Read Masana SA LEVITNA 26 Bible Online

SA LEVITNA 26 - Masana bible

SA LEVITNA 26

¹Nigi ma kot lawayn ma waana noŋɗi, va ma sli tuw sana hiɗi hiɗiyn ma ceɗina nigi ma kotomɗi kaw, hiɗiy ma ceɗi hiɗi vokom ki san nalana, nigi ma colom hay nagata vigiya kay girif gaa vokomɗi kaw; kay nanu mi Ma-Vatɗina, Lawna vigiya.

²Nigi ma li kuɗ sabatna vanu, nigi ma girif liyna van ma peldetna. Nanu mi Ma-Vatɗina.

³La nigi hum kuɗ gatta vanu, la nigi ŋom vun-ma-gatna vanu, li lop hiɗi namu kaw.

⁴Nan ma gi niyn tigiya hay liyna valamu valamu, jafna ma vuɗ hay nagata, gu ma hay sinen kaw ma vuɗ jafna valam hay liyamu.

⁵Hay li ma ɓigi pat goy tam tona vi alkamaren de kayni, nigi jok ɗawn kuɗ jana vi gulda-guldana, jana vi gulda-guldan ma co ta-ta tam jaf ma cukum wulina; fu ma tin ma suwgi suwi goyo, nigi ma lak hay nagata vigi hiɗi sle'ta.

⁶Nan ma hin toyt gaa kay nagata, sa ma as bulakgi senda kirgi may loɗi; muur ma siyna nan ma vatam goy hay nagata, kew-gaferaŋa ma jik hay nagata vigi loɗi kaw.

⁷Nigi ma mun sa gawt kigina, nala nisi ma cuk gaa vokgiya hiɗi kew-gaferaŋa.

⁸Sum sa vaslna ma mun sumun kis, sumuna vigi sa kisna ma mun sumun birim doogo, sa gawt kigina kew-gaferaŋa ma yaksi gaa vokgiya.

⁹Nan ma muɗ iran kirgiya, nan ma biyagi ŋol haca-haca', nan ma ŋom bonota van ta nan juna' hiɗi nigita.

¹⁰Nigi ma ti wa ma busa buumna, nigi ma yaw wa-buumna goyo kay vurna ma wulin baŋalamu.

¹¹Nan ma cuk ziyna van gaa jargiya, nigi ma muɗ kiran bis noŋɗi.

¹²Nan ma poy jargiya, nan ma mus mi Lawna vigi dok-doko, nigi ma lak si sumuna vanu kaw.

¹³Nanu mi Ma-Vatɗina Lawna vigiya, ma yawgiyay goy hay nagat Egipte pana, ma jagi jargiyay goy hay gorvota, jak ma nek ma tuni pelgina nan tom goyo, nan hingi poy hiɗi yigi kulo ja tiriŋ' kaw.

¹⁴May la nigi humɗi, la gatta kayni nigi li kuɗa'ɗi kaw,

¹⁵la nigi liw hiɗi Gatta vanu, la dita van muɗ kirgi bisi, la vun-ma-gatna van noŋ kaf nigi muɗ li lop hiɗi namɗi, la nigi kus bonot ta jaraytawa, nigi ma wi va ma nan ma lum tigin yo.

¹⁶Nan ma gi narta-ŋolda kigiya, moy ma loɗ-tuwna hiɗi ma gaŋ tuwaŋ kuna, nam ma liwekgi irgiya, ma kalgi hay lasta ŋolda kaw; nigi ma mak tuwgi ɦawa'a kay cuk jafna vigiya: Sa gaw kigina ma vurumumu.

¹⁷Nan ma muɗ iran goy katgiya, sa gaw kigin ma cigiya; sa gaw kigina ma ti mul kigiya, nigi ma mun jaŋ bay sa digiɗgiya.

¹⁸La hiɗi kayni kaf nigi may humanɗi, nan ma watgi sem siɗiya suwa kay sulukŋa vigiya.

¹⁹Donota vigi ta nigi subur tuwgi hiɗi na'ta nan ma vata' goyo; nan ma muɗ dukalawn kulo kigi ɗeŋ ki kawayn nala, nagat ta gaa kuɗgit nan ma muɗa' ɗeŋ ki wayn nala kaw.

²⁰Nigi ma to sutaygi ɗawn goy ɦawa'a, jaf ma hay nagat as vu'ɗi, gu ma kay nagatna kaw ma muɗ ɗawn vu'ɗi kaw.

²¹La nigi ŋelan vunanu, hum dita vanɗi kaw, nan ma watgi sem siɗiya suwa kay sulukŋa vigiya.

²²Nan ma gi muuriyan ma fulla katgiya, nam ma hingi goy bay guro'o, nam ma mut farayna vigiya, nam ma hingi ɗawn kiɗaya; hagana vigi muɗ ɗawn mi ful ɦawa.

²³La gatta na'ta cani may digi yalɗi, la nigi ŋelan vunan dok-doko,

²⁴nan ma watgi sem siɗiya suwa kay sulukŋa vigiya.

