Read Masana SA LEVITNA 8 Bible Online

SA LEVITNA 8 - Masana bible

SA LEVITNA 8

¹Ma-Vatɗina di tam Musus ala:

²Aaron hiɗi gurona valamu naŋ ma yawsiya, yawaŋ sligara, slaŋ mul ma ɦok kamna, vaŋ put ma poora, yawaŋ fok-gamala ma ma'na hiɗi tikisit ta fun-bay-kufn hayta;

³naŋ ma yi sumun kaf kay nisi ma tok goy vun guɗuk ma fi-tuwna.

⁴Musus li slen ma Ma-Vatɗin dum kalamna kafe; sumun tok tuwsi goy vun guɗuk ma fi-tuwna.

⁵Musus di tam tokŋa: Humgi va ma Ma-Vatɗin vul hagat kay lumu:

⁶Musus mar Aaron hiɗi gurona valam kulo talamu, nam muzsi goy hiɗi niyna.

⁷Nam cuk sligar-tuwn tam Aaron, junum kantin furamu, cukum sligar fiyok talamu, cuk sligar-ŋoŋ talamu, sligar-ŋoŋ namna nam jun kantin kalamu.

⁸Nam gi birim-ŋoŋ digamu, nam ci Urim hiɗi Tumim* tam birim-ŋoŋ namna.

⁹Nam tunum jakawat kalamu, or ma beɗayna nam tunum kulo voka'a, velevelta ta peldetta, ki Ma-Vatɗina vul hagata tam Musus nala.

¹⁰Musus sli mul ma ɦok-kamna, nam ɦokom kay liyn ma peldetna hiɗi slen ma talamna kaf, nam lum goy peldete.

¹¹Nam yam mula sem siɗiya kay giwin-ma-ɗifinna, nam ɦok mul kalamu, hiɗi jak ma talamna kaf, doway-firina hiɗi diram ma gaana kaw, kay lum goy peldete.

¹²Nam ɦok mula kay yam Aaron, kay lum goy peldete.

¹³Musus mar gurona vi Aaron talam kaw; nam cuk sligar-tuwn tisiya, jun kantin fursiya, tunsi poki kisiya, ki Ma-Vatɗina vul hagata tam Musus nala.

¹⁴Nam mar put ma poora talamu, Aaron hiɗi gurona valam tun ɓisi kay put namna.

¹⁵Musus ŋat putna, yaw kuɗ busuwna, cita-ɓalam ma ŋuruɓi hiɗi busuwna nam korom kulo tam miyokŋa vi giwin-ma-ɗifinna kaf, giwin-ma-ɗifinna nam lum goy peldete; busuwna nam yamam gaa sem giwin-ma-ɗifinna, lum goy peldete kay li poor hayamu.

¹⁶Mul ma tam ruwatna nam yawam kafe, mul ma kay dukŋa, gles ma ma'na hiɗi mul ma kalamna kaw, nam ŋalam kaf kulo kay giwin-ma-ɗifinna.

¹⁷May putn kay tuwamu hiɗi bakamu, sliwamu hiɗi suɗoyom kaf nam ŋalam goyo, goy gine hiɗi guruna, ki Ma-Vatɗina vul hagata tam Musus nala.

¹⁸ɦu-gamala ma ŋalam goy ɗifinna nam maram goboyo, Aaron hiɗi gurona valamu tun ɓisi kay ɦu namna.

¹⁹Musus ŋat ɦu namna, nam yam busuwn goy tam tuw giwin-ma-ɗifinna noŋ kafe.

²⁰Nam ka ir ɦun goyo; yamna nam ŋalamu, sliwam ma kaay goyna hiɗi mula nam ŋalam goy kafe.

²¹Ruwatna hiɗi gayna nam muzum goy hiɗi niyna, ɦu-gamalana nam burum kulo kay giwin-ma-ɗifinna ŋalam goy noŋ kaf; kayni mi ɗifin ma ŋal-goyna, ɗifin ma ŋalay kay kuta, hista valam ŋaa'a ŋolo kir Ma-Vatɗina, ki Ma-Vatɗin vul hagat tam Musus nala.

