwn nam ma naram goy bugol sligar-gaɓayna, busuwna valamu nam ma lum ki nam li busuwna vi put-gujun nala kaw. Nam ma yam busuwn kulo kay goɓolokona, kay vokom lay.

¹⁶Ki kay nala nam ma li poora kay liyn ma peldetna kuɗ sulukŋa vi gurona vi Israyel, hiɗi raw-goyta visi hay sulukŋa, nam ma li ki kayni nala kaw kay guɗuk ma fi-tuwna. Kay nam coli zawn jarsi nisi sa liwisna.

¹⁷Hay li ma nam kal kalaf hay liyn ma peldetna kay li poor ɗawni, sa as col hay guɗuk ma fi-tuwn noŋɗi ta-ta nam kali goyo. Nam ma li poora kay tuwam namu, kay ziyna valamu, kay vokŋa vi Israyel noŋ kafe.

¹⁸Hay li ma nam kali goy ɗawni, nam ma tuɗ kat giwin-ma-ɗifinna ma ka vok ir Ma-Vatɗina, nam ma li poora kay giwin-ma-ɗifinna; nam ma yaw busuw put-gujuna hiɗi busuw ɦu-ŋekŋa, nam ma sawam kulo tam miyokŋa vi giwin-ma-ɗifinna, ŋuyum tuwam noŋ kaf.

¹⁹Hiɗi cita-ɓalamu, nam ma yam busuwn goy tam giwin-ma-ɗifinna sem siɗiya, nam ma poromu, lum goy peldete kay liwista vi gurona vi Israyel.

²⁰Hay li ma nam vat lopna vi poora ma kay liyn ma peldetnawa, guɗuk ma fi-tuwna hiɗi giwin-ma-ɗifinnawa kafe, nam ma vi ɦu-ŋekŋ ma hini irina

²¹Aaron ma tun ɓalam ma' kafe kay ɦu-ŋekŋ ma hini irina jiw-zlata hiɗi raw-goyta vi gurona vi Israyel kaf nam ma hama' kulo kay ɦu-ŋekŋ namna, nam ma tun suluk namna kulo kay ɦu-ŋekŋ namna, bugol kayni nam ma gi ir ɦu-ŋekŋ namna goy hay fulda, nam ma gar sa mara kep kay digiɗim kuɗumu.

²²ɦu-ŋekŋa ma ziy sulukŋa visi kaf kalamu kay naram hay liyn ma wiŋŋa. Hay li ma digiɗ ɦu-ŋekŋ kaynawa goy hay fulda,

²³Aaron ma kal kalaf hay guɗuk ma fi-tuwna, sligar-barawna ma nam cukum hay li ma nam kal kalaf hay Tempella nam ma fokom goyo, lakam hay liy namna,

²⁴nam ma muz tuwam goy hiɗi niyna hay liy ma peldetna, bugolda hot yaw sligara valamu. Bugolda nam ma hot kali goyo, li ɗifin ma ŋal-goyn kalam namu, kay sumun kaf kaw, li poora kalam namu, kay sumun kafe kaw.

²⁵ɦu-ŋekŋa ma nam li poor hiɗi namna nam ma ŋalam mulam kulo kay giwin-ma-ɗifinna.

²⁶Sa ma digiɗ ɦu-ŋekŋa goy ful mi Azazella ma muz sligara valam goyo, muz tuwam goy hay niyna kaw, bugol kayni nam ma hotay hay guruna.

²⁷Nisi ma yaw ɗigiyna, sliwna hiɗi zigidikŋa vi put-gujuna hiɗi ɦu-ŋekŋa ma nisi maram busuwam hay liyn ma peldetna kay li poor hiɗi namna, nisi tuɗ sle namna goy gine hiɗi guɗukŋa ŋalam goy hiɗi kuta.

²⁸Sa ma ŋalam goyn ɗawni nam ma muz sligara valam goyo; ma muz tuwam goy hay niyna, bugol kayni, nam ma hotay hay guɗukŋa.

²⁹Kayni ti gatta ta hini dok-dok kigi nigiya, hay til ma siɗiyana, hay buur ma doogona vi tilla, nigi ma las ciwta vigiya, nigi as li lop noŋɗi, nigi sumay nagat as li lopɗi, rogoy sa ka jargin nala kaw.

³⁰Kay hay buur namna ɗawni ma li poor kigiya, kay porgi goyo, nigi ma li goy pori kay sulukŋa vigi kaf vok ir Ma-Vatɗina.

³¹Buur namna ɗawni mi buur ma sabatna vigiya, buur ma tun sukŋa, nigi ma las ciwta vigiya. Kayni ti gatta ta hini dok-dok jargiya.

³²Ma li poor ɗawni mi mul-ma-ɗifinna ma mul ɦoki kalamu, ma vuli goyo kay vurna hay lop ma ɗifinna hay baŋal bulumu, nam ma cuk sligar barawna ma peldetna talamu.

³³Nam ma li poora kay liyn ma peldetna, nam ma li poora kay guɗuk ma fi-tuwna hiɗi giwin-ma-ɗifinna, nam ma li poora kay muliyan-sa-ɗifinna hiɗi vokŋa vi sumun noŋ kafe.

³⁴Gatta kayni hini jargi dok-doko. Busat kaf nigi ma li poora kay gurona vi Israyel sem kepe kay sulukŋa visiya. Nisi li kuɗ slen ma Ma-Vatɗina dum mi Mususna.