²⁵Nan ma hin kew-gaferaŋa co'o kay calgiya, kay job yam bonota van ta nan juna' hiɗi nigita; hay li ma nigi ka tokay hay hoyok-ziyn ma ŋolla, nan ma gi moy ma joon jargiya, nigi ma vulis goy hay ɓam sa gawt kigina.

²⁶Hay li ma nan kus dufunda vigi ta yi funawa goyo, boyn doogo ma muɗ yi fun hay giwin kepe, ma muɗ pow fun ŋuloɗi kaw, nigi ma tum ɗawn mi fu ma hobgiɗi.

²⁷La hiɗi kayn kaf nigi humanɗi, ŋelan vunan dok-doko,

²⁸nan kaw ma ŋelgi vungi hiɗi ɦiyda ŋolda, nan ma watgi sem siɗiya suwa kay sulukŋa vigiya.

²⁹Nigi ma mut sliw gurona vigiya sa jufayna hiɗi sa boyna.

³⁰Liyn ma nigi inim kulo'o kay girif hayna nan ma ɦom gaa'a, lawayn ma ceɗi mi fatta nan ma tom goyo, ŋumna vigiya nan molom kulo'o kay ŋumna vi lawayn ma waana vigiya, nigi ma muɗ kiran bisi.

³¹Hoyok-ziy ma ŋulona vigiya nan ma muɗum goy mi ful ma wiŋŋa, liyna vigi ma peldetna nan ma tom gaa'a, hista ŋaata vi urdina vigiya ma muɗ kiran joo'o kaw.

³²Nan ma ɓulak nagat goyo, sa gaw kigi sa li ziy haya' bugolda ɗawn ma muɗ ɦuyum'.

³³Nan ma mergi goyo jar jaf-sumuna, nan ma digiɗgi kuɗgi hiɗi kew-gaferaŋa. Nagata vigi ma ɓulak goyo, hoyok-ziyna vigi ma muɗ mi fulu.

³⁴Nala hay li ma nagat hin goy bay sa ɗawni, na' ma hob vun sabatna va'a, nigi ma kal goy hay nagata vi sa gawt kigina; ki kayn nala, nagat ma fi tun-sukka, ma hob vun sabatna va'a.

³⁵Nala nagat ma ɓulak goy ɗawni, na' ma hob vun sabatna ma nigi min hina'taɗina hay li ma nigi ays haya' tuwana.

³⁶Dir sum sa hin kuɗgin ɗawni nan ma muɗsi diksi hora. Hay nagata vi sum sa gawt kisin ɗawni, la muzuk mi hum popo ma goy soy kaw, nisi ma mun jaŋ vokomu; nisi ma mun jaŋi ki san ka jaŋ vok kew-gaferaŋa nala. Nisi ma yak gaa'a bay sa digiɗsi kuɗsiya.

³⁷Nisi ma yak gaa kay tuwsi tolol' ki vok kew-gaferaŋa nala, bay sa digiɗsi kuɗsiya. Nigi ma col kulo vok sa gawt kigina noŋɗi;

³⁸nigi ma mit goy jar jaf-sumuna, ma pigi ɗawn hay nagata vi sa gawt kigina.

³⁹sa hin kuɗgi irina sutaysi ma to'o kuɗ jiw-zlata visiya, hay nagata vi sa gaw kisina; sutaysi ma to'o kaw kay jiw-zlata vi sumaysiya.

⁴⁰Jiw-zlata visiya hiɗi jiw-zlata vi sumaysiya nisi ma hama' goyo, hiɗi raw-goyta hiɗi ŋel-vunda visi katan kaf,

⁴¹kayni mi suluk ma nan ŋelsi vunsi kalamna, nan kalsi goy hay nagata vi sa gawt-kisin kayn kuɗumu. Ki kayn nala diksi ma bay ka-gosayna ma muɗa, nala nisi ma wurak balla vi sulukŋa visiya.

⁴²Human ma ganu kay bonota van ta jaran hiɗi Yakubta, human ma gan kay bonota van hiɗi Isaak, hiɗi Abraham kaw, human ma gan kay nagata.

⁴³Nisi ma hin yam nagat goyo, na' ma hob vun sabatna va'a hay li ma nisi hina' ɓulakay goy gine hiɗi nisin ɗawni; nala nisi ma wurak balla vi jiw-zlata visiya, kay nisi min hum kuɗ dita vanɗi, kay gatta vanu muɗi kirsi bisi kaw.

⁴⁴May hay li ma nisi co hay nagata vi sa gawt kisin ɗawni, nan ma noysi man goy kafɗi, nisi as muɗ kiran bis a nan vatsi goy noŋ kafɗi, a nan ma ja bonota van goy hiɗi nisi noŋɗi; kay nanu mi Ma-Vatɗina, Lawna visiya.

⁴⁵Human ma gan kisi ɗawn kuɗ slugota vi bonot ta jewta, bonot ta nan kalsiyay goy hay Egipte kir sumun kaf hiɗi na'ta, kay mus dok-dok Lawna visiya. Nanu mi Ma-Vatɗina.

⁴⁶Lakŋi mi sle ma colina, dita hiɗi gatta kaw ma Ma-Vatɗin tuna' jaram namu hiɗi gurona vi Israyel, kulo kay hiɗiyta Sinay, dita ta nam da' hay vun Mususta.