Read Masana SA LEVITNA 19 Bible Online

SA LEVITNA 19 - Masana bible

SA LEVITNA 19

¹Ma-Vatɗina di tam Musus:

²Naŋ ma di tam tokŋa vi gurona vi Israyel kaf ala: Nigi ma li tuwgi goy peldete, Kay nan kaw ka peldete, nanu, Ma-Vatɗina, Lawna vigiya.

³Gige gige jargiya ma sli yam bulum hiɗi sulum kulo'o, ma li kuɗ buura van ma sabatna kaw, nanu mi Ma-Vatɗina, Lawna vigiya,

⁴nigi ma muɗ irgi kuɗ lawayn ma waan noŋɗi, nigi ma kot lawayn ma yoraynɗi kaw.

⁵Hay li ma nigi ma li ɗifinna vi lop ma slugona tanu, ɗifin namna nigi ma kotanti ŋaa ŋolo.

⁶Va ma nigi lum ɗifinna nigi ma tum hay buur ta nigi ŋatamta, lebo buurta ka'ta, diram ma hin goyo ta-ta hay buurta ɦidita ma ŋalam goy hay kuta.

⁷Hay buurta ɦidit ɗawni, nam buwiya, as tum loɗi, ɗifin namna may ŋaa loɗi.

⁸Sa ma tumawana ma ziy joota valam ɗawn mi nam kay tuwamu, kay va ma vuli goy tam Ma-Vatɗina nam muɗum goy waa'a, sa ma ki kayn naana ma kaam selem goy jar sumuna valamu.

⁹Hay li ma nigi feɗ sinena vigin ɗawni, nigi ma hin gal sine mara goy bay feɗ ne', ɦelena vi wan ma hin gaana nigi ma yawamɗi,

¹⁰vuɗna vi gulda-gulda ma hin goy hay sinena hiɗi ma yak gaana nigi ma yawamɗi. Nigi ma hin kayni goyo mi sa ma hawna hiɗi sa ma pulla. Nanu mi Ma-Vatɗina Lawna vigiya.

¹¹Nigi ma kul noŋɗi, nigi ma ka sin mi tuwgiɗi lay ɗut tuwgi jar-tuwgiɗi lay.

¹²Nigi ma yi va kigi waa'a hiɗi semda vanɗi, kay nigi ma muɗan semda van goy bisɗi. Nanu mi Ma-Vatɗina.

¹³Nigi ma curoɗ sugolayginɗi, nigi ma sli va kalam hiɗi donoɗi kaw. Sa ma ligi lop kay gurjuta nigi ma cak kay gurjuta valam ta-ta goy jifinɗi.

¹⁴Nigi ma cen kuɗ sa ma gidiŋɗi, nigi ma bur va gaa vok sa ma dukina kay nam ma tupa talamu a cap nig goy gaaɗi; kay mige nigi ma li nar kuɗ Lawna vigiya, nanu mi Ma-Vatɗina.

¹⁵Nigi ma li bay-ɗigerta hay kitata vigiɗi nigi ma gi dirgi kuɗ sa ma hawnɗi, gut kuɗ sa ma dononɗi kaw, may sugolgina nigi ma kaam kitata valam hiɗi hagat ta hay liya'ta.

¹⁶Nigi ma mer labar ma waa'a goy jar sumuna vigiɗi, tun law kay sugolgina a ɦokom busuwam goyɗi, nanu mi Ma-Vatɗina.

¹⁷Nigi ma ka gaw hiɗi sugolgina hay dikgi noŋɗi, nigi ma hin sugolgin bay dum kiramɗi, may nigi tun sulukŋa vi sa hen kigiɗi.

¹⁸Nigi ma gar kay hot jootɗi, nigi ma ŋay va hay dikgiya kat sumuna vigiɗi, nigi ma min sugolgina ki tuwgi nala. Nanu mi Ma-Vatɗina.

¹⁹Nigi ma li kuɗ gatta vanu, faray ma jafam valamu valamuna nigi as cukum tam tuwam kay fil tuwamɗi. Sinena vigiya nigi ma cuk wal slen gaa hayam kuɗ batam ma'ɗi; nigi ma cuk sligar ma ciliy hiɗi zigewn kuɗ batam ma'ɗi.

