Read Masana SA LEVITNA 25 Bible Online

SA LEVITNA 25 - Masana bible

SA LEVITNA 25

¹Ma-Vatɗina law tam Musus kulo kay hiɗiyt Sinay:

²Naŋ ma di tam gurona vi Israyel ala: Hay li ma nigi co hay nagat ta nan min vulgit ɗawni, nagat ma tun suka'a: Kayni mi sabatna ma suburan semda vanna.

³Hay busat karkiya, nigi ma cuk jafna, hay busat karkiya, nigi ma par yam gulda-guldan goyo; nigi ma yawam vuɗamu.

⁴May busat ta siɗiyat ɗawni ti busat ta sabatna, liyn ma nagat as fi tun suku, sabatna ma subur sem Ma-Vatɗin hayamna, nigi ma cuk jaf hay sinena vigiɗi, nigi as par yam gulda-guldan goyɗi kaw.

⁵Wan ma yak gaa kuɗ feɗna (hot day kay tuwamna) kaw nigi as feɗem loɗi, vuɗ gulda-guldana vigi ma may paray goyɗina nigi as jam loɗi. Kay kayni ma li ɗawn ti busat ta tun-sukka vi nagata.

⁶Slen ma nagat ma vuɗumu hay busat ta sabatna va'a ma li mi tina vigiya, nigi hiɗi sa sunda vigiya, hiɗi boy sa sunda vigiya, sum sa ka ligi lop kay gurjuta, hiɗi sum sa pulla sa ka li ziy jargina,

⁷tina vi farayna hiɗi muuriyana ma ka hay nagata vigina; slen ma nagat vuɗum kafna ma lin mi tina vigiya.

⁸Nigi ma ŋaɓ sabatna vi busat siɗiya, sabat ma kepna hay busat siɗiya, busata vi sabat namna ma siɗiyana ma tap pet dok-fiɗi yam zleeŋe.

⁹Hay buurta doogota vi til ma siɗiyana, nigi ma buw togolomn kulo ŋolo, hay buura vi poor ɗawni, nigi ma buw togolomna hay nagata vigi noŋ kaf.

¹⁰Nala busat ta dok-vaslta nigi ma la' goy peldete, sum sa hay nagat kaf nigi ma butsi goyo: Ma li ɗawn ti busata vi firita. San gige gige jargiya ma hot hay vocota valamu, ma hot hay jafamu kaw.

¹¹Busata dok-vaslta ma li ɗawn ti busata vigi ta firina: Nigi ma cuk jaf noŋɗi, wan ma day hay sinen kay tuwamna nigi ma feɗemɗi kaw, gulda-gulda ma yalam may paray goyɗina nigi ma jamɗi kaw.

¹²Kay kayni mi busa ma firina. Nigi ma ɗuwumu ki va ma peldete nala, nigi ma ti sle ma vuɗ hay sinen kay tuwamna.

¹³Hay busat na'ta vi firit ɗawni, san gige gige jargiya ma hot hay vocota valamu.

¹⁴La nigi gus va goy mi sugolgina lebo la nigi gus va hay ɓam sugolgina kaw, hin sa ɗut ɓasulumɗi.

¹⁵Nigi ma gus (tin) hay ɓam ɓasukina ɗawni, nigi ŋaɓ busata, tun cawis tam busata vi firit pa; nam kaw gus (tin) migi nigi ɗawni, tun cawis tam busata vi firit pa lay.

¹⁶Hay li ma busat ka hini ŋol tuwa'ana, nigi ma ɦur gusta kulo voka'a, hay li ma busat ka hot gaa'a, nigi ma hot gusta gaa'a kaw. Kay nam gusgit goy kayn mi ŋaɓta vi wan ma feɗayna.

¹⁷San jargi gigekaw ma ɗut sugolomɗi, nigi ma li nar kuɗ Ma-Vatɗina Lawna vigiya kaw;

¹⁸ligi lop hiɗi gatta vanu, ŋomgi dita vanu, ligi lop hiɗi na'a kaw; ki kayn nala nigi ma lak hiɗi sle'ta hay nagata.