²²Nam mar ɦu-gamala hena, ɦu-gamala ma vul san goy ɗifin hiɗi namna, Aaron hiɗi gurona valamu tun ɓisi kay ɦu namna.

²³Musus ŋat ɦu-gamala namna, sli busuw mara ne', jom hay hum Aaron ta jufta, hay cita-ɓalam ŋolda ta jufta, hay cita-selem ŋolda ta jufta kaw.

²⁴Nam mar gurona vi Aaron talam goboyo, tun busuwn hay zeŋ-humsi ma gal jufn kaf, hay cita-ɓisi ta ŋolda ta jufta kaf, hay cita-sesi ta ŋolda ta jufta kaf kaw, nam yam busuwn goy tam tuw giwin-ma-ɗifinna noŋ kaf.

²⁵Nam yaw mula hiɗi giɗera, mul ma tam ruwatna noŋ kafe, mul ma kay dukŋa, gles ma ma'na hiɗi mul ma talamna, hiɗi bigiy ta jufta;

²⁶nam sli tikisita ta fun-bay-kufn haya'ta, ta tuni goy vok ir Ma-Vatɗina, nam sli hambul ma bay-kufna, hambul ma hiliɓi hiɗi mula kaw, hiɗi hambul ma ɦawana kaw, nam lakam kay mula hiɗi bigiy-ɦuna ma jufna.

²⁷Slen kayni kaf nam vulum hay ɓam Aaron hiɗi gurona valamu, nisi muɗum galam kulo vok ir Ma-Vatɗin kaf.

²⁸Bugol kayni Musus hot yawam hay ɓisiya, nam ŋalam kulo'o kay giwin-ma-ɗifinna, kulo kay va ma ŋal-ɗifinna: Kayni muɗi mi ɗifin ma vul san goyna, ma ŋalay hay kuta, hista valam ŋaa'a ŋolo kir Ma-Vatɗina.

²⁹Musus sli war-digŋa vi ɦuna ma vul san goy hiɗi namna, nam muɗum galam kaf kulo vok ir Ma-Vatɗina, kayni mi galla vi Musus, ki Ma-Vatɗina vul hagat talam nala.

³⁰Musus sli mul ma set-tuwna hiɗi busuwna ma ka kulo kay giwin-ma-ɗifinna; nam yamam goy kay Aaron hiɗi sligara valamu, kay gurona vi Aaron hiɗi sligara visi kaw. Nam gi Aaron ɗifini, sligara valamu, gurona valamu, sligara visiya hiɗi nisi kaw.

³¹Musus di tam Aaron hiɗi gurona valam ala: Nigi ma zal sliwna kalaf hay guɗuk ma fi-tuwna, kayni mi liyn ma nigi ma ti hayna, hiɗi fun ma ka kalaf hay tikisit ta vul san goy hiɗi na'ta, ki nan vul hagat nala ala Aaron hiɗi gurona valamu ma tumu.

³²Dir funa hiɗi dir sliwna ma hin goyna nigi ma ŋalam goy hay kuta.

³³Ir buur siɗiya, nigi ma kali goyo hay vun guɗuk ma fi-tuwn noŋɗi, say buura vigi ma vulgi goyna vat tuwa, kay buur ma siɗiyan lakŋi, kay vulgi goy mi Ma-Vatɗin hayamu.

³⁴Va ma li vaydin kayni, Ma-Vatɗina vul hagata kay lumu ki poora vigi nala.

³⁵Ki kayn nala nigi ma lak kalaf hay guɗuk ma fi-tuwna ir buur siɗiya, henjeta hiɗi falayta; nigi ma li kuɗ gatta vi Ma-Vatɗina kaw, kay nigi ma mitɗi, kay kayni ti dita ta vuli tanu.

³⁶Slen ma Ma-Vatɗina dum mi Mususna Aaron hiɗi gurona valam li kuɗum kaf.