²⁰La san bura lebo vi cile hiɗi cat ta gorvo'o, la na' ka gaɓay kay sa mara'a, la tuwa' may gusiɗi lebo na' may buti goyɗi, ma watsiya may as cisi goyɗi, kay na' may buti goyɗi.

²¹Sa jufna ma mar ɦu-gamala mi Ma-Vatɗin kep goy vun guɗuk ma fi-tuwna, kay li ɗifin kay joo ma nam lumna.

²²Mul-ma-ɗifinna ma li poor kalamu vok Ma-Vatɗina hiɗi ɦu-gamalana, kuɗ suluk ma nam lumna, kayni mi ɗifin ma kay sulukŋa, nam ma fi gida kay suluk ma nam lumna.

²³Hay li ma nigi co hay nagat ɗawni, la nigi pi gu ma vuɗnawa, nigi ma ɗuwum vuɗna valamu ki nam liwisi nala ir busat ɦidi, nam liwis kigiya nigi as tum noŋɗi.

²⁴Hay busata fiɗita, vuɗna valam kaf nigi ma vulum goy mi Ma-Vatɗina hay firita ŋolda.

²⁵Hay busata vaslta, nigi as ti vuɗna valam yo, nigi ma tun caw yawam vuɗna valamu. Nanu mi Ma-Vatɗina, Lawna vigiya.

²⁶Nigi ma ti va hiɗi busuwn noŋɗi, nigi ma ɗuw guyna hiɗi ɗugulla kay li gul-yalda hiɗi nam noŋɗi.

²⁷Ɗuŋus ma kigina nigi ma kaam jukjuriɗi, jiwergi nigi ma welem hay gal kepɗi kaw.

²⁸Nigi ma ɓir va tam sliwgiya kuɗ sa ma mitinɗi, nigi ma ɗo va tigi noŋɗi, nanu mi Ma-Vatɗina.

²⁹Nigi as vul goota vigi goy hay law ma waana kay na' ma muɗ goy viyuwɗi, kay sum sa hay nagatn ɗawn ma muɗ viyuwu, hob hiɗi sum sa ci matna.

³⁰Nigi ma li kuɗ buura van ma sabatna, nigi ma girif liyna van ma peldetna. Nanu mi Ma-Vatɗina.

³¹Sum sa job ŋusiyana nigi ma tuɗ kuɗsiɗi, tuɗgi kuɗ sum sa tun gireynɗi; nigi ma garsi noŋɗi, kay nigi ma li tuwgi gesay hiɗi nisi noŋɗi. Nanu mi Ma-Vatɗina, Lawna vigiya.

³²Nigi ma fok kulo vok sa ma ɗuŋus haɓn kalamna, sum sa maariyana nigi ma hum kuɗsiya. Nigi ma li nar kuɗ Lawna vigiya. Nanu mi Ma-Vatɗina.

³³La sa ma pul co mus ziy jargi hay nagata vigiya, nigi ma curoɗom noŋɗi.

³⁴Sa ma pulla ma musi ziy jargina nigi ma ɗuwum ki sa ma vuɗin nala, nigi ma minim ki nigi min tuwgi nala, kay nigi ay pulu hay nagata Egipte. Nanu mi Ma-Vatɗina Lawna vigiya.

³⁵Nigi ma li bay-ɗigerta vun kitatɗi, hay sle ma ŋaɓ fiyokkaɗi, hay sle ma ŋaɓ nekkaɗi, hay dutta-kustaɗi kaw.

³⁶Kilo ma ŋaɓ nekŋa, goto ma ŋaɓ wana, hiɗi gasas ma ŋaɓ mula kaw nigi ma lum hay liyamu. Nanu mi Ma-Vatɗina, Lawna vigiya ma yawgiyay goy hay nagat Egipte pana.

³⁷Gatta vanu hiɗi sle ma nan dumna kaf nigi ma hum kuɗumu, nigi ma ŋomom hay dikgiya. Nanu mi Ma-Vatɗina.