Read Masana SA LEVITNA 17 Bible Online

SA LEVITNA 17 - Masana bible

SA LEVITNA 17

¹Ma-Vatɗina di tam Musus:

²Naŋ ma di tam Aaron hiɗi gurona valamu, tam gurona vi Israyel kaf kaw ala: Kayni mi va ma Ma-Vatɗin di'e:

³La san jar gurona vi Israyel ŋat putu kla, goor ɦu-dimiya kla, ɦu-me'e kla, la nam ŋatam gaa hay guɗukŋa lebo goy bugolomu kaw,

⁴la nam min maram kalaf hay guɗuk ma fi-tuwna kay li ɗifin vok ir Ma-Vatɗina hay tabernaklena valamɗi, san kayni busuwn ma job kalamu, kay nam jaŋ busuwn goyo, san kayni ma kaam selem goy jar sumuna valamu.

⁵Kay la gurona vi Israyel min li ɗifin goy fulu, ŋaata nisi ma maram tam mul-ma-ɗifinna, vok ir Ma-Vatɗina, kalaf hay guɗuk ma fi-tuwna, kay nisi vulum tam Ma-Vatɗina ki ɗifinna vi lop ma slugona nala.

⁶Mul-ma-ɗifinna ma yam busuwn kulo tam giwin-ma-ɗifinna vi Ma-Vatɗina, goy vun guɗuk ma fi-tuwna; nam ma ŋal mula goyo, kay hista valamu na' kir Ma-Vatɗin ŋaa ŋolo.

⁷Nisi ma li ɗifin tam fuliyanɗi, kay a nisi ma girif gaa vokomɗi. Kayni ti gatta ta hini dok-dok kisi nisiya, kay gurona visi kaw.

⁸Nala naŋ ma disi ala: La sa ma Israyel lebo sa ma rogoy ma musi jarsi ziya kaw, la nam min li ɗifin ma ŋal-goyna lebo ŋat ɦuwa kaw,

⁹la nam min maram kalaf hay guɗuk ma fi-tuwna kay li ɗifin mi Ma-Vatɗina hiɗi namɗi, san kayni ma kaam selem goy jar sumuna valamu.

¹⁰La san kuɗ sa Israyella lebo kuɗ sa pulla sa ka li ziy jarsina kaw, ti busuw va'a, nan ma muɗ iran goy talamu, nan ma kaam iram goy jar sumuna valamu.

¹¹Kay ciwta vi van ka hay busuwna. Nan vulgit (kay nigi li ɗifin hiɗi nam) kulo kay giwin-ma-ɗifin kayni, kay nam ma li poora kay ciwta vigiya, kay busuwn pora' kayn ti ciwta.

¹²Kuɗ kayni nan digiya, nigi gurona vi Israyel, sa kuɗgi kep kaw ma ti busuwn noŋɗi, la mi rogoyna ma ka musi ziy jargin kaw nam ma ti busuwnɗi.

¹³Sa ma Israyella lebo sa ma pul ma ka musi ziy jargiya kaw, la nam ti muura lebo lay ma tumna kaw, nam ɦokom busuwam goyo, vi butuwn kay busuwna.

¹⁴Kay ciwta vi slen kaf kayn mi busuw ma talamna. Kuɗ na'ta kayni nan di tam gurona vi Israyel: Nigi ma ti busuw va noŋɗi, kay ciwta vi slen kaf kayn mi busuwamu. La sa tumawa, kaam selem goy jargiya.

¹⁵Sumun kaf kayni, la mi goora vi nagata lebo sa ma pulu kaw, nam ma muz sligara valam goyo, muz tuwam goy hay niyna, nam muɗi liwisi ta-ta hay vulatita. Bugol kayni nam may liwis loɗi.

¹⁶La nam muz sligara valam goyɗi, muz tuwam goyɗi lay, nam ma ziy joota valam kay tuwamu.