Read Masana SA LEVITNA 18 Bible Online

SA LEVITNA 18 - Masana bible

SA LEVITNA 18

¹Ma-Vatɗina di tam Musus:

²Naŋ ma di tam gurona vi Israyel ala: Nanu mi Ma-Vatɗina Lawna vigiya.

³Nagat Egipte ta nigi ay haya' ziy jewt kayni, sle ma sum sa haya'n lumna nigi ma lumɗi, nagat Kanaan ta nan nargi haya'ta ɗawn kaw, sle ma sum sa haya'n lumna nigi ma lumɗi, ligi kisi nisi nala noŋɗi.

⁴Nigi ma li kuɗ sle ma nan digitna, nigi ma vi gatta van kulo kigiya, nigi ma tap kuɗa'a, nanu mi Ma-Vatɗina Lawna vigiya.

⁵Nigi ma li kuɗ gatta vanu hiɗi sle ma nan digitna, sa ma ŋom gatta na'tawana ma mus iriya. nanu mi Ma-Vatɗina.

⁶Sa jargiya ma tuɗ tam sugolomta kay wi nalata va'ɗi. Nanu mi Ma-Vatɗina.

⁷Sa jargiya ma gar kay sar nalata vi bulumɗi kaw. Kay na'ti suŋu, naŋ ma sar nalata va'ɗi.

⁸Naŋ ma gar kay sar nalata vi cata vi buŋɗi, kay kayni ti nalata vi buŋ kay tuwa'a.

⁹Ɓasuŋga, goota vi buŋu lebo suŋu kaw, la na' vuɗ vo hay ziyna lebo goy jiya kaw, naŋ ma gar kay sar nalata va'ɗi.

¹⁰Goor-ŋolona vaŋu lebo goor-ŋolota vaŋ kaw naŋ ma gar kay sar nalata visiɗi. Kay kayni ti nalata vaŋ kay tuwaŋu.

¹¹Goota vi buŋ ta cata valam vuɗa'ta, naŋ ma gar kay sar nalata va'ɗi, kay na' ti goor-buŋga.

¹²Ɓasum buŋga naŋ ma gar kay sar nalata va'ɗi, kay na'ti sugol buŋ vuɗita.

¹³Ɓasum suŋga naŋ ma gar kay sar nalata va'ɗi, kay na'ti sugol suŋ vuɗita.

¹⁴Basum buŋŋa naŋ ma gar kay sar nalata valamɗi, naŋ as bur tam cata valam noŋɗi, kay na' ti suŋu.

¹⁵Cata vi goora vaŋu naŋ ma sar nalata va' noŋɗi, kay na'ti kunoŋga.

¹⁶Cata vi ɓasuŋŋa naŋ ma sar nalata va' noŋɗi, kay kayni ti nalata vi ɓasuŋŋa.

¹⁷Naŋ ma sar nalata vi sumda hiɗi goota va' layɗi, naŋ ma sli goor-ŋolona hiɗi goor-ŋolota va'a kay sar nalata visiɗi. Kay nisi kayn si sugoliyo' sa vuɗina. Kay kayn yawi.

¹⁸Hay li ma cata vaŋ ka iri tuwana, naŋ ma sli ɓasu'taɗi, kay kayni mar cirepta.

¹⁹Hay li ma cat ka hiɗi busuwn ta'a, naŋ ma gar kay tuɗ ta'a kay ɗuw nalata va'ɗi.

²⁰Naŋ ma li cile hiɗi cata vi sugoloŋɗi, naŋ ma muɗ tuwaŋ liwis hiɗi na'ɗi.

²¹Naŋ as kay vul goor vaŋ goy kep kaw mi Molok*[2] noŋɗi, naŋ ma muɗ semda vi Ma-Vatɗina Lawna vaŋ goy liwisɗi. Nanu mi Ma-Vatɗina.

²²Naŋ ma bur hiɗi sa jufna ki san bur hiɗi cat nalaɗi. Kayni mi liwis ma ŋolo.

²³Naŋ ma bur tam faraya kay muɗ tuwaŋ liwis hiɗi namɗi. Cat kaw as tuɗ tam faraya kay muɗ tuwa' liwis hiɗi namɗi, kay kayn yawi.

²⁴Nigi ma muɗ tuwgi liwisi hiɗi sle namna can noŋɗi, kay sum sa nan min digiɗsi goy vokgin ɗawni, tuwsi muɗi liwis hiɗi sle namna cani.

²⁵Nagat muɗi kisi liwisi, nan ma ka kitat kay jiw-zlat ta haya'ta, nagata ma noy sum sa haya'na goyo.

²⁶Nigi ma li kuɗ gatta hiɗi dita vanu, liwis namna cani, nigi sa vuɗi vona kaw, sum sa pulla sa ka li ziy jargin kaw ma kal tuwgi hayamɗi.

²⁷Kaf cani mi slen ma liwisna ma sum sa hay nagat jewgin lumna, nisi muɗ nagat goy liwisi.

²⁸Ligi ŋali, la nigi muɗ nagat liwisi, na' kaw ma noygi goyo ki na' noy sum sa haya' jewn goy nala lay.

²⁹Kay liwis namna kaf cani, la sa li mara kep jaramu; ma kaam selem goy jar sumuna valamu.

³⁰Nigi ma li kuɗ vun-ma-gatna vanu, sle ma liwisna ma nisi lum jewgin kayni, nigi ma lumɗi, ma muɗ tuwgi liwisɗi. Nanu mi Ma-Vatɗina, Lawna vigiya.