Read Masana YEREMIYAS 10 Bible Online

YEREMIYAS 10 - Masana bible

YEREMIYAS 10

¹Humgi yoboyn ma Ma-Vatɗina dum katgina, nigi jafna vi Israyel:

²Ma-Vatɗina ka di ala: Sligi kuɗ poyta vi jaf-sumunɗi, muɗgi ɦuyum kay ɗekka ta kay dukalawnɗi, kay jaf-sum segena ka hiɗi narta.

³Kay data vi jaf-sum segen kayni mi sle ma waa'a, nisi ka gu ma hay juruta; san ceɗ gun namna hiɗi ceɗna;

⁴nisi korom tuwam hiɗi doorona hiɗi ora, nisi sli martona cum kulo hiɗi oslna, kay nam ma ge'ɗi.

⁵Laway namna ki dol ma piy hay sinena nala, nam may lawɗi; san as ziyim kulo'o, Awa, san as ziyim kulo'o, kay nam may tu'ɗi. Nigi ma li nar kalamɗi, kay va ma joo ma nam lum tigi mayɗi, nam may nagay kay ligi va ma ŋaaɗi kaw.

⁶Ma-Vatɗina, sa ma ŋiray hiɗi naŋ mayɗi. Naŋ ŋolo, semda vaŋ ta donota ŋolo kaw.

⁷Sa ma li nar kaŋɗi mi gige? Mulla vi jaf-sumuna! Narta kuɗaŋga ka ŋolo; kay jar sum sa yalla kay nagat kafe, hay mulda visi kafe, sa ma ŋray hiɗi naŋ mayɗi.

⁸Nisi kaf bay-yali, ɦay-ɦaya kaw, va ma ɗek ɦay-ɦayta visiya mi guna.[3]

⁹doorona ma beɗayna nisi maram ay goy hay Tarsis pa, ora nisi maramay goy Ufas pa, nam cani mi lopna vi san ma kot ora, lop ma hiɗi ɓamta, nisi gan tuw lawayna visi hiɗi sligar ma purpella, ma zim-zimna hiɗi ma slawna, kaf kayni mi lopna vi ɓam sana.

¹⁰May hay gasita, Ma-Vatɗina mi Lawna, namu mi Lawn ma irina Ma-Vatɗina, nagat geɗa kuɗ narta ta vokomta, jaf-sumun may asay kay ziy ɦiyda valamɗi.

¹¹Nigi ma di tisi ala: lawayn ma kot dukalawnɗi lay kot nagatɗi layna, nam ma vat goy hay nagata gaa kuɗ dukalawna kaw.

¹²Nam kot nagata hiɗi donota valamu, nam kot nagata hiɗi yalda valamu, nam meɗ dukalawn kulo'o hiɗi wida-yalla valamu.

¹³Hay li ma nam di delemu, niyn tok tuwam kulo'o hay dukalawna; nam mar ɗugullay goy hay vun nagat pa, nam li wileta kay niy ma sina, nam hin simeɗna kal ay goyo hay liyn ma ŋayna valam pa.

¹⁴Sa gigekaw muɗ bay yali vok wida valamu, sa ma kot ora muɗ zulo'o vok sle ma ceɗayna valamu, kay lawayn ma waana visiya mi sinda, suk may hayamɗi,

¹⁵nam mi sle ma waa'a, lop ma ɗutna, hay li ma kitata valam coowa, nam ma vat goyo.

¹⁶May namu ma yum ala vocota vi Yakub nam may naɗi; kay namu mi ma kot slen kafna, Israyel kayni mi jafna vi vocota valamu. Ma-Vatɗina vi vok-ma-duura mi semda valamu.

¹⁷Yawaŋ slena vaŋ gaa kay nagata, naŋu ma nisi ŋuyaŋawa.

¹⁸Kay Ma-Vatɗin ka di ala: Duwgiya, kuɗ ta wulinta, nan min gi sum sa hay nagatna ki hiɗi tiwlekŋa nala; nan min hebsi kulo goboyo, kay sumun ma yawsiya.

¹⁹joot kanu! Nan ɓulakawa, milla ma tanna ka ɓasan ŋolo. Nan ta ka di ala: kayni ti joota vanu, nan min ziya'a.

²⁰Guɗukŋa van ɦoy gaa'a, zigewna van kaf jay goyo, gurona vanu hinanawa, nisi say loɗi; sa ma pi guɗukŋa van kulo'o may loɗi, sa ma pi balakŋa van kulo'o may loɗi.

²¹Kay sum sa ŋomda ay bay-yali, nisi may gar Ma-Vatɗinɗi, kuɗ na'ta kayni nisi may hiɗi poŋ-irta vi slenɗi, kuɗ kayni farayna visi meray goy ɓek ɓek'.

²²Humgi della vi suwan tige, suwan ka co'o, suwa ma ŋolla ka tuɗay hay nagata ta gal gaata pa, kay to hoyok-ziyna vi Yuda gaa'a, kay muɗum goy mi liy ma cekemna lak haya.

²³Ma-Vatɗina, nan wi ala poyta vi sa-wurana may hay ɓalam kay tuwamɗi; hay li ma san ka poya, may ɗiger poyta valam mi nam kay tuwamɗi.

²⁴Ma-Vatɗina, ɗigeran hiɗi gasita, may ɗigeran hay ɦiyda vaŋɗi, kay a nan ma vat goy waaɗi.

²⁵ɦokaŋ ɦiyda vaŋ goy kay jaf-sumuna sa may waŋɗina, ɦokaŋ ɦiyda vaŋ goyo kay jaf-sum sa yi semda vaŋɗina, nisi ka vurum ziyna vi Yakub, nisi ka vurumsiya, nisi ka vatsi goyo, nisi muɗ liyna visi goy mi liyn ma wiŋŋa.