Read Masana SA LEVITNA 20 Bible Online

SA LEVITNA 20 - Masana bible

SA LEVITNA 20

¹Ma-Vatɗina di tam Musus:

²Naŋ ma di tam gurona vi Israyel ala: La sa ma vuɗina jar gurona vi Israyel lebo sa ma pul jargiya kaw, la nam vi goora valam mara'a vulum goy mi Molok ni, kitata valam ti mitta. Sum sa hay nagat kaf ma gum hiɗi goorhoyona.

³Sa ma ki kayn nalana, nan ma muɗ iran goy talamu, nan ma kaam selem goy jar sumuna valamu, kay nam vul gurona valam goy mi Molok, muɗ liyna van ma peldetn goy liwisi, muɗ semda van goy waa'a kaw.

⁴Sa ma vul goora valam goy mi Molokŋa, la sum sa hay nagatna jak humsi kalamɗi, la nisi cum goy matɗi,

⁵nan kay tuwan ma muɗ iram goy tam sa namna hiɗi jafna valam kaf, nan ma kaam selem goy jar sumuna valamu, namu hiɗi nisi kaf sa muɗ tuwsi viyuw kuɗ Molok ki nam nalana.

⁶La san muɗ iram tam sa mitina hiɗi ŋusiyana, kay tuɗ muɗ tuwam waa'a kuɗ sle namna, nan ma muɗ iran goy kat sa namna, nan ma kaam selem goy jar sumuna valamu.

⁷Nigi ma li tuwgi goy peldete, nigi ma lak peldete, kay nan mi Ma-Vatɗina Lawna vigiya.

⁸Nigi ma li kuɗ gatta vanu, nigi ma ŋoma' kulo kigiya, nanu mi Ma-Vatɗina ma ligi goy peldete.

⁹San gigekaw, la nam ŋul bulumu lebo sulumu, kitata valam ti mitta; kay nam ŋul bulumu lebo sulumu, busuwam ma tun kalamu.

¹⁰La san li zlata-bulo'o hiɗi cata vi sugolomna, sa namna hiɗi cata kitata visi ti mitta.

¹¹La san bur hiɗi cata vi bulumu, ɗuw nalata vi bulumu, sana hiɗi cat kayni kitata visi ti mitta, busuwsi ma tun kisiya.

¹²La sa burawa hiɗi cata vi goora valamu, nisi ma' pet kitata visi ti mitta; kay kayn mi goɓna, busuwna visi ma tun kisiya.

¹³La san bur tam sa jufna ki buur ma tam cata nala, nisi ma' pet lum kayn mi law ma liwisi, kitata visi ti mitta: Busuwsi ma hot tun kisiya.

¹⁴La san sli goota hiɗi su' kuɗum ca'a, nam cum kayn mi mati, nam hiɗi nisi pet ma ŋalsi goy hay kuta, kay joot ma li jargi loɗi.

¹⁵La san bur hiɗi faraya, kitata valam ti mitta, farayn namna nigi ma cum goyo kaw.

¹⁶La cat tuɗ tam muura kay muɗ tuwa' viyuw hiɗi namu, nigi ma ci cat goy lay ci muura goy lay; nigi ma cisi goyo, busuwsi ma hot nig kisiya.

¹⁷La san sli ɓasulumta, goota vi bulumu lebo goota vi sulum kuɗum ca'a, la nam wi nalat va'a, na' kaw wi nalata valamu ni, kayn yawi, ma cisi goy haraŋ kir sumun kafe, kay nam wi nalata vi ɓasulumta, nam ma ziy zumalda vi suluk ma nam lumna.

¹⁸La san burawa tam cat ta busuwn jaŋ goy ta'ta, la nam wi nalata va'awa, la na' kay tuwa' kaw wi busuw ma jaŋ goy ta'anawa, nisi ma' pete ma kaasi sesi goyo jar sumuna visiya.

¹⁹Basum buŋga lebo ɓasum suŋga naŋ as sar nalata va'ɗi, kay kayni ti sugoloŋ vuɗita. Sum sa ki kayn nalana ma fi mitta.

²⁰La san burawa hiɗi cata vi nasulumu, nam sara' kayn ti nalata vi nasulumu; nisi ma ziy zumalda vi sulukŋa visiya, nisi ma mit bay guro'o.

²¹La san sli cata vi ɓasulumna, kayn mi law ma liwisi; nam ɗuwa' kayn ti nalata vi ɓasulumna, nisi ma' pet ma fi guroɗi.

²²Gatta vanu hiɗi sle ma nan dumna kaf nigi ma li kuɗumu, nigi ma li lop hiɗi namu, kay nagat ta nan min nargi li ziy haya'ta ɗawni ma noygi goyɗi.

²³Jaf-sum sa nan min digiɗsi vokgin ɗawni, sle ma nisi lumna nigi ma lumɗi, kay slen kayni kaf nisi lumu, nisi muɗi kiran liwisi.

²⁴Nan digi goy jew ala: Nagata visi ma muɗ vigiya; nan ma vulgit kay nigi lak haya'a, kayni ti nagata ta miira hiɗi yumda ka riŋ goy haya. Nanu mi Ma-Vatɗina, Lawna vigiya, ma jagi jargi goy hiɗi sum segena.

²⁵Nigi ma li poŋ-irta jar muuriyan ma peldetna hiɗi ma peldetɗina, jar layayn ma peldetna hiɗi ma peldetɗina, kay a sumuna vigi ma muɗ liwisi kuɗ muuriyanɗi, kuɗ layaynɗi, kuɗ sle ma ɦarmat kay nagatnɗi kaw. Kay nan hatgiyawa a nigi ma poŋ ir sle ma liwisna.

²⁶Nigi ma lak peldete kuɗan nanu, kay nanu nan peldete, nan Ma-Vatɗina; nan poŋgi irgiyawa goy hiɗi jaf-sumuna, kay nigi ma lak peldete ir vanu.

²⁷La sa jufu lebo ca'a kaw ka hiɗi ŋusta ta job kuɗ sa mitina lebo tun gireya, ci sum nisin goy hiɗi goorhoyona, busuwsi ma tun kisiya.