¹⁹Ki kayn nala jafn ma vuɗ hay nagat ŋolo, tin ma suwgi suwi goyo, nigi ma lak hay sle'ta kaw.

²⁰Kla, nigi ɗawn ma di ala: Hay busat ta siɗiyat ɗawni numa ma tum mige; kay numa may cuk jafɗi, may fe'ɗi lay?

²¹Mayɗi, nan ma gigi bolo hay busata karkiyata, jaf ma li hay busat na'ta ɗawni ma li ir busat ɦidi.

²²Nigi ma cuk jafna hay busata glafandita, nigi ma tum ɗawn mi wan ma nigi feɗem jewna, ta-ta hay busata zleeŋeta, ta-ta co vun jaf ma wulina, nigi ma tum ɗawni mi wa ma busa buumna.

²³Sa as gus nagat goy kay dok-dokɗi; kay nagat waŋŋi na' vanu, nigi kaw lakay hay nagata van lakŋi ki sum sa pulu, sa lum lakŋi mi ziy ɦawa'a nala.

²⁴La nigi co hay nagat, ta nan vulgit tarige kaw, nigi ma col gatta kay sumun ma hot gus vocota visiya.

²⁵La ɓasuki mara muɗ hawi, nam gus gal vocota valam goyo, sugolom ma goboy ma yaw vocota valamna ma co'o, hot gus nagat ta nam gusa' goyo mi goor-bulumna.

²⁶La sa ma yaw vocota vi sa namna mayɗi, la nam kay tuwam fi va ma nam hot gus nagata valamnawa,

²⁷san ma ŋaɓ busata, tun caw tam busata ta nam gus nagat goyn pa, niyna valamu nam hot vulum mi mulamna, hot vul vocota mi mula'na kaw.

²⁸La nam may fi va ma muɗ vocota valamnaɗi, voco na'ta ma hin hay ɓam sa ma gusa'na ta-ta hay busata vi firita. Hay busata vi firit ɗawni, nam hot mus hay vocota valamu, sa ma gus voco namna ma kal goyo may.

²⁹La ziyna vi san ka hay hoyok-ziyn ma ŋolla ma tuwam ŋuyi hiɗi gulmunna may nam gusum goyo, tun caw tam buur ma nam gusum goyn pa ta-ta co busa kep kayni, hagat ka kalamu kay a nam hot gus ziy namna.

³⁰May la ziy namna ma ka hay hoyok-ziyn ma ŋolla ma gulmun ŋuyi talamna, nam fi a gusumɗi ta-ta busat vat goyo, ziy na'ta ma hin dok-dok mi sa ma gusa'na hiɗi jafna valamu; hay busata vi firita kaw, nam as kal goy haya' loɗi.

³¹Ziyn ma ka goy hay hoyok-ziyn gurayna, ma gulmun may ŋuyi talamɗina, nam ŋray ca ki sine ɦawa nala, mulamna hagat ka kalam kay gusumu, hay busata vi firita sa ma gusumna as kal goyo kaw.

³²May hoyok-ziyn ma ŋulona hiɗi ziyna vi sum sa Levitna lakŋi, hagat ka kisi dok-dok kay nisi hot gusumu.

³³La san gus ziyna lebo hoyok-ziyna kaw hay ɓam sa Levitna, hay busata vi firit ɗawni, nam ma kal goy hay ziy namna, kay ziyna hiɗi hoyok-ziyna vi sa Levitna nam dok-dok visiya jar gurona vi Israyel.

³⁴Sine ma ka goboy hiɗi hoyok-ziyna vi sa Levitna sa as gusum goyɗi, kay nam dok-dok mi liyna visiya.

³⁵La goor-bugi ma ziyam galgina muɗawa hawi, ɓalam cukawa gaa kuɗumu, nigi as gutumu, nigi as li nala kaw mi sa ma pulla ma ka li ziy jargina, kay nam ma li ziy jargiya.

³⁶Nigi ma gar niy kuɗ sa namnaɗi, gar kay fi kuɗum suwɗi kaw, nigi ma li nar kay Lawna vigiya, nala goor-bugina mus ziy jargiya.

