Read Masana SA LEVITNA 27 Bible Online

SA LEVITNA 27 - Masana bible

SA LEVITNA 27

¹Ma-Vatɗina di tam Musus: Naŋ ma di tam gurona vi Israyel ala:

²La san yi va kalamu kay nam min vul sa tam Lawna, nam as muɗ sa namna hiɗi gurju'u.

³La naŋ min muɗum kayn mi sa jufu ma busata valam dok-ma' ta-ta dok-karkiya, naŋ ma wurak gurjuta ir sikel* dok-vasl, ŋram hiɗi sikel ma ka li lop hay liyn ma peldetna.

⁴La ti ca'a, naŋ ma muɗa hiɗi sikel dok-ɦidi.

⁵La mi sa juf ma busata valam vasl ta-ta dok-ma', naŋ ma muɗum hiɗi sikel dok-ma', sikel doogo kay goot-cata may.

⁶La mi goor-juf ma tun caw tam til kepe ta-ta busat vasl, naŋ ma muɗum hiɗi sikel vasl, gurjuta ir sikel ɦidi kay goot-cata may.

⁷Tun caw tam busat dok-karkiya ta-ta kulo kalam ɗaw, sa mi sa jufu, naŋ ma muɗum hiɗi sikel doogo yam vasl, la ti ca'a, naŋ ma muɗa' hiɗi sikel doogo may.

⁸La sa ma yi van kalamna nam haw ŋolo, donota valam kay muɗ san tayɗi, ma nar sa namna tam mul-ma-ɗifinna, mul-ma-ɗifinna ma tun wurak kalamu, wurak ma nam tunum kalamna ma ŋram hiɗi vana valam ma ka ɓalam ne'na.

⁹La kayn mi faray ma as lum ɗifin tam Ma-Vatɗina, farayn mige kaw ma vulum tam Ma-Vatɗina ma li mi ma peldete.

¹⁰As muɗum hiɗi maraɗi, vurna ma joon hay baŋal ma ŋaanɗi, vurna ma ŋaana hay baŋal ma joonɗi kaw; la vurna faraynawa hiɗi mara'a, nam ma' pet lakŋi muɗi peldete.

¹¹La kayni mi faray ma liwisi ma as lum ɗifin tam Ma-Vatɗinɗina, nar faray namna tam mul-ma-ɗifinna.

¹²Mul-ma-ɗifinna ma ŋa gurju ma kalamna, ŋram gusta valam kuɗ jifna valamu, la nam joo'o lebo ŋaa'a, nigi ma col kuɗ gus ma mul-ma-ɗifinna colomna.

¹³La mulamna min hot muɗumu, nam ma cuk gal-ma-vaslna vun gurju na'ta.

¹⁴La san min kay vul ziyna valam goy tam Ma-Vatɗina, mul-ma-ɗifinna ma ŋra gusna vi ziy namna kuɗ inda valamu, la nam ini ŋaa'a lebo joo'o. Nigi ma col kuɗ gus ma mul-ma-ɗifinna colomna.

¹⁵La sa namna min hot gus ziy namna, nam ma cuk gal ma vaslna vun gus ma colina, ziy namna ma hin malam may.

¹⁶La san min vul gal sine valam mara goy tam Ma-Vatɗina, nam ma col gusta valam ɗawni, ŋra' hiɗi ŋolda vi jaf ma min cukum hayamna, gurjuta ir sikel* dok-vasl kay wa-orge ma ir goto kis-ɦidina.

¹⁷La nam vul sinena valam goy mi Lawn kayn hay busat ta firita, nisi ma col kay gus ma naŋ colomna.

¹⁸La nam vul sinena valam goy kayn bugol busata vi firita, mul-ma-ɗifinna ma ŋra gusna kuɗ ŋolla vi busa ma hinina, ta-ta co tam busata vi firita, hot yaw gurju goy kuɗ ma nam ŋaɓamna.

¹⁹La sa ma vul sinena valam goy tam Lawna min hot gusumu, nam ma gi gal ma vaslna vun gurju ma ŋaɓina, sinen ma hin valamu may.

²⁰La nam min hot gus sine namna loɗi, la sa mara gusumawa, nam as hot gusum loɗi.

²¹Hay li ma sa ma gus sinen fok goy hay busata vi firit ɗawni, sine namna ma vulum goy tam Ma-Vatɗina, ki sine ma vuli goyn nala. Nam ma muɗ ti vocota vi mul-ma-ɗifinna.

²²La san vul goy tam Ma-Vatɗina sinen ma may valam jewɗina, ma nam gusum gusina ni,

²³mul-ma-ɗifinna ma ŋaɓ gusta valamu kuɗ hayamu ta-ta co tam busata vi firita, hay buur na'ta de' mul-ma-ɗifinna ma wurak gurjuta ta tuni kay sine namna, kayni mi va ma vuli goy tam Ma-Vatɗina.

²⁴Hay busata vi firit ɗawni, sinen ma hot hay ɓam sa ma gusum goyna, hay bam mulam ma vocotna.

²⁵Nigi ma col gusta vi sle namna kayni, ŋram hiɗi gurju sikel* ma ka li lop hay liyn ma peldetna. Sikel kep kayni ir gera* dok-ma'.

²⁶Sa as vul farayna valam ma vuɗi jewna goy tam Ma-Vatɗin loɗi kay namu vuli goy tam Lawn jewe, kay nam mi ma vuɗi jewna, la mi putu, la mi goor ɦu-dimiya kaw, nam vi Lawna.

²⁷La kayn mi muur ma liwisi, naŋ as ŋra gurjut kalamu, hot gusumu, gi gal-ma-vasln vunamu. La mulamna hot gusumɗi, naŋ as ŋra gurjut kalamu, gusum goyo.

²⁸La sa yi va kalamu kay vul va goy mi Ma-Vatɗina jar sle ma ir valamna, va namna as gusum goyɗi, mulamna as hot gusumɗi kaw; la malam mi sa'a, la mi faraya valamu, la mi sine valamu kaw; slen kaf ma giy goy tam Ma-Vatɗina nam muɗi ir vi Ma-Vatɗina.

²⁹San kaw ma vuli goy tam Ma-Vatɗina muɗi ir vi Ma-Vatɗina as butum goyɗi, cum ciy goyo tuta.

³⁰Gal-ma-doogona vi sle ma gaa kay nagatna kaf, la mi wa'a, la mi vuɗ guwa kaw, nam vi Ma-Vatɗina, kayni mi va ma vuli goy tam Ma-Vatɗina.

³¹La san min hot gus va ma nam vulum goy kuɗ gal-ma-doogona valamu, nam ma gi gal-ma-vasln vunamu.

³²Gal-ma-doogona vi luwayna hiɗi fukunayn kaf kayni, ma jikawa gaa kuɗ zuguldana,[3] nam mi gal-ma-doogona ma vuli goy mi Ma-Vatɗina.

³³La va namna ŋaa'a, joo'o kaw, nigi as sar kayn loɗi, la nigi vi put mara'a muɗumawa hiɗi put hena, nam ma' kaf lakŋi muɗi peldete, sa as hot gusum loɗi.

³⁴Kaf cani mi vun-ma-gatna ma Ma-Vatɗin vulum hay ɓam Musus mi gurona vi Israyel, kulo kay hiɗiyta Sinay.