Read Masana YEREMIYAS 1 Bible Online

YEREMIYAS 1 - Masana bible

YEREMIYAS 1

¹Dita vi Yeremiyas, goora vi Hilkiya, kep jar muliyan-sa-ɗifinna hay Anatot, hay nagata vi Benyamin.

²Ma-Vatɗina di yoboyn talamu hay liyna vi Yosiyas, goora vi Amon, mulla vi Yuda, hay busata doogo yam ɦidita vi mulda valamu.

³Van li ki kayn nala, hay liyna vi Yoyakim goora vi Yoziyas mulla vi Yuda, ta-ta hay vatta vi busata doogo yam kepta vi Sedekiyas, goora vi Yoziyas, mulla vi Yuda, ta-ta hay liy ma sum sa hay Yerusalem kalis goy gorvo'o, hay til ma vaslna.

⁴Ma-Vatɗina ka di yoboyn tan ala:

⁵Jew a nan tunaŋ hereŋ hay suŋ kalafi, nan ay waŋu, jew a naŋ kali goy haya' pa, naŋ ay giy ɗifin kan vatiya, naŋ ay tuni sa ma jobta vi jaf-sumuna hay jew ɓa-ɓa.

⁶Nan hot dita: Hih! Bum-Sumuna, Ma-Vatɗina, saraŋ tige, nan may wi dit noŋɗi, kay nanu mi goor-gooro.

⁷Ma-Vatɗina hot di tanu: Naŋ ma di ala naŋ mi goor-gooroɗi, Kay naŋ tuɗ ɗawni kat sum sa nan min gaŋ tisina, slen ma nan daŋgi kafna naŋ ma disita.

⁸Naŋ ma li nar kisiɗi, kay nan ka hiɗi naŋu kay butaŋ goyo, din mi Ma-Vatɗina.

⁹Bugol kayni Ma-Vatɗina meɗ ɓalam goyo, jon vunanu, nam di tanu: humaŋu, naŋ tun yoboyna vanu hay vunaŋu.

¹⁰Ɗuwaŋ tige, vaydi nan tunaŋ mulu kay jaf-sumuna hiɗi muliyana, kay naŋ ma pat sle hen kulo'o, kay naŋ ma ka sle hen gaa'a, kay naŋ ma ɓulak slena, kay naŋ ma ɦo sle hen gaa'a, kay naŋ ma in sle hegen kulo'o, kay naŋ ma pi sle hegen gaa'a.

¹¹Ma-Vatɗina ka di yoboyn tan ala: Iraŋ wum mige Yeremiyas? Nan hot dit ala: Iran wi gu-amandena* ma ras koloyna.

¹²Ma-Vatɗina hot di tanu: Naŋ wi hay liyamu, kay nan ka musi jigere kay dita vanu, kay hoba' vuna'a.

¹³Ma-Vatɗina ka di yoboyn tanu sem ma ma'na lo ala: Iraŋ ka wum mige? Nan hot dita: Nan wi dowayta ka zal wilik-wilik', hay gal ma gaana.

¹⁴Ma-Vatɗina hot di tanu, bakmara ma nig kay sum sa kay nagat kafn ɗawni, nam ma may hay gal ma gaan pa.

¹⁵Humaŋu, jaf-sumuna sa hay mulda ta gal gaata nan min yisi ay kafe, nisi ma co'o, nisi ma zlar zlamda-mulda visiya hay vun-galana ma kal kalaf hay Yerusalem kafe, nisi ma ŋuy tuw gulmunna va' kafe, nisi ma ŋuy hoyok-ziyna vi Yuda kafe, din mi Ma-Vatɗina.

¹⁶Nan ma ka kitata van kisiya, kuɗ joota visi kafe, kay nisi noyan goyo, nisi li ɗifin ma no'osna tam lawayn mara'a, kay nisi girif gaa'a vok sle ma nisi inim hiɗi ɓisina.

¹⁷May naŋu, junaŋ furaŋu, fokaŋ kulo'o, slen kaf ma nan daŋu naŋ ma dum tisiya. Tuwaŋ ma li nar kisiɗi, kay a nan ma muɗaŋ nar voksiɗi.

¹⁸Humaŋu, vaydi nan min tunaŋ kay nagat kaf, ki hoyok-ziy ma donona nala, ki dolla ma kawayna hiɗi gulmun ma kawayna nala, kat muliyana vi Yuda, kat sa ŋulona vi Yuda, kat muliyan-sa-ɗifinna visiya, kat sum sa hay nagata kaw.

¹⁹Nisi ma duraŋu, may nisi ma kol kaŋɗi; kay nan ka hiɗi naŋu kay butaŋ goyo, din mi Ma-Vatɗina.