³⁷Nigi ma ni gurjuta mi goor-bugina, kay fi niy kuɗa'ɗi, nigi ma num wana kay fi kuɗum suwɗi kaw.

³⁸Nanu mi Ma-Vatɗina Lawna vigiya, ma yawgiyay goy hay nagat Egipte pana, kay vulgi nagata Kanaan, kay mus dok-dok Lawna vigiya.

³⁹La goor-buŋ ma ziyam galaŋŋa muɗawa hawi, la nam gus tuwamawa goy hay ɓaŋu, naŋ ma tunum lopn kalamu ki sa ma gorvo nalaɗi.

⁴⁰Nam ma mus hay ziyna vaŋ ɗawni ki sa ma li lop kay gurjuta nala, ki sa ma lum mi ziy ɦawa nala, nam ma li lopna vaŋu ta-ta co tam busata vi firita.

⁴¹Nam ma kal goy hay ziyna vaŋu, namu hiɗi gurona valam kuɗum lay, nam ma hot hay nagata vi sumiyamu.

⁴²Kay kayni si sa sunda vanu sa nan yawsiyay goy hay nagat Egipte pa; sa as gussi goyo ki san gus gorvo goyo nalaɗi.

⁴³Naŋ ma ɓe kulo kalamu kay curoɗomɗi, kay mige naŋ ma li nar kuɗ Lawna.

⁴⁴La nigi min gus gorvo'o lebo cat ta sungiya kaw, gargit jar sum sa ziysi ŋuyi galgina.

⁴⁵Nigi asay kaw a gus gurona vi sum sa pulla sa ka lakay ziy hay nagata vigiya, jafna visiya sa nisi ma vuɗsi hay nagata vigina; nisi ma muɗ si vocota vigiya.

⁴⁶Nigi ma hinsi voco'o mi gurona vigi sa bugolgina, nigi ma ŋomsi ki gorvona vigi nala ta-ta dok-doko. May jar guro-biyogin sa gurona vi Israyel kayni, nigi ma ɓe kulo kay mara'a kay curoɗomɗi.

⁴⁷La sa ma pulla ma ka musi hay nagata vigina muɗawa faraya, may la goor-bugi ma galamna muɗawa hawi, la nam cap gus tuwam goy hay ɓam sa ma pulla ma musi ziy jargina lebo hay ɓam sa ma hay jafna vi sa ma pulla,

⁴⁸hagat ka kalamu kay nam hot gus tuwamu, kep jar guro-biyomna as hot gusumu.

⁴⁹La mi nasulumu, lebo, goora vi nasulumu lebo kep jar sugoliyom sa goboyna kaw as hot gusumu. Lebo la nam ka hiɗi sle hay ɓalam neɗe, nam as hot gus tuwamu.

⁵⁰La nala, namu hiɗi sa ma gusumna ma ŋaɓ busata, tun caw tam busat ta nam gus tuwam goyta ta-ta tam busata vi firita, lop ma nam lumna ma ŋram kuɗ busat ta liy kafta, ma ŋram hiɗi wurakŋa vi sa ma li lop kay gurjuta.

⁵¹La busat hini ŋol lo, nam ma ŋra gurjut dig busa ma hinina, vula' mi mulamna kay muɗ tuwamu;

⁵²la hini neeɗa ɦawa a co tam busata vi firita, nam ma li ŋaɓta, nam ma wurak gurjut kay hot gus tuwamu, ŋram dig busa ma hinina.

⁵³Hay busat na'ta ɗawn nam muɗi ki sa ma li lop kay gurjuta nala, sa ma nam ka musi hay ziyna valamna naŋ hinim curoɗomɗi.

⁵⁴La haga mara ma nam hot gus tuwam hiɗi nam mayɗi, hay busata vi firit ɗawn nam ma kal goyo, namu hiɗi gurona valam kuɗumu.

⁵⁵Kay gurona vi Israyel li gorvo kayn hay ɓan nanu; nisi si gorvona vanu sa nan kalsiyay goy hay Egipte pana. Nanu mi Ma-Vatɗina Lawna vigiya.