Read Masana SA LEVITNA 24 Bible Online

SA LEVITNA 24 - Masana bible

SA LEVITNA 24

¹Ma-Vatɗina di tam Musus ala:

²Naŋ ma di tam gurona vi Israyel ala nisi ma maraŋ mul olivena ma kilira, ma bay-rigasna, kay fitilla ma li doy dok-doko.

³Aaron ma kotom ɗawni goy bugol sligar ma gaɓayna ma ka vok di-goyta, hay guɗuk ma fi-tuwna, ma Aaron kotomna ɗawni, kay a fitilla ma ŋal dok-dok, tun caw tam vulatita. pa ta-ta graw culumta, hay vok ir Ma-Vatɗina. Kayni ti gatta ta hini dok-doko kay jaf ma bugolgina.

⁴Nam ma zlar fitilla kulo kay va ma tun fitilla ma koti hiɗi ora ma bay-rigasna, kay nam ma ŋal dok-dok vok ir Ma-Vatɗina.

⁵Naŋ ma yaw futuw ma digeɗna, naŋ ma kot hambulla doogo yam ma'; kot hambul ma kepna hiɗi futuwn ir goto karkiya karkiya.

⁶Naŋ ma jakam kulo kay tuwam kuɗ batam ma', kayn di ala ma karkiyan naŋ jakam kulo kay tuwam kepe, kulo kay tablena ma kori hiɗi or ma bay-rigasna ma ka vok ir Ma-Vatɗina.

⁷Naŋ ma jo urdi ma hisna kalam kafe, naŋ ma tunum kay funa ki gi-humda nala, ki ɗifin ma ŋalay hay kuta nala vok ir Ma-Vatɗina.

⁸Hay buur ma sabatna kaf, ma zlar fun namna vok ir Ma-Vatɗina dok-doko. Kayni ti bonota ta vatɗita ta gurona vi Israyel ma li kuɗa'a.

⁹Tin namna ma hin vi Aaron hiɗi gurona valamu, nisi ma tum hay liyn ma peldetna; kay nam ma hin ɗawni mi va ma peldete kisiya, galla vi ɗifinna ma ŋalay hiɗi kuta vok ir Ma-Vatɗina. Kayni ti gatta ta hini ta-ta hay vatɗita.

¹⁰Goor mara kep sulum ti cat ta Israyelta, bulum mi sa ma Egiptena, nam co jar gurona vi Israyel hay farana. Nam nef tuwam hiɗi sa ma Israyella.

¹¹Goora vi cata Israyelta yi sem Lawn hay vunamu, ŋul sem Lawna. Nisi maram tam Musus. Sulum ya' ala Selomit, goota vi Dibri, hay jafna vi Dan.

¹²Nisi gum daŋgaya, ta-ta nisi cub va ma Lawn min dum mi Musus kay sa namna.

¹³Ma-Vatɗina di tam Musus ala:

¹⁴Sa ma yi semda van hay vunam waan kayni naŋ ma kalamay goy hay guɗukŋa, sum sa humumna kaf ma tun bisi kalamu, tokŋa kaf ma gum hiɗi goorhoyona.

¹⁵Naŋ ma di tam gurona vi Israyel ala: San gigekaw, la nam ŋul semda vanawa, nam ma ziy zumalda vi sulukŋa valamu.

¹⁶Sa ma yi semda vi Lawnawa waa'a, kitata valam ti mitta. Tokŋa kaf ma gum hiɗi goorhoyona. La nam mi sa mi pulu lebo goor ma vuɗiya kaw, ma cum goy hiɗi goorhoyona, kay mige nam ŋul sem Lawna.

¹⁷La san ci mara mati, kitata vi san kayni ti mitta.

¹⁸La san ci va ma faray mati, nam ma vurna mara hay baŋalamu. Irita kay irita.

¹⁹La san ka tuw sugolomna goy mili, ma li talamu ki nam li nala kaw.

²⁰Kus-zokŋa kay kus-zokŋa, ira kay ira, siya kay siya, ma ka mil tam sana ki nam ka mil tam sugolomna nala kaw.

²¹La sa ci va ma faraya, nam as vurna mara hay baŋalamu, may sa ma ci sa mati, kitata valam ti mitta.

²²Gatta nigi ma tuna' ŋray ca kay sa ma pulla hiɗi sa ma vuɗina, kay nanu mi Ma-Vatɗina Lawna vigiya.

²³Musus di tam gurona vi Israyel, sa ma ŋul sem Lawna nisi kalamay goyo, cum goy hiɗi goorhoyona. Nala gurona vi Israyel hot yisi gaa kuɗ dita ta Ma-Vatɗin da'ays mi Mususta.