Read Masana SA LEVITNA 3 Bible Online

SA LEVITNA 3 - Masana bible

SA LEVITNA 3

¹La san min li ɗifin tam Ma-Vatɗina kuɗ lop ma slugona, la nam min lum ɗifin mi putu, la mi ma jufu lebo ta ca'a kaw, nam ma vulum vok ir Ma-Vatɗin ɗawni, mi ma moy may talamɗina.

²Nam ma tun ɓalam kalamu, nam ma ŋatam goy vun guɗuk ma fi-tuwna, muliyan-sa-ɗifinna gurona vi Aaron ma yam busuwn goy tam giwin-ma-ɗifinna kafe.

³Ɗifinna vi lop ma slugona nam ma ŋalam hay kuta vok ir Ma-Vatɗina, mul ma tam ruwatna hiɗi mul ma tapay talamna kafe.

⁴Glesna ma ma'na, mul ma ŋuyi talamna, ma ŋuyi tam furta, mul ma kay dukka, nam ma poŋom iram ma vun glesna goyo.

⁵Gurona vi Aaron ma ŋalam kulo kay giwin-ma-ɗifinna, cukum kay guna ma ka kulo kay giwin-ma-ɗifinna. Kayni mi ɗifin ma ŋalay hay kuta, hista valam ŋaa ŋolo kir Ma-Vatɗina.

⁶La nam lum ɗifin mi ɦuwa, la mi ma jufu, la ti ta ca'a kaw, la mi ɗifinna vi lop ma slugona, nam ma vulum mi ma moy may talamɗina.

⁷La nam min lum ɗifin mi goor ɦu-dimiya, nam ma naram vok ir Ma-Vatɗina.

⁸Nam ma tun ɓalam kay va ma lum ɗifinna, nam ma ŋatam goy vun guɗuk ma fi-tuwna; muliyan-sa-ɗifinna, gurona vi Aaron ma yam busuwn goy tam giwin-ma-ɗifinna kafe.

⁹Ɗifinna vi lop ma slugo namna nam ma lum vok Ma-Vatɗin ɗawni, nam ŋalay hay kuta: Mul-sliwna, giɗerta noŋ kafe, nam ma poŋa' ira goy hiɗi yam-ŋoora, mul ma kay ruwatna hiɗi mul ma tapay talamna kafe.

¹⁰Glesna ma ma'na, hiɗi mul ma talamna, ma ŋuyi tam furta, mul ma kay dukka, nam ma ɓurawam jaram goy hiɗi glesna.

¹¹Muliyan-sa-ɗifinna ma ŋalam kulo kay giwin-ma-ɗifinna, kayni mi tin ma ɗifinna ma ŋalay hay kuta vok ir Ma-Vatɗina.

¹²La nam lum ɗifin kayn mi ɦu-me'e, nam ma naram vok ir Ma-Vatɗina.

¹³Nam ma tun ɓalam kay va ma nam min ŋatamna, nam ma ŋatam goy vok guɗukŋa ma fi-tuwna, gurona vi Aaron ma yamam busuwam goy tam giwin-ma-ɗifinna kafe.

¹⁴Va ma nam ŋatamna, nam ma lum ɗifini, ŋalam hay kuta vok ir Ma-Vatɗina; mul ma ka ŋuyi tam ruwatna hiɗi mul ma tapay talamna kafe.

¹⁵Glesna ma ma'na, mul ma ka ŋuyi talamna, ma ka ŋuyi tam furta, mul ma tam dukŋa, nam ma kaam jaram ma goboy tam glesna goyo.

¹⁶Muliyan-sa-ɗifinna ma ŋalam kulo kay giwin-ma-ɗifinna. Mul namna kaf kayni mi tina vi ɗifinna ma ŋalay hay kuta, hista valam ŋaa'a ŋolo kir Ma-Vatɗina.

¹⁷Kayni ti gatta ta hini dok-dok kay jafna vigiya, hay liyn kaf ma nigi li ziy hayn ɗawni, nigi ti mul-sliwnɗi, ti busuwnɗi lay.