Read Masana SA LEVITNA 6 Bible Online

SA LEVITNA 6 - Masana bible

SA LEVITNA 6

¹Ma-Vatɗina di tam Musus ala:

²Naŋ ma vul hagata tam gurona vi Aaron, naŋ ma disi ala: Kayni ti gatta ta tuni kay ɗifin ma ŋal-goyna: Ɗifin ma ŋalam goyna nigi ma lakam kulo kay giwinna hay henjet pa ta-ta liyn fo goyo, kuta ma ŋal kulo kay giwin-ma-ɗifinna.

³Mul-ma-ɗifinna ma cuk sligar-tuwna valam ma barawna, ma cuk kalesoŋ kuɗumu, butuw-kuna ma ŋalay kulo kay giwin-ma-ɗifinna nam ma yawam goyo, nam ma cukum goboy tam giwin-ma-ɗifinna.

⁴Bugol kayni nam ma fok sligara valam goyo, hot cuk mara talamu, kay nar butuw-kun goy gine hiɗi guruna goy hay liy ma bay-gese.

⁵Kut ma ŋal kulo kay giwin-ma-ɗifinna, na' as tew goy noŋɗi; graw culumta dok-dok, mul-ma-ɗifinna ma cuk gun kay kuta, ŋal kut kuɗ giwinna, nam ma ŋal mula vi ɗifinna vi lop ma slugona.

⁶Kut ma ŋal kulo kay giwin-ma-ɗifinna dok-doko, na' as tew goy noŋɗi.

⁷Kayni ti gatta ta vuliya kuɗ ɗifinna: Gurona vi Aaron ma nara' vok Ma-Vatɗina, vok giwin-ma-ɗifinna.

⁸Mul-ma-ɗifinna ma yaw kuɗ futuwna, hob way-ɓalamu, sli mula kaw, hiɗi urdi ma ŋalayna ma tapay tam va ma ɗifinna, nam ma ŋalam kulo kay giwin-ma-ɗifinna, ki gi-humda ta his ŋaa'a ŋolo nala tam Ma-Vatɗina.

⁹Dir ɗifinna ma hin goyna Aaron hiɗi gurona valam ma tumu; nisi tum ɗawni li kufn kiramɗi, nisi tum ɗawni lak hay liy ma peldete, goy hay wur-daŋŋa vi guɗuk ma fi-tuwna.

¹⁰Nisi ma kot tin namna hiɗi kufnɗi, kayni mi galla ma nan vulsiya kuɗ ɗifinna vanu ma ŋalay hay kuta, kayni mi va ma suwi peldete, ki ɗifinna vi poora hiɗi ɗifin ma kay sulukŋa nala.

¹¹Sum sa jufayna jar gurona vi Aaron kaf ma tumu. Kayni ti gatta ta hini dok-dok jar gurona vigiya, gatta ta hini kay ɗifinna ma ŋalay hay kuta vok ir Ma-Vatɗina: San gigekaw ma tun ɓalam talamu nam muɗi goy peldete.

¹²Ma-Vatɗina di tam Musus ala:

¹³Kayni mi ɗifinna ma Aaron hiɗi gurona valamu ma li'e tam Ma-Vatɗina hay buur ma mul ɦokawa kisiyana: Gal ma doogona vi dutta-kusta vi futuwn kepe, ki ɗifin ma hini jarsi dok-dokŋa nala, galam hena lum graw culumta, galam hena lum vulatita may.

¹⁴Nisi ma kot tin namna hay dowayna, kotom hiɗi mula, nigi ma maram ɗawn nam hiliɓiya, nigi vulum goy ɗawn nam zaliya, iram kaay goy valam waŋ waŋ ki ɗifin ma his ŋaa'a nala vok ir Ma-Vatɗina.

¹⁵Jar gurona vi Aaron, mul-ma-ɗifinna marige kaw la mul ɦokawa kalamu kay vurna baŋalamu, nam ma li ɗifin namna kaw. Kayni ti gatta ta hini dok-dok vok ir Ma-Vatɗina. Ɗifin namna ŋalam goy noŋ kafe.

¹⁶Ɗifinna vi mul-ma-ɗifinna ma li ŋalay goy kafe; sa as kay tum noŋɗi.

¹⁷Ma-Vatɗina di tam Musus ala:

¹⁸Naŋ ma di tam Aaron hiɗi gurona valam ala: Kayni ti gatta ta kay ɗifin ma poora, faray ma nigi ŋatam kay poora vok ir Ma-Vatɗina, nigi ma ŋatam hay liyn ma ŋat faray ma ŋal-goyna kaw. Kayni mi va ma suwi peldete.

¹⁹Mul-ma-ɗifinna ma ŋat ɦu namna as kay tumu, ma tum ɗawn hay liyn ma peldete, hay wur-daŋŋa vi guɗuk ma fi-tuwna.

²⁰San gigekaw ma tun ɓalam tam sliw namna muɗi goy peldete. La busuw yam goy tam sligara, liyn ma busuwn yam hayamna muzum goy hay liyn ma peldete.

²¹Doway nagana ma zal sliw namna hayamna ma tom goyo; la zalam kayn hay doway laŋga'a, korom hayam goyo, muzum goy hiɗi niyna.

²²sum sa jufayna sa li lop ɗifinna kaf as ti'e, kayni mi va ma peldet ŋolo.

²³May faray ma poora, ma naram busuwam hay guɗuk ma fi-tuwna, kay li poor hiɗi namu hay liyn ma peldetna, nigi as tumɗi, ma ŋalam sliwam goy hay kuta